老翻搬竇



"White Centre" 真蹟

近期喺"老外"網發現張我鍾愛嘅 Mark Rothko 老翻油畫, 真蹟賣$73M,  而家唔駛2千有交易. 

賣家好人, 話如果睇啱可以車埋幅畫去我度, 哈, 真着數, 連租車錢都慳埋. 

老翻舊居 - 火炭studio

去到賣家喺火炭廠廈嘅地方, 打開門, 原來係個"hea"竇 -- 兩面單邊, 大窗山景, 廿呎樓底, 過千呎地方, 有hifi有梳化, 廁所廚房, 實在太正喇! 

賣家仲將佢超過60支嘅結他收藏掛晒喺入口嘅兩邊牆上, 好壯觀.   睇畫中途, 賣家問咗我幾條關於Mark Rothko嘅問題, 盤吓我識唔識嘢.

佢話嗰度10蚊呎, 幾抵租, 不過佢係買嘅, 真係luxury.

 

幅老翻由今日開始就要屈就吓, 住喺我度, 不過愈望愈靚, 而家成個廳cheer up 晒.



米芝蓮standard

每人都有唔同癖好. 食嘢飲酒我絕對係重口味, 但講到老本行裝修設計, 就鍾情間約主意. 

接工程一不小心接着大師*呢類重疊-重複-又無定向嘅 project, 要起出嚟, 攞你命三千! 

*Thomas Heatherwick

"太古奸商" 始終係英國底子, 金鐘商場改裝, 緊係搵大師*自己友, 啲物料仲係唔貴唔用嗰隻.  

可靠消息 (朋友幫奸商打工), 話商場啲流線形廁格造價驚人, 每格成本 21萬港紙!  得閒真係要去踎吓, 沾吓啲貴氣.

奸商商場平台間Domani, 都係出自大師*手筆, 開咗兩年都冇去過.  好怕啲頭重腳輕嘅設計, 成個天花轉嚟轉去, 風水學上真係一大忌!

間餐廳好似話攞到米芝蓮(Michelin), 不過據悉米芝蓮班評審全部都係啲法國阿叔阿嬸. 

先唔好講潮流觸覺, 辣同熱嘢佢哋又食唔到, 污糟地方又唔會去, 評審點會全面?

上星期五去 Conferie des chevaliers du tastevin (法國Burgundy飲酒組織) 喺Domani搞嘅wine dinner, 深切體會到個場有幾差. 

嗰啲捲嚟捲去嘅天花板, 將啲人聲反覆反射, 坐咗一陣就開始頭痛, 直到食完行出門口為止.

可能上堂飲得cheap 嘢多, 所以支支酒對我嚟講都好正, 不過在場人士就彈到啲紅酒一文不值.  其實講差, 啲食物味道咪仲差?!  成晚除咗個好鹹嘅"牛+雞+豬肉" 撈埋一齊整嘅意大利雲吞外, 冇一味像樣, 仲話米芝蓮.

米芝蓮 service差嘅程度, 簡直係奇聞.

我哋枱有人遲到, waiter可能見有個空位漏派一份, 我friend即刻叫佢補番set, 點知叫咗三次, 佢都係企埋一邊, 冇action.  再摧佢,佢話要攞走客人嘅 table name card 去請示廚師喎! 白痴!!

嗰刻我friend終於忍唔住發火, 大鬧佢一鑊! 抵死.

專業放蛇

尋日去咗赤柱放蛇, 目標係某pizza連鎖店.

以前公司附近太古城分店成日full, 雖然佢哋啲pizza唔係乜國色天香, 但配搭有創意, 例如北京填鴨pizza, 真係幾正.

前排有單騙案, 叫人扮「神秘顧客***」去財務公司借錢, 所以特別小心, 盤算過冇乜蝕底, 先接受任務.  

放蛇過程相當過癮, 要故意但又好自然咁去問啲 set 好嘅問題, 一眼關七, 連廁格有冇廁紙都要𥄫埋.

完事後要喺24小時內做好一份好detail嘅問卷, 尋晚跑完馬返屋企填到成點半鐘, 太眼瞓走去瞓咗. 今朝起身開機發現原來冇save到, 成份要重做一次!

下個任務係油站入油同名店購物, 哈哈, 希望唔係我舊公司啦.

***被騙徒利用作行騙工具的「神秘顧客」其實並非新興行業，早於 50年代在歐美流行，起初是企業派員扮顧客評核員工表現，其後演變成市場調查公司的服務項目，香港亦在 10年前成立了第一間神秘顧客服務公司，為客人測試員工或刺探對手服務質素。

受聘的神秘顧客都是以「件工」計薪，最簡單工作是到目標店舖「目視」，看看有關店舖員工的工作情況，有些會到食肆吃飯，或到酒店租房住一晚，完成後須填寫一份對目標店舖的評估報告交回公司。

神秘顧客若放蛇期間遇到熟人要立即離開，而且一定不會到財務公司放蛇或與目標公司簽署合約文件。至於在放蛇購物亦不可超過 100元；如神秘顧客在珠寶店如常選購名貴貨品，甚至會刻意刁難，但最終都不會進行交易。

太極懷舊演唱會

太極除咗係運動嘅一種, 仲係香港一隊老牌樂隊.

啲人成日話要懷舊, 要retro, 聽番黑膠碟, 其實邊懷舊吖?  聽cassette 就真正堅!   我聽太極嗰陣, 仲係用cassette帶㗎, 之後先進化到黑膠碟, CD.

耍太極可以強身健體, 聽太極可以練得一手好字, 點解? 

學生時代冇嘢做, 鬼咁得閒又純情, 除咗狂聽佢哋啲歌 (播到連我阿婆都識唱), 每日都會"僕"住電視收音機, 一有佢哋訪問就如獲至寶, 錄低播完又播, 睇完又睇.   當年黑膠唱片會附送精美歌詞, 嗰陣我得閒就手抄一篇, 寫得多啲字就變靚.

而家樂壇, 人聲配樂都係電子合成, 好鬼驚, 好想聽吓啲 raw 嘢, 知道太極紅館開show, 即刻搵當年都係fans嘅朋友一齊去, 重溫舊夢.

you don't know what you don't know

尋日有啲作病, 死死吓, 夜晚約咗個好耐冇見嘅舊同事暨朋友喺 iSquare打邊爐.  

烚烚吓, 朋友話上禮拜諗起我  --  為咗件發生喺佢身上嘅超級瘀事, 而諗起我!  

Dee......  原來我唔只係瘀事嘅 reference, 仲係 benchmark!

朋友係竹升, 雖然近年廣東話進步不少, 不過都仲未識用個 "火羅" 字,  所以整段對話, 不斷重覆 "尷尬" 呢個詞, 好不文雅!

佢係某法國年青品牌亞太區高層, 上星期帶同一眾 business partners 去公司旗下餐廳食晚飯,  order 咗支紅酒, 試完ok, 成班人飲咗成 10 分鐘.   跟住個遲到嘅 F&B manager 一坐低, 飲一口就大罵係 shit!  再開支試, 原來 defective 要成批退番比酒商咁話.

咁擺明係話我朋友嘅 tasting 唔得啦!  當刻佢覺得喺咁多人面前出醜, 無比"尷尬", 極之丟臉!  

之後, 就諗起幾年前我同佢喺泰國出差, 食飯發生嘅一件 "尷尬" 事, 仲話而家身同感受𠻹 (真係唔該晒).

長話短說 :

食飯當晚有點人咗支澳洲紅酒, 唔知點解叫我試, 我唔識澳洲酒, 試嗰陣味道有啲怪, 當時諗......  可能澳洲酒就係咁嘅quali啩, 所以同waiter 話 ok,  點知條 PK 即刻露出個得戚笑容,  問 : "真係得? 乜你覺得冇問題咩? 支酒壞個噃." (英文)

屌! 唔係嘛?!  咁玩啲客! 心理變態.   其實我一直都冇淡忘呢件"尷尬"事, 以為自己唔提, 原來人哋一直都記得!


而家學品酒, 皆因為此.

Bordeaux etc

銅鑼灣禮頓中心翻裝後突然變潮, 喺後街有間酒舖, 門面好靚. 

其實入呢啲裝修得咁高檔又空無一人嘅舖頭, 要相當勇氣, 着得樣衰啲都唔敢.

職業病, 一睇條樓梯就已經知係"archi"嘢 (ie. 建築師做嘅室內設計), 裝修用料好high-end, 可惜手工差咗啲.

對正大門牆上有7個模仿酒內果味嘅香氣瓶, 我全部索晒, 橫掂唔駛錢.

店員強調間舖剩係賣法國波爾多(Bordeaux)酒, 樓上右邊賣右岸, 左邊賣左岸, 地牢賣大瓶裝同名貴藏酒.

地牢地方闊落, 比4個人同時喺度打觔斗都得!  仲有個試酒室, 如果可以包場玩就好喇.

裝修𨂽本, 啲租又唔慌平, 但估唔到啲酒取價合理, 冇獅子開大口.   參觀完地牢, 諗住上樓上幫襯, 點知店員同我講bye, 哈, 原來我個樣似運吉.

 

Chateau d'Yquem做特價, 名牌效應, 心思思想整支, 不過最後豪唔起, 只係買咗Chateau Suduiraut二線 - "S de Suduiraut 2008". 

出乎意料, 支嘢香味複雜性奇高 : 花香、鮮梨子、蜂蜜、堅果香交錯, 入口如油, 酸度有勁, 非一般貓尿Bordeaux白酒可比! 

買酒張單熨晒金但又唔俗氣, 全靠啲graphics得.

馬主夢

恭喜Aaron郭榮升馬主, 佢隻 "愛的呼喚" 是龍是蛇, 要睇郭生嘅造化同運氣.

香港成千隻賽馬, 跑出頭嘅來去得十分一, 其餘嗰啲, 唔計買馬同運馬成本, 馬主一年比幾十萬養馬費等運到.  三0部隊 (0 上名、 0 獎金、 0 分), 大有馬在!

上季2011馬匹拍賣當日喺現場, 啲人好似着咗魔咁瘋狂購物, 出到六七百萬買隻馬! 可惜嗰啲貴嘢, 到今時今日冇乜邊幾隻出到嚟跑, 就算跑, 都唔見有好成績. 

話雖如此, 其實出到賽, 原來已經好ok! 據了解, 香港每年有1/4完全未出過賽嘅新馬, 都因唔同嘅問題而要退役, 出師未捷身先死, 馬主明蝕.

唔係個個可以好似林培雄(右)咁, 用幾廿萬就整到隻 "雄心威龍" 嚟同佢贏成過千萬.  

希望 "愛的呼喚" 生生性性, 同郭天王贏幾場win, 比佢拉頭馬過吓癮.

上星期比兩幫人夾擊, 都係一啲極度想做馬主, 但係自己一條友又唔夠 $ 孭飛, 想籌旗搵人埋堆嗰種.

個案1 :

之前自己衰提過有興趣養馬, 不過都講到明剩係想同自己班friend玩.  有人當時已經好激進, 成日想埋堆, 話乜條件都冇所謂.

前幾日無端端sms話預咗我, 叫我同另一朋友一人比40萬! 嘩, 幾時有應承過同你夾?!  

覆佢冇budget, 佢竟然連環sms, 話我同佢講過可以夾大份, 唔係嘛? 幾時呀?!   唔睬佢, 佢還價$250,000就得, 企硬唔搔佢, 佢就send 埋晒啲 "唔緊要啦, 都係講緣份啦..." 嘅sms嚟.

男人之家咁 "啷嚟", 入咗局有排煩! 

個案2 :

另一人好想team up我同佢另外兩個friends, 話佢哋唔夠人, 要三月中之前揾多個馬會會員組隊, 除咗比名份, 仲要夾十幾廿萬, 都唔識佢哋, 只係喺馬場見過一次, 點夾呀!? 

做馬主除咗係虛榮, 仲包含好多意義同專重.  以上兩個個案, 就算成到事, 冇理性, 冇策略, 冇共識, 冇計劃 : 注定失敗! 

有相睇

我哋隊 "BB格" 賭馬比賽贏到總冠軍, 有$8,000蚊餐飲券, 好嘢!

贏完成個幾月, 馬會而家先email番啲相比我, 真係efficient, 不過佢哋記得, 已經好犀利.

睇睇吓啲相, 係人都高我半個頭喎!   哈哈, 原來我真係咁矮, 不過以前返工唔覺, 因為我老闆得5呎6 (鬼佬嚟講佢算矮喇), 唔怪得要一味靠惡, 凶人啦.

聽人講, 人愈老會愈矮, 縮3-4吋咁話, 如果keep到身型, 可以買童裝, 慳番啲錢同布, 環保.