慢煮私房菜

上星期日出咗個頗精彩嘅 blog, 寫新老板啲衰嘢 ( 信我啦, 佢真係好 mean 㗎, 個樣仲成隻老鼠咁 ).  不過諗諗吓, 條友咁小器, 若果比公司啲聰明人睇到個 blog, 又 get 到我係講緊佢嘅話, 咁就真係冇運行, 所以第二朝起身火速 delete.

大前晚 10C 凍冰冰, 喺飯局飲多兩杯, 回家最終目標 : 倒頭大睡.  酒醉三分醒, 竟然仲識得去煲水, 整個暖水袋放喺被竇暖笠笠, 好快就 💤💤💤 失去意識.

一覺醒來, 左邊小腿有啲赤痛, 以為係爛瞓自己砸親自己.  望真, 有笪大約 10cm 長嘅紅印, 唔痕, 不過摸落有啲痛, 冇理, 繼續上網睇新聞.  

隔多陣, 沖涼.  初頭冇乜嘢, 大約 1 分鐘左右, 當熱水流向小腿笪嘢嘅時候, 突然有皮開肉裂嘅感覺, 同埋, 點解右邊大髀都會痛埋一份㗎 ?!  實在痛到唔可以再繼續, 護髮素都未沖, 就要腰斬個 shower.

抹乾再睇清楚, 原來左右腳都有笪紅印, 同埋開始起水泡, 咁怪嘅 ?  上網摷到啲疑似 case, 話如果唔及時求醫, 笪印擴散分分鐘搞到爛腳要截肢 😱    哇, 咁講真係好驚囉, 立即飛的去養和.

值得一提, 好多年冇試過養和睇門診可以長驅直入, 平時至少排 1 粒鐘先見到醫生啦, 而家財大氣粗嘅強國人 all out, 養和醫院重光了 !  

醫生望住兩笪紅印有啲迷茫, 因我身上其他地方冇, 如果唔係過敏同比昆蟲咬, 而係免疫系統出問題, 應該有頭暈 頭痛 心跳 發燒之類嘅症狀, 但我冇.  非常嫌疑仲有嗰啲水泡, 話最可能係熨傷, 但我又肯定對腳冇比火燒過同比滾水淥親喎.  

後尾, 醫生問瞓覺有冇用電氈同暖水袋.  呵 ~ 呢啲嚴冬恩物, 我咁識歎, 當然兩樣都用啦, 跟住佢就話如果個暖水袋冇漏, 有好大機會應該係我比張氈或者個袋 " slow cook " 咗 😂😂😂 !  唔駛好高溫, 40-45C 長時間接觸皮膚就夠, 仲話好多老人家都係咁.  

吓 ? 我啱啱入 " 5 " 一個月啫, 咁快就入被踢老人 category 😝

養虎為患, 呢個就係我喺巴黎買, 以為懶靚, 最後 slow cook 我啲肉嘅暖水袋.