辭職事件

講開辭職, 諗起成十幾年前舊公司發生嘅一件超騎呢事件.

咁啱得咁蹺, 同時間有兩個同事 (一男一女) 想劈炮唔撈, 但又怕死, 唔敢直接見老闆遞辭職信.

結果拖到禮拜六, 等老闆嗰日唔返office, 臨收工走入老闆房擺低封信就算.

唔知點解, 後來個男同事無端端走番入房, 攞咗女同事嗰封信出嚟, 掟番比佢, 話 :  "喂!  你唔好同我同一日辭職喎, 你下個禮拜啦!"

個女仔係粗魯型, 不甘示弱, 即刻衝入老闆房攞男同事封信出嚟掟落地! 

跟住佢哋互相爆粗, 擺明想開拖, 我哋見勢色唔對, 就叫佢哋收嗲, 放工走人.  等𨋢嗰陣已經眼啤啤, 點知一入𨋢, 佢哋竟然打起上嚟, 互踢!!  仲踢到個𨋢"澎澎"聲.

落到地下大堂, 佢兩個停咗手, 一開𨋢門, 個看更好驚咁望住我哋.  行咗出大廈門口, 佢哋一左一右, 分道揚鑣, 但就喺告士打道不斷回頭大罵對方 : " X你XX!"

呢一幕, 到而家都歷歷在目! 諗番起都好好笑.