一定爆

[一定爆] 唔係講告東尼馬房嗰隻M135, 係指今朝揸車去騎馬, 如有road block 吹波波, 我一定爆!

尋晚成班馬友 (騎馬嘅朋友, 唔係鹹魚) 去雙魚河過宿兼打邊爐, 慶祝兩個人生日 (包括我) 暨另一人騎馬第100 堂之喜.

火鍋用料好新鮮, 海鮮生蠔, 牛羊醉雞駝鳥, 老藕餃子乜都齊, 不愧咁貴, 大家吃得開心, 飲得仲開心, 無國界, 乜酒都叫.

我哋帶咗支, on the house 又送一支, 其餘  (除咗圖中下面兩隻) 全部起孖, 飲完埋單, 真係醉到簽咗乜都唔知.   返房再隊, 隊到大家徹底收皮, 瞓覺.

瞓醒冇異樣又冇頭痛, 以為掂.   開咗陣車, 點解有陣跌打酒味?? 

噢shit.....  原來係我身散出嚟嘅酒氣!    其實打開窗, 唔駛吹波, 都聞得出我爆錶.  

上咗馬, 隻馬一郁就天漩地轉, 啲隔夜酒喺胃啷啷吓, 冷汗都標,  好彩唔曬, 唔係一定嘔.

騎完馬, 有另一班friend 嚟, 貪方便又再去雙魚河lunch.   個相熟waiter 見我咁謝, 醒咗杯回魂酒比我, 飲飲吓, 有隻醒獅走入嚟.

好嘢, 勁鍾意醒獅!  迫佢同我影張臉貼臉先 (睇吓佢個樣幾唔願意......)


跟住同friend 啲仔女去玩攤位遊戲, 有檔DIY 畫豬仔錢罃, 其實我好想玩, 不過見啲細路嘅作品質數咁高, 都係咪搞.



玩完要返阿媽屋企食飯, 好唔鍾意個停車場, 憑乜?! 成 $22 個鐘, 仲貴過IFC 同Pacific Place. 

今日仲差啲"賴"嘢.

隔離位條防撞欄唔知做乜隊到過晒界, 而咁嘅高度唔知點解架車個sensor 又sense 唔到.

泊完去車尾箱攞嘢先發現咁貼, 差一吋就揩到, 真係好時高運.

開鑼

年初三, 一年一度開鑼大日子!

出門嗰陣風大雨大, 隻手比少少雨撇親都到凍到震, 諗起班騎師要喺咁凍嘅天氣下濕身騎馬, 啲錢都唔係咁易賺.

中菜廳book 咗枱我第一個到, 有個扮財神嘅人周圍派利是, 但係派完隔離張枱突然繞道, skip 咗我張! 

唔得! 即刻衝出去追佢攞利是!!


打開利是, 中獎, 贏到個24K包金 "一馬當先" 擺設!  呵呵, 主動出擊真係有so.

換獎影沙龍, 顏色十足運程書封面.

睇睇吓現場直播, 發現原來有另一馬仔造型 (右), 仲得意.

記得今年流年風水有個方位可以擺金馬, 速速上網搵吓喺邊先.

在此, 祝各位身體健康, 心想事成, 不勞而穫, 財色兼收!

桃花的故事

品酒個course要交功課, 做兩篇論文.

一月頭立心要喺過年前寫好第一篇, 過緊年就寫埋第二篇.  點知到今時今日呢一刻, 我一隻字都未寫.

尋晚臨瞓前好堅決 : 今日無論如何都要開始!!

結果起身食咗早餐上吓網, 寫咗個blog後, 突然勁想去花墟買年花.

搭小巴去火車站途中, 發現禾輋對面有個小型花市, 立即落車𥄫.  

哈, 水仙都幾靚, 不過因為早幾日friend 話水仙係 "死先" , 我經已完全打消買嘅念頭.    最後買咗一棵桃花BB同一盆五代同堂返屋企. 

講起桃花, 諗起十幾年前第一次買桃花.   話說放工同事提議去維園行花市, 見桃花靚買咗棵中型size, 點知街上人多, 托住行咗成半粒鐘先爭到的士. 

個戴骷髏頭戒指, 紮馬尾,  rock友look 嘅司機一路冇講嘢, 臨到, 突然出聲, 問我知唔知乜係 <桃花依舊. 人面全非> ?  我中文咁勁, 緊係知啦.

之後又話 : " 小姐...... 棵花咁重, 叫男朋友幫你托嘛! " 

我心諗 : " 妖你, 有仔就唔駛買桃花啦! "   死Rock友, 潤我?!

好戲在後頭  :

返到屋企, 剪開啲繩, 有條黑色毛蟲飛彈出嚟!   嚇到我魂飛魄散, black-out 咗幾秒, 諗起托住棵花連條蟲咁耐, 真係成晚毛管戙, 貼錢買難受. 

亂噏

日本百貨如 <吉之島>, <一田> 嘅洋酒部, 偶發性會有啲冷門佳作, 但我超怕佢哋啲賣酒阿姐, 行近啲望吓啫, 不出半秒, 就會衝埋嚟纏繞你.   

佢哋必殺開場白 :  "想搵啲咩酒呀, 我介紹你吖?"    

如果你冇當場拒絕, 跟住就一定係呢句 :  "呢隻酒靚呀, 啲果味好重, 好飲㗎!", 而啲所謂好飲靚嘢, 十居其九都係啲我唔識點欣賞嘅南非智利酒.

早排 (其實係上年年尾, 哈哈) 喺雜誌睇到<一田>個ad, 飲開隻香檳做特賣, 早兩日去睇吓.   帶住個耳筒扮聽歌, 等佢哋冇得埋身, 點知搵極都冇, 唯有問個阿姐.

阿姐話promotion完咗 :  "如果飲香檳, 不如飲呢隻啦" (手指住支4百幾蚊嘅西班牙Cava).   吓?! Cava要4百幾? 搞錯!

我話支嘢都唔係香檳, 點知佢死撐 : "都係香檳做法造出嚟啫, 仲好飲啦!"   

Cava冇錯係用香檳做法, 但葡萄組合同香檳完全唔同, 味道就唔一樣啦.   最唔like係 "仲好飲啦" 呢個個人主觀意見, 佢當自己係權威? 哈!

我覺得<一田>酒櫃一日養住呢班乜噏當秘笈, 誤導客人嘅阿姐, 生意都唔會好得去邊. 

重量不重質

吉之島鵪鶉蛋做緊sale, 買咗兩pack.  前日無聊, 一次過煎晒一pack.

又要食又要驚

聽聞鵪鶉蛋好高膽固醇, 我食完先識上網起底, 好在都唔係太差,  3隻鵪鶉蛋 = 1隻雞蛋嘅膽固醇.

食8隻, 都係等如食咗3隻雞蛋啫, 咁即係得啦!  又唔係日日食.


講完蛋, 講酒. 

尋晚上品酒, 堂上要做計分嘅wine tasting assessment,  試兩隻酒.  

正當我填緊份tasting form 嗰陣, 阿Sir 走埋嚟聞我啲酒, 搞搞震, 問我有冇撈亂, 唔知做乜同我斟過晒啲酒.

頂佢, 原本好地地, 比佢搞兩搞, 真係撈亂!    當刻忽然分唔出邊杯打邊杯, 腦海一片空白, 時間又就夠, 唯有垂死掙扎, 將兩份 form 嘅酒香 (aroma / flavours) 極速互抄一遍, 搏大霧!  (因計分制係寧濫無缺  :  寫漏攞 0 分 .  寫多唔扣分 )

結果 : 原來 blind tasting 嗰兩杯係同一隻酒, 只係唔同年份!  

PK, 陰我哋?!!!    好彩我大包圍兩張form 填嘅酒香味雷同, 死唔晒.

做完個陰濕 assessment,  阿Sir 話自己唔係狀態  (哈, 我覺得佢其實係日頭劈得勁, 劈爆咗啫), 不如請我哋食飯, 出去飲.    

嘩, 太正喇, 阿Sir 請食飯請到上咗癮呀! 

當我哋 6 人擺低 9樽酒喺枱嗰陣,  隔離枱個大陸佬用普通話大呼  :  "呵~  我們北方人也不能像你們這樣子的渴啊!"

姓賴

賭仔有好多禁忌, 賭嗰日最忌買書, 比人拍膊頭, 見到和尚 C姑.

Outlook 最忌髮遮額頭, "Un"腳, 同鼻頭生瘡.

臨場思緒太亂, 落注太快, 場場都買, 注碼太平均 = 輸硬.

除此之外, 自己最忌兩樣嘢 :

1. 賭馬嗰日啲人知我入場, 同我講 :  "贏多啲呀! " -->  好邪, 嗰日必輸無疑!

2. 入場比人攞咗支筆用, 或者 "笠" 咗份馬報 (唔係借) --> 包保輸.   百試百靈!  我懷疑咁樣係比人share 咗啲運, 同大賽開跑前攞 <最佳外觀> 嘅馬一樣, 分薄晒攞獎 quota,  end up 最多淨係入Q.

尋晚又輸, 因為阿媽話唔記得帶筆, 攞咗我支用.

水準

輸到驚, 戒賭咗兩鋪, 尋日再度入場, 因為要為賽馬聯賽 (Racing League) 作最後搏鬥!

我哋隊 <BB格> 喺 「派彩之王」暫時領先, 如無意外, 下禮拜 Jan 15 就可以勝出, 贏取 $8,000 馬場餐飲券, 呵呵.

比賽現場嗰班所謂專家「講馬之王」, 除咗中間個 "龍鎌亦" 有啲誠意之外, 其餘得把聲, 講埋晒啲廢話.

尋日頭兩場我好「準」, 買嗰啲全部跑唔出, 火都嚟, 加上梁家俊身體不適退出, 佢哋兩條友仲喺隔離嘈嘈閉, 真想一腳"伸"佢!

跟住仲正, 叫紅酒,  waitress 姐攞嚟嗰 5 個杯 :  兩個杯邊佈滿咀唇印 ; 另外兩個, 竟然有死咗嘅昆蟲屍喺裡面!   馬會竟然可以搞成咁, 仲衰過啲三流飯店.


妖! 真係忍無可忍......  攞住兩隻有死屍嘅杯衝出去投訴 (先此聲明, 我完全冇發脾四, 只係黑面) , 個掃把見咁嘅狀況, 嗱嗱臨叫人換晒啲杯.

唔知係唔係出咗火嘅關係, 由嗰刻開始就贏錢.   賭到第8場, 突然有職員埋枱, 原來係馬場 F&B 經理, 講咗一輪, 話為表歉意, 免收我哋支紅酒, 好唔好喎?    咁緊係好!

之後再order 咗兩杯白酒, 埋單佢哋竟然 free 埋比我, 話請我飲.

惠康禮券的士通用

裝咗陳豪個網上行, 送咗成 $800惠康coupon, 因屋企附近冇惠康, 所以用極都用唔晒, 一定有幾張keep 喺銀包.  估唔到, 尋晚大派用場.

搭的士由中環去灣仔$27.5, 比條紅衫, 司機竟然話全部都係$100, $500, 冇錢找, 咁疊水! 搞錯呀.

我話我都冇散紙, 咁點算......?  正當大家都毫無頭绪之際, 我突然𥄫到銀包內嘅惠康coupon!    問佢當50蚊用收唔收貨? 佢好疑惑 : " 係唔係用得㗎...? " 我話 : " 真㗎.... 用得㗎! ", 佢就收咗貨, 仲問我駛唔駛找錢?

我話 : " 哇, 緊係要啦! 找20蚊嚟啦! "

咁都得, 搞笑!

Happy New Year

我個Blog 主題係馬 (horsey), 但除咗賭馬飲酒, 騎馬一次都冇寫過, 好糜爛.   終於今日, 有喇.

左邊呢張, 係今朝新鮮熱辣拍嘅沙龍.   我嘅胃腩凸晒出嚟, 成個米芝蓮咁 : 係呢十幾日, 聖誕 + 新年暴食嘅成果.

最近訓練咗 Marky 新 tricks : 騎完馬, 佢識幫我攞住支鞭直至行到返stable為止.   途中如果支鞭想跌, 佢會落力擔番實, 好搞嘢!  (圖中我隻手係冇掂到支whip 㗎. )