我就想喇, 唔係炒囉, 原來老闆見 office 諸事不順同好多人大病, 覺得要搞吓風水, 問有冇人介紹. 唉, 最怕呢啲, 搵着個好嘅就話啫, 整着個冇料扮代表, 亂咁嚟, 分分鐘衰多幾錢重.
結果搵咗舊公司睇開嗰個. 果然不出所料, office 輸在起跑線, 大門差到不得了, 財位落咗喺廁所, 桃花位缺角, 最大煲係 CEO / CFO 房都喺永久 ' 衰位 ' 😒 咁搞, 想發都難 ! 作為專業風水師, 同救護員一樣, 死人都要當生人救, 雖然個 office 咁差勁, 佢都比咗好多建議, 希望可以力挽狂瀾. 同埋呢個師傅唔 sell 啲什麼一條龍風水擺設服務再賺一筆. 壞處就係我要四出奔跑搜羅擺設, 不過我唔介意, 因為可以偷吓師嘛.
終於買齊風水物擺陣, 好多虔誠教徒竟然毫不抗拒. 但最意想不到, 係老闆秘書, 佢見到風水師覺得似曾相識, 後尾記起原來之前間公司都係用同一個, 所以咁熟口面. 話自己細叔都係做風水呢行, 仲收貴好多添, 又話風水其實唔係迷信, 係科學理據, 令人覺得更加心安理得.
明知秘書亦係虔誠教徒, 但佢咁講, 覺得佢應該接受風水, 所以根據師傅建議喺佢枱底黐啲化病古錢, 點知隔咗陣, 佢搣走晒啲古錢, 走嚟同我講 : 唔好意思, 我嘗試過, 不過真係接受唔到.
六個古錢啫, 又唔係喺你枱底種生機, 唔駛咁大反應嘛 ? 嘗試?! 搞到我好似要迫你藏毒咁 😠 ! 咁介意, 你一早就唔好噏乜春風水係科學理據啦, 痴線 !
呢啲係第一類危險人物, 明明自己比晒 ok signal 人, 原來其實係 no 囉.
沒有留言:
發佈留言