惠康禮券的士通用

裝咗陳豪個網上行, 送咗成 $800惠康coupon, 因屋企附近冇惠康, 所以用極都用唔晒, 一定有幾張keep 喺銀包.  估唔到, 尋晚大派用場.

搭的士由中環去灣仔$27.5, 比條紅衫, 司機竟然話全部都係$100, $500, 冇錢找, 咁疊水! 搞錯呀.

我話我都冇散紙, 咁點算......?  正當大家都毫無頭绪之際, 我突然𥄫到銀包內嘅惠康coupon!    問佢當50蚊用收唔收貨? 佢好疑惑 : " 係唔係用得㗎...? " 我話 : " 真㗎.... 用得㗎! ", 佢就收咗貨, 仲問我駛唔駛找錢?

我話 : " 哇, 緊係要啦! 找20蚊嚟啦! "

咁都得, 搞笑!