亂噏

日本百貨如 <吉之島>, <一田> 嘅洋酒部, 偶發性會有啲冷門佳作, 但我超怕佢哋啲賣酒阿姐, 行近啲望吓啫, 不出半秒, 就會衝埋嚟纏繞你.   

佢哋必殺開場白 :  "想搵啲咩酒呀, 我介紹你吖?"    

如果你冇當場拒絕, 跟住就一定係呢句 :  "呢隻酒靚呀, 啲果味好重, 好飲㗎!", 而啲所謂好飲靚嘢, 十居其九都係啲我唔識點欣賞嘅南非智利酒.

早排 (其實係上年年尾, 哈哈) 喺雜誌睇到<一田>個ad, 飲開隻香檳做特賣, 早兩日去睇吓.   帶住個耳筒扮聽歌, 等佢哋冇得埋身, 點知搵極都冇, 唯有問個阿姐.

阿姐話promotion完咗 :  "如果飲香檳, 不如飲呢隻啦" (手指住支4百幾蚊嘅西班牙Cava).   吓?! Cava要4百幾? 搞錯!

我話支嘢都唔係香檳, 點知佢死撐 : "都係香檳做法造出嚟啫, 仲好飲啦!"   

Cava冇錯係用香檳做法, 但葡萄組合同香檳完全唔同, 味道就唔一樣啦.   最唔like係 "仲好飲啦" 呢個個人主觀意見, 佢當自己係權威? 哈!

我覺得<一田>酒櫃一日養住呢班乜噏當秘笈, 誤導客人嘅阿姐, 生意都唔會好得去邊.