危機指數

前日星期五朝早返到 office, 靜到耳鳴有種窒息感覺, 皆因當天公司會大開殺界裁員, 人人自危, 其實大部份員工都已經收到風五月尾炒人, 只係唔知自己有冇份.

20 秒小測試-即知會唔會被炒😂

A : 100%

B : 80%

C : 60%

D : 40%

E : 20%

F : 0%

各個部門主管, 又點會唔知邊個要起身 ? 其實自己就係點相送人一程嗰個, 驚, 只係扮嘅啫.  各主管選擇不同, 我就主要留低做事有 heart, 有 potential 而又唔需要花大量精力去管理嗰啲 " 快靚正 ", 人工反而唔係最大考慮, 因為今次裁員目的係精簡人手, 唔係慳錢.

avatar

我部門有個成日 " 咋死 ", 踢十踢郁一郁, 有乜問題都留比上司 ( 我 ) 解決, whatsapp 佢永遠唔覆 ( 但如果佢要請病假, 嗰朝我就有幸喺 9am 前收到 text ) 嘅 avatar, 就算公司唔裁我都想郁佢.

點解叫佢阿凡達 ?  因為除咗身形高大, 五官輪廓仲同 avatar 有 7 成似, 最恐怖係一頭直髮染成 solid color 去 match 佢每兩個禮拜就轉一次嘅血紅, 彩藍, 淺紫...... 嘅 color con, 望住佢真係會錯覺同緊隻高過我半個頭青蛙講嘢.

講番裁員單嘢, 舖頭同事竟然開盤去估 office 邊啲人會被炒, 太過份.  好彩星期五下晝放 NPL, 唔駛喺 office 睇住啲人續一被炒嘅慘況. 

有同事一路 whatsapp on live 報道最新情況, 結果有啲爆冷. 不過最不寒而慄係我嘅第六感 !  唔係馬後炮, 炒咗 7 個 staff 有 5 個我上禮拜碰面嗰陣覺得佢哋好似特別 get 到我 attention 咁, 所以望多咗佢哋幾眼, 原來呢啲係預兆 😱    唉, 希望唔好再 feel 到喇......

NPL 2.0

估唔到今時今日, 竟然可以辦公時間坐喺 office 寫呢個 blog.

點解 ?  因為冇嘢做到一個點囉, 撈咗廿幾年, 真係未試過成朝收得嗰 5 個電郵.  不過我一啲都唔覺得擔心同唔好意思喎. 點解 ?  因為條 🐀 私自刻扣我哋人工囉 !  根本 HQ 只係要求 🐀 同 COO 兩條茂里減人工, 但條仆街竟然賤到將全亞洲區經理級或以上同事都拖埋落水, 講到好似公司規定咁, 要全人類都減 ! 最絕係上禮拜 HQ CFO 開 skype 宣佈當刻, 🐀 淆底喎. 
點解 ?  因為 CFO 根本唔知 🐀 自把自為,  HQ 未批准就喺亞洲行 NPL ( no pay leave ) !  Skype 嗰陣望住佢個鼠樣, 幾驚呀.  驚乜 ? 驚有人玩嘢, 當場踢爆我哋已經 NPL 咗兩個月, 點解而家仲要減人工囉 !  

如果公司咁唔掂, 點解香港又可以天價新請啲對香港市場全無經驗 / 認識嘅外勞嚟做 store manager ?   擺明扣我哋啲糧去貼人, 咁大單嘢, 條發神經 HR director 又唔向 HQ 篤灰, 比我一早爆響口, 破壞佢好事啦.

做得衰嘢多午夜夢徊, 比啲怨親債主搞佢, 🐀 知驚 end up 唔敢減我哋人工, 只係話 NPL 延長到 end of fiscal year.

話雖如此, 條氣始終都係順唔番.   🐀 整 9 我哋 NPL 嘛, 今日開始就日日喺 office 玩 NPL 2.0 --> 自己 PL ( pay leave ), 閂埋門上網飲酒聽音樂, 以為 block 晒啲馬會, facebook, youtube, online shopping 我會冇運行, 收皮啦 !  知唔知公司另外比我嗰部 iPad Pro 乜網都上到, 又快又正呀.

提前 mother's day

窮人用時間換 $ . 富人用 $ 買時間 . 公司就用 no pay leave 去換員工嘅 $

上星期佛旦假期朝早10 點, HR 阿頭 whatsapp 我, 問 : " are you free to talk ? " 我答 : " yes ", 之後佢就冇再回覆, 成粒鐘音信全無.  妖, 最憎呢 communication style, 咁即係點 ? 要人 standby 等你 ?!

11 點半終於打嚟, 依依俄俄, 話其實 NPL 呢樣嘢令公司好多人對 🐀 ( 老闆 ) 極度反感, 好憎佢, 所以想向低職位員工撤回, 我啲馬嚟緊 5 月唔駛再放 NPL 喇.  心諗, 慳啲啦仆街, 無論放同唔放, 啲人都係咁憎 L 🐀 㗎啦, 連你自己都係啦.

唔明點解要鬼鬼鼠鼠打電話, 唔可以堂堂正正出個 announcement 囉, 乜 9 新政策都係口傳, 黑箱作業, 含糊其詞.  身為 HR director 一啲都唔 pro, 連啲啲大將之風都冇, 自己唔知自己想點, 又摸唔清老闆要乜, 仲唔知自量去同佢開火頂撞搞對抗, 結果因自己嘅憤怒而曲解指令, 或為咗鬥氣而延誤推行, 搞到 office 立立亂.

愈諗越㷫 😡😡😡 , 真係想打爆佢, 暨提前同佢慶祝母親節 : mi 媽老母, 小露寶 !   
 

舊地重游

HR 爆料, 根本 HQ 都冇話要, 但 🐀 竟然自把自為假傳聖旨, 要亞太區所有 staff 放一個月 4 日冇薪假, 但同時都仲要去炒人喎, 份人真賤 !  

同呢啲賤精唔駛客氣, 天氣好心情靚就自己行開吓, 橫掂 office 啲人炒 Q 晒 / 放晒假, 🐀 根本冇可能搞得清邊個要返工邊個唔駛啦.

剛剛禮拜四去咗赤柱軍人墳場, 對上一次去已經係 30 幾年前 16 歲嗰陣, 今次以為會好多人, 點知又冇喎. 

墳場面積唔大差不多一眼睇晒, 當日風和日麗, 綠草如茵, 墳墓旁仲長滿嬌艷小花, 一啲都唔恐怖.  比起幾廿年前嗰次陰雲密佈凄風冷雨, 簡直天淵之別.

幾百個墓碑喺小山坡整齊排列, 加上靜到有啲耳鳴嘅環境, 唔知點解有種隔世嘅幻覺, 好在跟手冇好似 16 歲當年嘅奇怪經歷 : 去完墳場回家途中一直聞到濃烈花香, 返到屋企黃昏 6 點幾, 喺空無一人嘅房間裡面竟然聽到兩爺孫捉棋對答, 你話驚唔驚 ?

Happy Easter

哈佛大騎樓

年紀同我咁上下大嘅, 應該有聽過 [ 大騎樓 ] 呢樣嘢,  [ 大騎樓 ] 唔係建築物一部份, 而係個用嚟形容女性澎湃胸圍嘅詞, 90 年代有個叫 [ 哈佛大騎樓 ] 嘅女藝人, 大家仲有冇印象呢 ?

比起而家啲網紅 KOL 碌晒出嚟, 大到睇見都頭痛嘅 E 奶 G 奶, [ 哈佛大騎樓 ] 嘅 35 C 只不過小兒科, 頂多係而家新樓必備嘅 [ 懸棺露台 ], 同 [ 大騎樓 ] 壯觀規模差好遠. 可能 90 年代物質未係咁充裕, 當時啲人易滿足啦

懸棺露台

.

被晾衫架攻陷的露台

論身材 [ 懸棺露台 ] 一定冇我份, [ 窗台 ] 都非常 ' 掹 ', 還好住嘅屋苑有露台設施, 可以心理上以形補形.  可惜大好一個露台, 只有少部份人識欣賞種吓花 ( 包括我 ), 大部份人都係攞嚟晾衫, 嘥料 !  有時都有啲男戶主夜麻麻喺露台鬼鼠講電話嘅, 尤其呢排 WFH 困獸鬥, 唔知點解呢 ?  

近期收到屋苑通告, 原來露台係可以用嚟發洩㗎 :  傾倒污水, 傾倒泥沙, 同平台草地其他住客隔空嗌交 😂😂😂

睇完得啖笑, 不過我就趁呢幾日咁好天氣, 將室內活動移司室外喺騎樓解決, 上網, 睇書, 聽歌飲酒寫 吓 blog, 享受陽光與空氣, 真係爽到一個點, 自己送比閉關中嘅自己最佳復活節 🎁🎁🎁.

Nice to have

無論要返 office 或者可以 work from home ( WFH ) 都好, 香港除咗班做到趴街嘅醫護人員, 同廢柴政府厚顏無恥嘅高官之外, 大部份打工仔近排應該都覺得好掩悶.

開頭因為冇得 WFH 而條氣非常唔順, 但經連日觀察,  我想以一個所謂公司高層身份分享 : 若然 [ 仲想撈 ] 或者 [ 唔想撈 - 但又需要份工去養家 ], 就算公司 offer WFH ( 全個 office close 嘅除外 ), 最好都耐唔耐返 office 蒲頭, 扮做嘢收吓風.

點解咁講 ? 因為我嗰間裁員, 大部份被起身嘅都係成日要求 WFH ( 老板 🐀 講到明冇, 都找死去 send 埋啲投訴公司不人道不公平嘅電郵 ), 或者喺呢個風頭火勢都仲敢三兩日唔埋就請病假嗰啲  NICE TO HAVE but not necessary ( 🐀 對呢類員工嘅專稱 ), 而家環境唔 nice 公司冇錢, 咪兜啲 not necessary 先囉.

除咗炒人, 所有員工仲要放冇薪假, 變相減薪, 不過有得做始終好過冇得做, 返工起碼可以接觸人類, 用吓腦又有錢收 ; 唔返工日日喺屋企吽, 好頹啫.  不過凡事有例外, 好似呢 4 日復活假, 我決定唔出街, 留喺屋企裡面渾身解數地宅.  

放假前非常有決心要做嘅 : 夜瞓遲起, 洗車, 拖地, 溫習拉丁文, 網購 CD / DVD, 發 whatsapp 問候意大利朋友, etc...... 乜 L 都冇做過 😂   

不過呢幾日遠離煩囂, 冇晒包袱, 慼起條筋想做乜就做乜, 嘆吓世界, not necessary but very nice to have 啦.