人點解要返工?

不經不覺, 已經過咗4 個月退休生活.  好多人問, 唔返工唔悶咩?每日點過? 

首先, 由始至終, 我都唔認為 :  < 返工 = 唔悶 >.  

我覺得人生中, 有幾十萬樣比返工更interesting 又可以解悶嘅事可以做.  所以, 要用到返工嚟解悶嘅人, 人生應該冇fun.

解答問題二 :  每日起身, 都不其然有種好舒暢嘅感覺, 點解? 因為唔使做呀!!   如果唔使做都唔開心, 死得啦!

平日喺屋企都係上網, 劈吓酒, 劈爆就午睡, 跟住睇TVB 啲劇 : <蔡顎與小鳳仙>, < 都市閒情>, <洛神>, etc.    最正套 <皆大歡喜> , 由古裝睇到時裝, H5N1"漢堡包咀" 阮兆祥真係好狗, 好搞笑! 

啲人知我得閒, 有乜局都會預我, 平日有馬跑就刨馬, 冇馬跑就騎馬, 又學人學品酒, 搬新屋又幾鑊 house warming, 其實都幾忙.

可惜, 美好嘅時光, 係短暫嘅......  下禮拜一Halloween, 我要做番嘢lu, 為$囉.  仲要出trip 𠻹, 好彩去嘅係台北, 可以見吓啲成兩年冇見嘅朋友, ok啦.

點解唔係徐濠瀅?

最新一輯瑞士糖廣告, 毫無美感可言, 對白奇'娘', 令人噴飯! 

同 E神談情嗰個女主角, 老, 髮型核突, 衫老土, 以為係男扮女.   佢用凌厲眼神啤住 E神嗰幕, 咀又"her", 面又長, 眼袋又大, 勁醜!

開頭諗佢一定大有來頭, 係瑞士糖太子女之類啦, 原來唔係!  佢叫楊之瑤, 係國內女模喎, 哇~ 

今期 <FACE> 登咗佢做model 嘅相.  搞錯呀~ 差咁遠!

廣告劇情最核突之處, 係搵已為人夫嘅 E神同佢做情侶, 打情罵悄, 噏埋啲乜...... <我哋嘅家>. 

比我知道Moviola 邊個做casting, 真係要一槌鍋落去!

USA

我唔鍾意美國人, 懶friendly, 其實好假.  覺得美國嘢好難食, 美國酒, 一聞已經頭痛.

美國, 係我人生最唔想去嘅國家. 

事原十幾年前, 喺巴黎讀書, 復活假期諗住去New York睇吓, 影相.   去美國領事館攞簽證, 排咗成個鐘隊, 交晒錢, 輪到我, 都未開聲, counter條八婆竟然話唔接受我嘅申請.  問點解, 佢話我比唔到<信心>佢! 

我問乜<信心>呀, 佢初頭唔答, 之後見我唔走, 就話(原文為法文) : "你哋呢啲亞洲妹, 一個二個去到美國就搵工, 跟住搵人嫁, 留低唔走啦."   妖~!

當時年少氣盛, 駁佢咀 : "要留都揀法國啦!"   條八婆比我串親, 叫我走, 我話佢種族歧視, 唔公平, 你估佢噏乜?!  佢話 : "係呀, 係唔公正㗎喇, 美國法規, 凈係對美國公民公平, 唔係你!" 

頂佢個肺吖! 我話 : "你連掂都冇掂過我啲documents就reject application, 我一定投訴你!"  佢示意我比啲documents佢, 之後打開本passport, 揼咗個[Application Received]嘅印落去!!   咁即係明玩嘢啦, 就算我以後申請, 啲人一見到個印, 都唔會比個visa我啦.  超賤!

嗰日, 係我一生感到最侮辱, 最嬲嘅日子!

咁多年嚟, 我都堅持唔去美國呢個理念, 不過世事無絕對, 份新工要出trip去美國, 嗰本烙印BNO已經過咗期, 而家用SAR, 佢哋吹我唔脹, 尋日我個visa application, approved 咗lu.

講明先, 下面facebook呢個group, 唔係我搞㗎 ...... 

http://www.facebook.com/group.php?gid=82785164555&v=wall&viewas=0

六合彩都搞哈囉喂

今日馬會網頁六合彩banner 嗰幾隻鬼好搞笑.

雞貴定龜貴

住咗沙田,  星期一馬場唔開冇馬騎嘅日子, 就變成我嘅shopping日.

唔認老都唔得, 以前後生行街, 一見啲無謂嘢, 靚衫, CD, 就雙眼放光, 買買買!   而家變咗主攻日用百貨, 同師奶爭.

今日因為影相攞簽證, 要等45分鐘, 行吓行吓, 竟然洗咗成千蚊!  仲要係一啲都冇買到原本想買嘅嘢, 可怕.

Citysuper 啲嘢貴咗好多好多, $10 以下嘅貨已經不存在.  行過外賣counter 聞到啲燒雞好香, 用$40買1/4 件,  比錢嗰陣已經覺得貴, 返屋企打開, 頂...... 唔係丫嘛......  細到無倫, 乜雞嚟㗎?! 

筍盤

剛剛娛樂圈嘅三個婚禮, 最羨慕梁詠琪.   識咗人五個月, 一個喺香港, 一個喺西班牙, 都比佢搞掂, 果然係result driven 嘅高手!

最好嘢係揀正喺舊相好'伊麵' 生日嗰日嚟結, 可想言之, Gigi 咁多年嚟, 條氣有幾唔順.

不過我諗'伊麵' 睇到Gigi 發報嗰啲幸福結婚相, 都無話可說, 因為實在係郎才女貌, 天仙配!

其實咁正嘅筍盤, 駛乜搞到去西班牙吖, 香港都有啦!
遠在天邊, 近在眼前, 燈燈燈凳............!  車保羅

一個願打, 一個願捱

今日東方娛樂版出咗呢條......

江若琳忍痛笑騎騎 (原文輯錄如下):

江若琳（Elanne）早前因拍攝電影《高舉愛情》不慎被啞鈴片傷及背部，令肌肉軟組織受損，由於仍硬着頭皮開工，令傷勢加重，經多番求醫傷勢才漸告好轉。

鼎爺大讚有堅持

近日，她更為即將在內地敦煌開拍的大型電視劇《巾幗大將軍》練習高難度馬術，雖然背部仍感到痛楚，醫生亦建議不要長時間訓練，但為了演好女將軍角色，Elanne仍堅持每天接受地獄式訓練兩小時，相當搏命，甚至其騎馬師傅李家鼎亦不禁大讚小妮子的堅持在港少見！

Elanne頻頻去上騎術課，最近已漸見成績，除能鬆開韁繩騎馬，亦可整個人瞓在馬背上，相當厲害！Elanne雖吃了不少苦頭，但亦坦言愛上了騎馬，喜歡在馬上自由馳騁的感覺，拍完電視劇後，回港會跟師傅李家鼎繼續學習。另外，Elanne近期馬不停蹄為最新國語大碟錄音，預計將在明年初發布，相信小妮子將會音樂、影視兩邊忙。

江小姐瞓喺隻馬背嘅動作, 其實全冇難度, 亦與騎馬功力無關, 應該純粹擺pose 比記者影. 

不過好佩服佢嘅毅力, 我見佢上堂真係好努力咁騎, 而鼎爺亦都好肉緊咁'啀', 九丈遠都聽到!   咁落力, 可能係睇中佢做新抱, 取締'豬皮'呢.......



唔好理係天然定係人造, 江小姐真人幾靚㗎, 可惜冇乜星味, 以藝人嚟講, 佢唔算瘦, 可能舉得重多, "科"晒啩.

左邊係江小姐以前嘅相, 而家咁, 話係箍牙同化裝嘅成果. 

買壽司變咗買電視

有時都好頂自己唔順.

尋日, 我做咗個經典shopaholic* 嘅行為.

( *Shopaholic 笑話係 : 老公叫老婆落街口買麵包, 10分鐘, 老婆 end up可以買到麵包  +  一對波鞋返屋企! )

話說屋企宴客, 下晝要去新城市廣場買sushi, 明明話去第三期, 個的士司機都可以照車去第一期, 之後仲扮懵, 好嘢!

落車諗起豐澤就喺樓上, 去行吓啦, 因為而家屋企個電視機太細, 睇唔到馬.

睇緊部SONY Bravia 32EX520原價$6480, 問sale 有冇做promotion, 佢話碌Citibank 咭有折 : $5690.   

我話冇Citibank咭, 有冇其他折扣?  佢話check吓, 之後竟然$5280 就得!!!  呵~~~  笑爆咀, 唔用Citibank 咭仲平!!  

就咁, 喺完全冇用腦冇理智嘅情況下, 我買咗部電視.

創作已死

左面 :  容祖兒最新專輯Joey & Joey 造型.



下面 :  今季LV advertising compaign.

乜LV sponsor 咗容祖兒咩?

定係LV 抄Joey 呢???  如果我係Joey, 一定告LV!  哈哈.

Tutti Frutti

上咗四堂品酒, 發現自己一個嚴重缺陷, 就係講唔出啲酒有咩生果味.    點解......? 因為我唔食生果, 除咗士多啤利蘋果橙, 西瓜香蕉菠蘿檸檬, 其他果味, 真係考起!

可惜試酒生果aroma分類好仔細, 凈係berry/cherry 都有gooseberry, cranberry, strawberry, raspberry, blackberry, blueberry, black cherry, red cherry.   

我凈係知blackberry係手機, 唔知佢原來係生果, 莫講話要分blackberry同blueberry, 就算連紅黑車厘子都搞唔掂, 慘......

尋晚試酒主打Cabernet Sauvignon, 紅黑果實風味, 我完全斷正,  er都冇得er......  唯一試到, 就係新世界同舊世界酒嘅明顯分別. 

新世界酒裝胸作勢, 果香四溢, 芬芳甜美, 但曇花一現, 好似而家啲畫到隻眼double大, 帶晒大眼仔, O咀, show晒事業線嘅靚女咁, 真係好索㗎...... 表面.  呢啲? 玩吓就好.

舊世界酒好似一個高手, 自己猛料, 都唔會大鑼大鼓周圍嗌 : "我好勁㗎~~!",  "我好叻呀~~~!".   但一飲落口, 就帶比你多層次深度, 浪接浪而變化多端嘅口味.   識貨嘅人都要有番咁上下閱歷, 品味, 至可以領略到呢種樂趣.

波仔便當

聽聞<波仔>便當幾得, 前日行過沙田第一城, 買咗兩盒:

1) 涼瓜牛肉飯
2) 瑤柱雞粒荷葉飯

對荷葉飯期望高啲, 所以先食涼瓜牛肉.   

叮完打開, 熟口熟面, 一食, 呵~~~  真係好似飛機餐, 不過係OK嗰隻.

第日再食荷葉飯, 好搞嘢, 盒嘢有塊真荷葉衿住, 但係食落嘅味道就......    啲網民又話料足又有荷葉味, 我食唔到.    話雖如此, 以微波食物嚟講, 都算好味.

講開飛機餐, 好多人都話難食.  其實我覺得港龍嗰啲, 有時都可以用好食嚟形容 (我要求低, 請勿見怪......), 有次去成都食嘅'宮保雞丁'超正,  真係好想問空姐整多盒㗎.

有搭過國內航班, 一定認得左圖呢個<超級紙盒> .

呢個國產飛機餐, 我第一次搭國內機, 比佢嚇倒!  因為內裡嘅配搭, 九唔搭八......  冇牛油要齋咬嘅餐包一個, 紙包蛋糕, 鹹到苦嘅果仁, 車厘茄或兩片橙, 同鹹菜一包!

偶爾一兩間航空公司會有熱食供應, 其他, 就凈食呢盒.   當時我諗, 唔通呢啲就係國內人心目中嘅一餐??    不過當我搭咗超過50班內陸機後, 習以為常, 每次派盒, 我第一時間就攞包鹹菜出嚟𡁻

災難HH

尋晚舊同事結婚擺酒, 未夠鐘, 去銅鑼灣新寧道Inn side out, 同部門舊同事聚舊飲嘢.

班友由金鐘揸車去銅鑼灣, 仲耐過我喺沙田去!   話灣仔大塞車喎, 搞到我一條友等咗8個字.

Outdoor滿晒要坐室內, 間嘢冇開冷氣, 又熱! 又焗! 又嘈!   明明頭頂有把吊扇, 但一滴風都冇, 形同虛設.   問個waitress可唔可以開大啲, 佢話cannot 喎, 頂佢!  

我用敵視嘅眼神, 啤住對面枱班嘈到拆天嘅鬼, 哈哈哈, 講唔夠兩句就大笑一餐,  哈哈哈, 誇張!

額頭啲汗又流到個妝溶晒, 真係愈坐愈火滾! 比着10年前, 一早拍枱走人.

今日check番, 噢, 原來Inn side out都係同我至怕嘅Grappas屬同一個集團, no wonder......

http://blog.yahoo.com/squirl/articles/11690/date/201107

冧莊

新一季賽馬聯賽(Racing League)又開始喇!   上季我哋中途加入, 成績只屬一般.

今季全靠運財童子新member 落'欖'有道,  加上<BB格> 呢個咁騎哩嘅新隊名,  我哋脫胎換骨.  

連續兩次贏到 <派彩之王>  (即全日眾多參賽隊伍之中贏得最多錢嗰隊), 馬會仲有兩套1000蚊餐飲券獎勵.      又有得賭, 又有得飲, 又有得食, 又可以同朋友聚會, 仲有錢贏, 真係抵到爛! 

皆大歡喜

前日friend叫我國慶日入場支持吓佢隻<盈彩繽紛>.   此馬因健康問題成年冇跑, 雖然之前七戰七勝, 但係臨場都唔係大熱. 

馬主喺沙圈表現忐忑, 因為佢啲塘邊鶴friend猛話隻馬唔夠靚, 但我就唔認同喇, 我同佢老婆講 : 隻馬好ready.

出到瞭望台, 佢超緊張, 靜晒.  結果隻馬跑第一都唔識反應, 直到佢老婆拍佢, 佢先至回魂! 哈哈.

今次係第二次拉頭馬, 仍然覺得好榮幸!  我其他friends同家人亦都因為我而買咗呢隻馬贏錢, 太好喇!!