桃花的故事

品酒個course要交功課, 做兩篇論文.

一月頭立心要喺過年前寫好第一篇, 過緊年就寫埋第二篇.  點知到今時今日呢一刻, 我一隻字都未寫.

尋晚臨瞓前好堅決 : 今日無論如何都要開始!!

結果起身食咗早餐上吓網, 寫咗個blog後, 突然勁想去花墟買年花.

搭小巴去火車站途中, 發現禾輋對面有個小型花市, 立即落車𥄫.  

哈, 水仙都幾靚, 不過因為早幾日friend 話水仙係 "死先" , 我經已完全打消買嘅念頭.    最後買咗一棵桃花BB同一盆五代同堂返屋企. 

講起桃花, 諗起十幾年前第一次買桃花.   話說放工同事提議去維園行花市, 見桃花靚買咗棵中型size, 點知街上人多, 托住行咗成半粒鐘先爭到的士. 

個戴骷髏頭戒指, 紮馬尾,  rock友look 嘅司機一路冇講嘢, 臨到, 突然出聲, 問我知唔知乜係 <桃花依舊. 人面全非> ?  我中文咁勁, 緊係知啦.

之後又話 : " 小姐...... 棵花咁重, 叫男朋友幫你托嘛! " 

我心諗 : " 妖你, 有仔就唔駛買桃花啦! "   死Rock友, 潤我?!

好戲在後頭  :

返到屋企, 剪開啲繩, 有條黑色毛蟲飛彈出嚟!   嚇到我魂飛魄散, black-out 咗幾秒, 諗起托住棵花連條蟲咁耐, 真係成晚毛管戙, 貼錢買難受.