Bordeaux etc

銅鑼灣禮頓中心翻裝後突然變潮, 喺後街有間酒舖, 門面好靚. 

其實入呢啲裝修得咁高檔又空無一人嘅舖頭, 要相當勇氣, 着得樣衰啲都唔敢.

職業病, 一睇條樓梯就已經知係"archi"嘢 (ie. 建築師做嘅室內設計), 裝修用料好high-end, 可惜手工差咗啲.

對正大門牆上有7個模仿酒內果味嘅香氣瓶, 我全部索晒, 橫掂唔駛錢.

店員強調間舖剩係賣法國波爾多(Bordeaux)酒, 樓上右邊賣右岸, 左邊賣左岸, 地牢賣大瓶裝同名貴藏酒.

地牢地方闊落, 比4個人同時喺度打觔斗都得!  仲有個試酒室, 如果可以包場玩就好喇.

裝修𨂽本, 啲租又唔慌平, 但估唔到啲酒取價合理, 冇獅子開大口.   參觀完地牢, 諗住上樓上幫襯, 點知店員同我講bye, 哈, 原來我個樣似運吉.

 

Chateau d'Yquem做特價, 名牌效應, 心思思想整支, 不過最後豪唔起, 只係買咗Chateau Suduiraut二線 - "S de Suduiraut 2008". 

出乎意料, 支嘢香味複雜性奇高 : 花香、鮮梨子、蜂蜜、堅果香交錯, 入口如油, 酸度有勁, 非一般貓尿Bordeaux白酒可比! 

買酒張單熨晒金但又唔俗氣, 全靠啲graphics得.