西餐王

尋晚去咗 "西餐王" Ricky Cheung 間 <Le Mieux Bistro> 食大茶飯.    一向唔like私房菜, 因為啲老闆個個當正自己係大明星, 必定埋枱social, 發表佢獨特嘅美食理念, 搔擾食客, 迫人聽煮菜心得.  好彩尋晚 "西餐王" 冇搞我哋, 所以食得安樂.  

主人家帶咗好多靚酒, 例如左邊呢支Bordeaux 五大酒莊 Haut Brion.   可惜我同呢隻酒唔夾, 飲過兩個年份 (1966, 1985) 都唔覺得正, 果香唔突出, 一啲都唔馥郁.   期望高, 失望大, 在場只有一人猛話支酒好complex, 可能佢鍾意酸梅湯啦.

其他酒反而恰如其分, 最收貨係支 "液體黃金" Chateau d'Yquem, 簡直係非一般甜酒, 層次分明, 香味四溢, 終於明白點解支嘢要成幾千蚊.

食物方面真係要一讚!  一個土炮廚師煮西餐, Ricky煮得好好.  市面好多中西合璧嘅fushion菜, 夾硬嚟, 難食到爆. 

三個頭盤, 我特別欣賞 <黃酒川椒燉乳鴿> 同 <蟹粉海鮮ravioli>, 造型西化, 但內在其實帶點中式口味.