逃亡記 1.0

記憶中, 人生大逃亡, 兩次都喺意大利. 原因, 真係講都冇人信.

第一回逃亡

日期 : 1999 年 2 月14 日

地點 : 意大利西西里島 . 某小鎮民宿 

原因 : 鹹濕太子爺 

美籍印度女同學失戀, 陪佢去西西里島旅行散心, 當年島民應該冇見過扁口扁面嘅亞洲人, 個個當我公仔咁玩, 啲老人家仲會走埋嚟摸我塊面, 話 carina ~~ [唔係劉嘉玲, 係意文 '得意' 咁解]. 

EP1 - Lunch 喺街邊檔食魚, 下晝嚟料胃痛, 要返民宿作嘔, 女同學想打俾舊菜, 話要落街搵電話亭 (當年歐洲未流行手機), 喺廁所盡情噴發之際, 隱約聽到屎塔上方傳出一吓吓急速呼吸聲 😲😲  一望, 原來牆上有個窿, 有對眼喺個窿度𥄫我 😱😱😱😱😱😱😱  CLS, 真係冇諗過拍戲先有嘅情節, 會發生喺我身上 ! 我冇尖叫, 只係立即衝出廁所.

EP2 - 衝出廁所之際女同學咁啱返嚟, 開房門嗰陣, 更驚心動魄嘅一幕呈現 : 同一個男人, 打斜 '躝' 喺條樓梯度, 單手托頭望住我笑 [註 : 房門對正條上落樓嘅樓梯].

EP3 - 同學都比呢個景象嚇到, 話留喺房唔係辦法, 不如出街. 食完飯返民宿, 條友 (原來係太子爺) 同佢媽已經喺 lobby '守候' 我哋, 又請食餅乾又請飲酒, 開到個電視鬼死咁大聲, 大聲到根本連對方講乜都聽唔到 😩.  最鬼魅, 係老母突然閃咗, 剩低我哋兩條女同太子爺共處一室 ! 勢色唔對, 立即請辭, 太子爺話要 cheek kissing say goodnight 喎, 好啦, 同女同學正常錫面, 點知到我條仆街竟然一嘢咀落嚟 ! 

EP4 - 回房間以為安全啦, 準備瞓覺之際, 竟然有人用門匙開房門 ! 我哋以最快速度飛撲去頂住度門, 原來係太子爺老母, 話要入嚟睇吓個仔喺咪房度 (即係有前科, 條友會搞啲客啦) 😳😳😳😳😳😳   發神經, 成件事簡直痴線到一個點 ! 半夜三更, 出面落大雪我哋走唔到, 唯有兩條友通宵坐喺度頂住房門等天光. 

原本打算住兩晚, 咁恐怖, 第朝天一光就提早 check-out 冇鞋輓屐走, 俾咗第二晚嘅房租都唔要喇. 經歷過呢件事, 我決定以後永遠都唔會再住民宿.

第二回逃亡

日期 : 2003 年 7 月某日

地點 : 羅馬 . Airbnb 

原因 : 猛鬼 (惡嗰隻)

真實圖片 : 綠百頁窗就係有鬼嘅房同廚房

同 friend 租住羅馬市中心著名地標附近, 一個 apartment 嘅其中兩間房, friend 同佢老公向大街, 我同我妹就向內庭 (對角係廚房).  房東係個老婆婆, 入住當日感覺已經有啲唔妥, 雖然間屋好多窗, 出面仲風和日麗, 但屋內氣氛極度陰沉, 最奇怪係浴室, 枱面同浴缸四周擺滿幾百個不同品牌洗頭水樣板樽仔, 場面非常壯觀 !

真實圖片 : 大樓入口 . 條街車水馬龍

飲飽食醉, 晚黑番房倒頭大睡, 瞓到半夜大約 1:30am 有人開廚房燈𥋇醒咗我, 實在太光搞到瞓唔番, 輾轉反側反到三點幾, 唔係路, 唯有喺篋摷個眼罩戴遮光, 唔戴由自可, 一戴九秒九就出事 : 立即俾鬼砸 !!  都係例牌嗰啲, 完全清醒 (啱啱先瞓番低), 聽到四周環境聲音但個身唔郁得. 唯一唔同, 係戴咗眼罩睇唔到嘢, 砸砸吓, 有隻好大力嘅手揞住我個鼻 😮😮😮  用力掙扎, 唔知搞咗幾耐先成功掙脫咗, 因為太用力, 所以一鬆開成個人彈起, 除眼罩見到我妹已經起咗身. 

真實圖片 :內庭地下永遠有灘水 . 但周圍冇水源

睇錶時間係 5:30am, 我妹唔係早起嘅人, 問佢做乜, 佢話有 '嘢' 摙佢條頸, 一望, 條頸真係有兩個好大隻嘅手指印 😕  哇, 不得了, 同 friend 商量後決定 check-out 大逃亡, 馬上搬去另一酒店 ! 

而家整棟大樓已經改裝成酒店 https://www.hotelnavona.com/, 有仇家可以介紹佢哋, 去瞓吓 😆😆😆