馬交游

澳門賭場, 風水大鬥法.  船未泊岸, 一座座大型風水建築已盡入眼簾. 

尋日去新濠天地City of Dreams,  一入度旋轉門就見暈, 商場風水笑裡藏刀, 唔好以為設計係流線波浪, 其實係一把把刀, 室外瀑布水流大到可以扑穿頭, 剎氣勁重. 

去賭場𥄫吓, 天羅地網, 妖氣沖天, 行兩行, 直頭覺得比佢吸緊啲氣.  如果話嗰度冇法術, 打死都唔信! 

澳門賭場大部份都見識過, 除咗葡京, 呢個場最"有嘢".

地膽 macau friend介紹食晏嗰間葡國菜裝緊修, 冇開. 

結果去咗附近嘅 "文員網球會利安餐廳 (Leon)", 極有殖民feel, 好耐冇行過木樓梯喇, 陣陣舊木味, 正, 索呀!

之後 macau friend不斷轟炸提醒  : 真正葡國菜係好鹹嘅.

可能有咗心理準備, 除咗第一碟腸(chorizo), 所有菜式我哋都覺得唔鹹, 仲好好好好好好好好味𠻹!

我超鍾意碟豬耳(左下) 同雞湯炒飯(右中).

自量

下月實施自駕遊, 冇眼睇.   喺大陸見識過國內同胞駕駛, 橫衝直撞:

轉線會打燈 - 不過轉完先打!  

紅綠燈停車 - 與前車距離2吋, 啲差炒!!

其實香港路面都有好多衰人, 我補鐘學車, 啲人見你 L 牌都毫不留情, 一嘢"砸"埋嚟!   喺高速, 大把車專蝦 P 牌仔, 恃強凌弱, 變態.

有次打的, 司機大佬同我分享心得, 講喺乜情況佢哋會cut線玩人,  唯一唔搞嘅, 係靚車, 所以揸車要 '自量' 喎.   希望係佢個人意見, 如果個個司機大佬都係咁諗, 香港揸車都幾危險.

今日好驚,  騎完馬, 車完朋友去西鐵站, 油格得番 1/4,  諗住頂到去沙田先入, 行行吓著咗 indicator, 油量顯示儲備份量 (reserve fuel). 

其實唔係咁驚, 點知途中喺錦上路有幾段修路, 又有巴士不斷停站.   去到林錦公路, 前面架64K上斜龜速慢行, 行吓停吓, 行吓停吓...... 

卒之未到嘉道理, 油量顯示已經急降至幾乎乾塘.

嗰刻個心有啲離, 即刻戇居掉頭, 返錦上路油站入油!  揸架車咁耐, 從未試過入咁大缸油!!   即係代表好乾好乾啦, 如果死頂繼續揸, 拋錨無疑!

我來自HK

發現自己冇贏大錢嘅本能, 冇策略, 冇膽色, 又冇承受輸錢嘅氣度, 輸一百幾十就耿耿於懷, 半夜會扎醒頂住條氣, 小器.

尋日又入場, 純屬比面派對, 朋友book 咗枱叫到, 唔去唔得.  賭到一半, 轉架部去畫廊品香檳, 離開輸錢傷心地.

好耐冇參加過啲咁有氣質嘅活動!  一到場, 睇中咗張油畫 (圖左上), 不過要成 $48000, 算了吧.

飲住4種唔同嘅香檳 *, 睇 '鋼琴家' 演奏法國impressionism名曲 (與此同時, 爛賭成性, 一路用apps check 住賽馬派彩), 又可以學到關於香檳嘅知識, 多重享受.

Louis Roederer NV
Veuve Cliquot NV
Ruinart Blanc De blancs
Gosset Grand Millesime 2000

*每位$388

完場見有香檳剩, 梗係飲埋先, 估唔到咁就同在場人士搭上, 連同 '鋼琴家' 一齊走去食 yakitori (日式燒鳥).  

席上有個不斷自稱"飲醉咗" 嘅男士, 每次叫佢飲, 佢就話要 '鋼琴家' 彈首clair de lune先飲, 笑爆!    而之前鬼聲鬼氣, 自稱來自 New York, 廣東話係嚟咗香港 7 年先學識, 講中文要用英文翻譯過嚟嘅 '鋼琴家',  飲多兩杯, 原來講廣東話地道到爆! 

今朝上網起底, '鋼琴家' 係 native 香港人, 唔明點解佢要deny呢個身份?  唔通speak 英文先代表 high 級?

呢張真係正! Nothing to say

皇帝的新衣

上星期五最尾嗰堂品酒, 學food and wine matching, 奉旨出街食.    其實不嬲上堂我都覺得似返教會 : 阿Sir 係神, 班學生 (除咗我) 係信徒;  阿Sir 講嘅, 就係真理.

話說嗰晚有人帶咗支黎巴嫩 (Lebanon) 白酒比我哋見識, 支嘢完全冇果味, 飲落激似冇氣生啤.

估唔到市價要 2百幾, 喺同學打工嗰間高級餐廳仲markup 4倍, 賣過千!  

坦白講, 支嘢冇乜質素, 有人送都仲要諗吓要唔要. 但係阿Sir 一輪狂讚, 話黎巴嫩酒係higher-level drinker 先識欣賞.  一聽到higher-level, 同學忽然專家上身 (天呀...... 佢哋剛剛都仲以為黎巴嫩係歐洲!), 話支嘢同啲黑醋木耳夾, 冇可能吧!

間嘢啲味道普通, 最失望係碟 "生炆龍躉脊翅" (下圖), 龍躉嚡, 魚皮肥夾腥, 啲汁冚過晒啲魚味, 徙料! 

話就話matching, 但全部酒都厚都爆, 阿Sir 話之前仲特登叫廚師煮將啲餸較酸少少, 我覺得有啲本末倒置.  不過都係嗰一句 : "信者得救" 啦!

戰衣

冠軍練馬師約翰摩亞(大摩) 嘅獵裝造型, 係佢獨特標誌.

佢大雞唔食細米, 專吼杯賽食大茶飯. 
最興用 "馬海戰術", 一場裡面10隻馬跑有4-5隻都係佢嘅, 有次仲離譜, 成6隻! 壟斷.

嗰場見佢就忙喇, 喺沙圈氹氹轉, 分身不下, 要出動埋對仔女嚟應酬啲馬主, 但3 個人同一時間始終都應付唔到6 批人, 我見被冷落嘅馬主, 幾冇癮.

因為比着我, 就算明知隻馬唔會跑出, 都好想獨霸練馬師, 要佢走埋嚟陪企噏吓嘢 (幾膚淺? haha)

所以要做大摩馬主, 最好壇數高, 要有氣度, 識得等.

尋晚二場大摩 2號隻 <勝利駿駒> 臨場落飛, WP著晒綠格仔.

(相中黑西裝打呔嗰個)

入緊閘, 望吓隔壁枱, 咦? 點解大摩會成家坐喺度食飯㗎?!

好明顯, 隻馬唔會贏, 跟住佢成晚啲馬, 都唔會贏.  點解?  佢都冇著戰衣(獵裝) !

大迷信

我好迷信, 正所謂 '寧可信其有, 不可信其無'.   

細路係100% 病壞,食藥多過食糖, 氣數弱, 7 歲前對異度空間事物極度敏感, 例如 :

聽得明雀仔講嘢,  錦鋰叫 (叮叮聲, 似風鈴) , 見到重疊空間...... 可惜大人唔信.

大個啲有錢, 開始走去睇相占卜,  除咗 '問米, 扶乩' , 古今中外, 乜都試齊.

我覺得史上最流, 係個十幾年前喺上環文武廟擺檔嘅女術士, 自稱中大學士, 造型驚嚇, 胸圍帶上面.   

個女人實牙實齒, 話我與外國無緣 - 出外留學, 旅行, 同外資公司打工都無行.   在場幾個朋友聽到, 笑笑口, 因為覺得我比人"昆"!  (事實係 :  當時我正留學外國放假回港; 返港後, 十幾年都喺外資機構打工, 出差飛唔停).

今朝上網仔細 lun 吓我嘅紫微斗數命盤, 原來真係好寫實, 最堅, 係睇到我鍾意飲酒同賭 ('咸池'喺福德宮),  臉部有傷痕 (疾厄宮有'破碎','陀羅').

遲鈍的慶祝

生咗日成兩個禮拜, 仲有得慶祝.  星期六喺1881 Heritage間The Parlour食.   好耐冇去, 因為對上一次飲大咗, 喺女廁門口發顛, 大吵大鬧!

事緣有個用廁嘅人, 將大門反鎖, 私有化成個廁所, 令他人不得其門而入.   我忍唔住大力拍門, 鬧爆佢!  啲職員見狀好驚, 但可能我太兇猛, 冇人敢過嚟  (其實比着我係廁所裡面條友, 聽到出面殺聲震天, 都唔會開門啦).

雖然係free-flow VCP champagne brunch, 我一啖都冇飲, 因friend不斷哦 : "揸車唔好飲~  揸車唔好飲~  揸車唔好飲~~  揸車唔好飲~~~  揸車唔好飲~~~~"    
Waiter 聽到我哋唔要香檳, 比咗個 "愕然" 表情,  當刻以為佢不屑, 因餐牌有兩個價 : $398(唔包酒精飲品) 同 $598.   點知埋單, 先發現無論飲唔飲都係同一價錢, $398係小童價.  
妖, 今舖真係蝕!  早知少少哋都飲杯啦. 

雖然成六舊, 但食物質素用材都屬高quali, 自助頭盤/甜品造型精巧細緻, overall presentation 可以用 "靚" 形容!
上圖係我自己砌嘅頭盤組合 + "中東羊肉"主菜, 好睇又好食.  而最吊詭係, 位處尖咀, 身邊竟然 0 國內同胞.

下次要唔揸車再去狂食佢啲龍蝦仔, 生蠔 + 無限香檳, 唔駛半個鐘, 一定回本, 飲晒佢啲Veuve Cliquot, 入黑名單!

頂, 又跣我哋!

唔經唔覺, 尋晚wine tasting 已經係尾二嗰堂, 上埋下次就散band.  

臨別秋波, 阿Sir 教"盲品" (blind tasting).

"盲品" - 係要喺矇瓶情況下, 憑杯中酒嘅  1) 色澤  2)單寧  3)酸性  4)酒精度 同 5)味道 , 推敲出葡萄品種, 出產地同年份.

堂上blind taste 咗兩set 酒.  

第一set : 3隻 <相同葡萄, 但出自唔同國家 - same grape from different origins> 嘅白酒, 我哋要試出葡萄同3杯酒嘅出產地, 仲要解釋原因.    當各人噏咗大堆, 去prove隻酒係乜葡萄同產地之時, 阿Sir話自己搞錯咗, 混咗第隻酒入去!  跟住仲死撐, 話個mistake係perfect error, 所以我哋試酒要信自己, 要有hunch. Hunch?!  嗰刻真係好想衝出去,  "鏗"佢!

第2 set  : 3隻Bordeaux <同酒廠但唔同年份 - same chateau but different vintages> , 要試出每隻酒嘅年份.   期間阿Sir 念口王講咗Bordeaux 1990至2009 年份風格, 快到抄唔切, 淨係記到一半 (我明點解同學上堂要錄音喇!). 

但今舖竟然比我用<排除法>,  3隻估中兩隻!   點排除?  試嘅年份個range係2000-2009, 斷估佢唔會比啲好嘢我哋試咁著數, 所以2000, 2005, 2009 out! 
淨低邊隻老邊隻嫩, 我都試得出嘅.

呢兩杯唔係茶同酸梅湯, 係壞咗變晒色嘅白酒, 今堂我哋要學識試佢哋壞喺邊.  左邊嗰杯一聞成陣臭蛋味, 飲落口, 滋味無窮, 正!  不過我好享受呢堂.