粉腸

學品酒可以學埋擦鞋

尋晚上堂,  break嗰陣同阿Sir 講 : < 聽講第二班有人喺街見到你着住件大褸, 揸住兩支酒, 好型喎...... >

阿Sir 聽完唔出聲, 耷低頭望住本書, dead 晒 air. 

  

以為佢唔啋我, 點知10秒後佢開口 : < 其實 wine 呢個世界好闊好深, 飲酒好講閱歷......  料, 要用時間浸, 冇呢樣嘢, 拎住兩支酒企喺街, 都唔係嗰回事. >

哈, 收到! 原來兜個圈讚自己!   見個勢好, 即刻加碼 :  < 係呀, 比我女人之家揸住兩支酒喺街行, 唔好睇囉. >    嘩, 佢聽咗幾開心呀!  隔咗陣, 忽然講 : < 喂, 不如我哋唔好喺度飲咯, 我哋今晚出去食飯, 我請! >

嘩, 好嘢! 咁就搞掂阿Sir請食飯.  不過同學仲好嘢, 即刻打電話叫埋老婆去!

同上次一樣, 去西港城<鳳城>. 

去完廁所返埋位途中, 聽到侍應同經理對話, 經理望住我哋嗰枱 : < 哦......  嗰條粉腸吖?!  比佢啦! >   轉頭, 侍應就攞咗6隻酒杯過嚟, "條粉腸" 應該唔係枱面呢碟, 係阿Sir.

我冇將呢件事講出嚟, 因為阿Sir 好似劈到 high high 哋, 爆起樽, 枱面咁多, 有排.   不過我覺得"條"經理真係唔應該咁樣去稱呼客人.

6 個人5支意大利酒唔夠, 要開多兩支, 分別係同學及阿Sir 出嘅私伙 Bordeaux (呢班好正, 除咗上堂試酒之外, 同學會帶啲自己覺得特別嘅酒嚟一齊試). 

呢碟鴿崧酥都痺, 仲成陣Pinot Noir (雞屎) 味.

有食力

尋日執死雞 last minute book到枱, 喺沙田馬場合法聚賭. 

可惜啲火雞馬搞到我哋全軍覆沒, 就算贏到馬都輸錢, 吹漲!

雖然食足成個下晝, 唔知係唔係輸到發窮惡, 一到六點又覺得餓, 所以去火炭 <津津> 繼續食.

開頭坐低, 露天有啲凍, 不過喫咗乳鴿, 羊腩煲, 炸大腸, 隊咗香檳加紅酒之後, 成身暖晒.

幾乎完美, 可惜爛尾......

碟遲嚟嘅辣酒煮花螺完全唔掂, 成盆嘢用辣油浸住, 但食落一啲辣味都冇, 下次一定唔會再叫.

西餐王

尋晚去咗 "西餐王" Ricky Cheung 間 <Le Mieux Bistro> 食大茶飯.    一向唔like私房菜, 因為啲老闆個個當正自己係大明星, 必定埋枱social, 發表佢獨特嘅美食理念, 搔擾食客, 迫人聽煮菜心得.  好彩尋晚 "西餐王" 冇搞我哋, 所以食得安樂.  

主人家帶咗好多靚酒, 例如左邊呢支Bordeaux 五大酒莊 Haut Brion.   可惜我同呢隻酒唔夾, 飲過兩個年份 (1966, 1985) 都唔覺得正, 果香唔突出, 一啲都唔馥郁.   期望高, 失望大, 在場只有一人猛話支酒好complex, 可能佢鍾意酸梅湯啦.

其他酒反而恰如其分, 最收貨係支 "液體黃金" Chateau d'Yquem, 簡直係非一般甜酒, 層次分明, 香味四溢, 終於明白點解支嘢要成幾千蚊.

食物方面真係要一讚!  一個土炮廚師煮西餐, Ricky煮得好好.  市面好多中西合璧嘅fushion菜, 夾硬嚟, 難食到爆. 

三個頭盤, 我特別欣賞 <黃酒川椒燉乳鴿> 同 <蟹粉海鮮ravioli>, 造型西化, 但內在其實帶點中式口味.

信不信由你

上咗 European wine tasting 幾堂, 卒之體驗到 <掹車邊> 嘅滋味!

Open-U 入學要求係 pass 咗 Level 2 就得 (即係我).   妖!! 同班同學原來個個都一早考晒 Level 3, 有啲仲已經讀埋其他advanced level courses!

將我同佢哋擺埋一齊, 同 <五班跑一班> 有乜分別?!   一個絕對唔公平嘅學習環境!

好在啲高班次同學冇嫌棄我嘅質素, 對我好包容同友善, of course, 有我墊底嘛.

That's fine.

講番尋晚上堂, 阿Sir 好興致, 同我哋成班出去outing.   行緊去酒樓, 見到人嘅真面目......   好老土, 原來無論乜機構, 學府, 組織, 都有擦鞋仔, 一路有人傍住阿Sir, 笑騎騎, 烚熟咁嘅樣.

坐低冇耐, 啲人開始發圍, 趨捧阿Sir, 讚佢可以公私分明, 又講到明好想喺佢公司打工, 乜乜物物咁, 當然阿Sir 好受啦.

阿Sir 原來係劈得好勁好快嗰隻, 當晚好high, 不過支支都係靚酒, 難得!  

老實的廚房

有期 U-magazine介紹火鍋, 話灣仔有間雞鍋辣到爆, 係陰濕嗰隻.   一試, 果然正! 

湯望落清嘅, 啲精華其實釀晒喺隻去咗骨嘅老雞入面.   搞爆隻雞, 啲大紅袍同紫天椒走晒出嚟, 此時湯底就變得奇辣無比!   加上好多奇特嘅餃子組合, 嗰度不失為一個好地方.

可惜, 個supervisor 每次開口埋口都"hi" 前"hi"後, 好煩!

嗰晚返到屋企樓下, 先發現唔見咗個爛鬼iPhone 3, 其實冇乜感覺, 我成日都跌電話㗎啦...  

第朝起身, 仲諗 : "噢,  終於可以買4S". 

不過諗諗吓, 可能係漏低咗喺火鍋度, 打去問, 果然有!   雖然部電話係舊款, 其實 trade-in 價都成千幾蚊, 佢哋冇貪心, 又冇暗示我要比貼士, 真係唔敢相信.

跟住我哋帶同其他友好回歸, 試真個雞鍋, 各人都非常滿意.  仲有, 原來個老闆好鍾意wine, 所以個wine list 都好見得人.

WSET 舊生會 #1

Decanter

尋晚品酒班同學搞第一次mini wine tasting.
好離奇, 因為上咗成10堂我哋冇乜傾偈, 但最尾嗰堂放學出咗班房, 走緊, 幾條友(包括我)忽然搭上!

品酒地點<又一居會所餐廳>.  去之前同學打比我, 話會帶支靚嘢(Bahans Haut-Brion 2005), 所以千叮萬囑, 叫我攞個闊底decanter 去.

 
一坐低, 有人話好餓要叫小食, order 咗個羊腩煲.

就喺呢個時候, 另一人隊咗舊嘢出嚟. 噢, 原來係 "aerator" (左圖) - 高科技醒酒器, 可以利用空氣力學, 喺幾秒內air 啲酒.

試咗, 過濾過嘅酒, 顏色明顯唔同, 聞落aromas出同滑好多, 但係口感就未必比未過濾嘅為佳, 個人認為, 係gimmick囉......  唔明點解而家連等吓都唔得, 品酒都要咁趕.

同學多數為bankers, 對數字觸角敏銳, set 好 <食飯+酒> 每人budget $500.  因有人帶靚酒, 所以其餘每支只可以$200樓下.

有個冇上過堂嘅人, 可能驚我哋覺得佢唔識, 強調自己睇過好多紅酒書, 重複咗N次,

講番支靚酒, 同學一嘢就猛力倒晒落decanter度, 之後可能因為貴, 冇蝕底, 一滴不漏咁由decanter倒落自己個杯.   跟住話 : "哇~  乜支酒咁多渣嘅!"

緊係啦! 咁同倒落個面盆有乜分別?  完全deficit 晒decanter 隔渣嘅作用......

結果支靚嘢並冇因為貴而獲得好評, 聞就香, 不過飲係另一回事.   反而喺錦田執笠紅酒倉用兩舊水買嗰支Pomerol - Chateau La Renaissance 2005大獲好評!  其實我覺得ok, 但係男士們覺得price/value/quality好正喎.



Italian White  - Pinot Grigio $198



French red - Haut Brion 2nd wine $1490

French Red - Pomerol $200

點解我一定唔會著睡衣落街

小學時代養過好多動物, 除咗貓狗, 擺得入屋嘅 <海陸空>, 例如雞, 鴨, 兔仔, 龍貓, 蠶蟲, 魚 ,龜, 多種雀鳥, 都有.  

期間有不少奇異經歷, 譬如 : 聽得明彩鳳講嘢, 錦鯉半夜叫 (好似風鈴聲),  但係話比大人知, 冇人信.

有期迷孔雀魚, 嗰陣返下晝班, 唔知搞乜好熱心, 每朝都去屋企附近街市買紅蟲 (而家絕對冇可能, 因我超級怕蟲!), 同埋睇吓有乜大咗肚嘅魚乸, 買嚟打種.

有日, 比我發現咗兩條極大肚嘅乸, 滿懷歡喜, 買返屋企!

買完唔知搞乜, 有樓梯唔行, 行斜坡 (圖中黃色箭咀位置) , 地下濕, 踢住拖, 一跣噠生魚, 係我同啲魚一齊!  超級瘀爆.  

轉身一望, 啲魚乸比我坐扁咗,  而我下半身嘅國產白色碎花睡褲, 濕晒變 see-thru.

與此同時, 一路之隔嘅街市雞鴨佬 (紅圈位置), 毫無保留咁擊掌嘲笑.

老實講, 比着我都一定笑到喊啦.  不過當時我又冇好似啲受辱少女咁, 喊住跑返屋企.

但從此以後, 我決定就算連行出屋企門口, 都要著得企理. 你話我怪都係咁話, 童年陰影......

早知咁貴唔淨食啦!

新一期品酒班又開喇, 尋晚趁上堂前喺中環行咗個round, 打算嚟個聖誕 pre-shopping, 點知冇嘢啱, 一條毛都買唔到.

行到歌賦街, 見到好耐冇去嘅九記牛腩, 當堂心動.  其實一啲都唔餓, 不過諗住過吓口癮, 整個清湯腩淨食.  

Order 咗先望到枱面個價錢牌, 原來淨腩要 $68!  係腩麵嘅double有凸! 

碗嘢咁貴, 點都要食晒啦, 都ok好味嘅.  食到成肚牛, 再去上品酒.

原來呢班學生人數少, 平時比20人share 嘅酒, 而家 6個人試, 試完再輪多兩round 都飲唔晒.   好彩啲牛腩脂肪夠份量, 如果唔係一早冚旗.

Art of 蠢

呢幾日, 連環比啲人同事激到彈彈吓.   唔關啲馬事, 佢哋好生性, 不過馬會個死投注網頁唔得呢!    臨門落注先嚟網路大塞車, 唔接受我投注. 第 5場揀嗰 3隻馬全中入三甲, $30注位置Q 可以收成千!   洩咗呢度氣, 跟住就場場輸, 頂~

今日心情暴躁, 食晏仲要比人話我蠢!

蠢! 可能背後成日比人講, 但係兜口兜面話, 呢生人真係第一次.

不過諗落有"so",  因為我覺得女人最忌就係叻 (純粹個人意見), 女人可以強同有見識,  但 show 晒出嚟, 逞強乜都自己做就最戇居.    我最羨慕嘅女人, 係明明得但唔做, 扮弱, 挑起男士英雄感仆倒嚟幫, 爽呀! 

傻人有傻福, 蠢都有, 話我蠢嗰個offer 咗一系列 jek-so, 教我嘢呀.

分甘同味

成個夏天, 喺屋企飲Spanish Cava, 貪平, $68/支, 百佳買6支仲有15% off, 抵!    不過飲足成季有啲悶, 所以尋晚轉番飲Prosecco.
睇完 <萬凰之王> 胡幸兒生仔, 整咗個Kir Royal, 跟住入房繼續睇 <天與地>.

今朝起身, 發現一隻生勾勾嘅曱甴, 飲緊杯裡面剩低嘅 Kir Royal......  嚇得我一手將佢由個杯fing咗出街!   頂佢吖, 咁識歎.

話時話, 我以前隻雀都識飲酒㗎, 但係佢唔飲紅, 淨飲白, 有時飲開隊啲比佢"depp", 你一啖我一啖, 飲大咗, 佢會袱喺碌棍度, 好搞笑!

有個friend啲鸚鵡仲勁, 食肉!  飲茶食剩啲山竹牛肉, 炒飯同腸粉, 都會打包比佢哋食. 痴線.

P

今日好老土, 兩個appointment, 都臨時"被"取消.

夜晚嗰壇最唔抵,  舊同事約喺iSquare 打邊爐,  上網睇,  泊車最近係 <中間道停車場>.  

九龍啲路, 我完全唔熟.   尖咀, 我連行都唔識, 何況揸車?   不過, 始終都要克服, 由沙田出嚟一步都冇錯, 點知入到中間道, 臨尾香.

發緊夢, 見到個P字就剷㗎車入, 衝咗落斜去到閘, 先發現原來係 private parking!

最慘喺要倒後上番斜出.   以我咁屎嘅技術, 死硬  :  唔"dum"又溜前, "dum"又勁飆. 

果然一"dum",  就車咗落欄度, 車尾花咗啦!

Ok, 過對面, 入到真正嘅 <中間道停車場>.    

OMG, 啲車位......  一定細過法定嘅 2.5M x 6M.    初頭想泊嗰個位, 仲要有條柱頂住,  再窄10cm.    泊咗兩次都唔得, 最衰係後面有車等, 好大壓力.  

夠喇!  一於U-turn + 逆線行車, 行到我覺得安全嘅地方, 泊低架車.  跟住, 就啱啱好收到電話, 啲人話屋企有事或者唔舒服, 邊爐取消! 

牽一髮, 動全身

爆完光都幾日喇, 傷口好痕, 應該係就好嘅徵兆啩.

眉尾嗰 5 針, 好厲害 -- 搞到我半邊面戚住, 明顯高低眉!   橫睇掂睇, 個樣同以前都有啲唔同.  哈, 唔知可唔可以還原呀.

我而家確信, 拉面皮嘅效力.  落幾針, 可以做到好多嘢.