Horsey is fun: 2013

2013年12月15日星期日

喜愛夜蒲

踏入十二月, 進入開舖最後倒數, Dec 13 黑色星期五, 開埋中環間舖, 就可以歲晚收爐.

日頭猛做, 夜晚 EYT, 唔係 eat yourself, 係歡樂今宵 entertain yourself tonight. 由上星期日到尋晚, 一連 7 晚夜夜笙歌, 連馬場都入咗兩次, 哈! 比我見到 Cool 魔, 拍照留念.

多晚激戰, 真係想死, 少啲體能都唔掂, 正所謂 ..... 唔蒲唔知身體好.

星期五晚去某 wine society 嘅 annual dinner.
Dress code 係 black tie, 臨渴掘井, 諗住著以前 2006 年買落件 little black dress, 點知條裙穿咗落身, 拉鍊拉到腰就已經再拉唔上! 我諗同 2006 比, 我起碼大咗兩個碼, 唉......

好彩最後比我摷到啲十世前買落, 見得人嘅衫. 終於明白 <養兵千日, 用在一朝> 嘅道理.

去到場地, 似珠寶展, 啲女人個個曬晒冷, 珠寶首飾大大件, 密集式閃爆, 好大壓力! 平時啲兩三卡, 真係要行埋一邊.

我就一卡都冇, 好在咁啱件 top 個領位有好多 details, 乜都唔駛戴. 啲男人就好啦, 打條 bow tie 就得.

當晚主打係 Domaine Leroy 嘅酒 , 每個酒杯都有 labelling, 非常清楚. 而 pairing 嘅食物, 做得十分好味, 賣相精緻.

坐我旁邊有兩個唔識嘅 uncle, 開場白都不約而同問我鍾意飲乜嘢 wine, 我真蠢! 竟然喺一個 Burgundy wine 嘅地頭講我鍾意 champagne 同 Bordeaux 紅酒, 講咗出口, 先猛然醒覺自己喺個乜場合, 完全 politically incorrect.

可幸兩位 uncle 都唔介意, 再傾落去, 得知佢哋係香港出名嘅 wine collectors, 仲話可以幫我入會添. 哇~~ 驚驚! No 喇, 唔好講會費, 得閒叫我攞箱酒出嚟 wine tasting, 佢哋就話 auction 買, 唔通我喺百佳訂咩?!

2013年12月6日星期五

舌尖上的成都

蔡瀾個樣笑淫淫, 鹹鹹濕濕咁, 撇除雜誌啲鱔稿, 其實佢又真係幾識搵食. 幾次依佢推介, 都食到好嘢.

今次去食成都出名老街 "寬窄巷子" 裡面一間叫 <喻家廚房> 嘅私房菜.

http://hk.apple.nextmedia.com/supplement/columnist/art/20100614/14131151

喻家廚房門口

寬窄巷子

間嘢勁低調, 門面連一盞燈都冇, 唔似巷裡頭其他餐廳燈光火着, 好彩同我一齊去嗰個人隻眼好細𥄫到, 如果唔係, 一定大睇過龍 miss 咗.

廚師主理川菜, 冇餐牌. 擇肥而食, 材料要當時得令, presentation 極級精緻, 超有懷石料理 feel, 上每道菜, 都有人講解.

前菜有 <素菜十六小碟> + 辣爆雞頸, 黑蒜, 雞湯.

跟住上嘅小食, 做到成支毛筆咁 (啲毛其實係酥皮包住肉鬆), 十分搞嘢.

最衰同事幾年前去咗 show 過啲相比我睇, 搞到冇晒 surprise.

再嚟就係 16 個熱葷 : 鱷魚肉, 黑松露, 和牛, 鹿茸, 鮑魚, 包翅, 遼參, 燕窩, etc .

雖然細細碟, 但一人一晚食成 32 碟以上 (前菜 + 熱葷) , 實在係好飽! 仲要成世人都未試過一次過食咁多補嘢, 真係有啲怯.

果然, 返酒店瞓成晚醒, 囉囉攣, 太補喇...... 谷爆偈!

2013年11月17日星期日

老馬有火

好耐之前已經有睇我 Yahoo Blog 嘅人, 大概知道我曾經開名批評過我最唔鍾意嘅 5 個人 (不過而家 Yahoo Blog 執咗, 冇得track 番 lu... ). 其實咁多年來, 對呢類人, 我都可免則免, 避之則吉, 因為正不能勝邪.

打工個機構, 人事調動, 其中一條最憎嘅 J 先生 , 而家時不時又要喺我 office 出現番.

佢早幾年以為上咗位, 對我老闆 (提攜佢升職嗰個) 一啲面都唔比. 風水輪流轉, 家陣要 under 番佢, 我老闆咁記仇, 佢呢鑊真係死一億次都唔掂!

其實我覺得自己好寬宏大量, 直情係海量汪涵, 對呢條衰公之前做過嘅濫交, 陰質事, 賤野, 都隻字不提. 點知同事講, 條 PK 竟然同佢哋 chok 我啲料, 仲話 : "she's not my friend".

What the hell! 做男人做到咁小家, 真係唔 X 掂, 要 post 佢個賤樣出嚟比人睇吓先! 明明中國人, 滿口英文扮澳洲佬, 食屎啦!

望望吓, 條衰公同菲律賓個 Noynoy Aquino ( 阿基諾) 有啲似.

啲賤人, 都係嗰個樣.

2013年10月11日星期五

為何永遠放不低

由始至終, 食飯嗰陣, 我都係對港人嘅某啲行為梗梗於懷, 例如 :

1. 以前週末飲茶 : "同枱食飯, 各自修行"
兩夫妻或者一家大細, 每人一份報紙 / 雜誌, 各顧各, 成餐茶可以連一句說話都冇講過, 零交流.

2. 而家有手機 : smartphone addiction
明明開緊飯, 個個低頭族, 攞住部電話噤噤噤.

有時出街食飯, 見隔離枱啲人咁, 不禁搖頭嘆息, 喂, 係咪真係咁放唔低呀?!    尤其一男一女, 如果個男嘅顧住玩手機, 我會覺得佢好唔尊重個女仔.

點知, 今晚竟然發生喺我身上!

某 friend 今日同咗我去玩, 玩完, 臨食飯, 忽然驚覺成日完全未覆過大陸啲客, 好緊張!   一坐低, 就開始不斷噤噤噤, whatsapp 加 QQ, 揼低頭, 持續 15 分鐘, 一 whatsapp 完,  二話不說, " 𠽌𠽌" 聲三大啖飲晒啲餐湯.

望住佢當刻, 有好多暇想 ...... 唔係想 dap 咗佢..... 而係, 香港啲男人就係咁?   好! 夠竟我忍住唔出聲? 定係開口鬧 x 爆, 叫佢尊重吓大會?!

結果我冇出聲.

再等...... 等到上牛扒, 佢又 QQ 緊, 叫我唔好等食住先.    但當佢發現我原來已經冇等, 食緊亦都正在講電話, 佢突然乜都唔玩, 同我講嘢, 直至食完走人.

2013年9月24日星期二

狼來了

尋晚飲咗好多先瞓覺, 瞓到5 點左右急醒, 正喺度掙扎起唔起身去解決嘅時候, 窗外傳嚟一把好 "拆" 嘅叫聲 : [救命呀~~ 救命呀~~~~], [救命呀~~ 救命呀~~ 殺人呀~~~!!]

我小...... 又嚟?!

http://shirliek.blogspot.hk/2012/12/blog-post_30.html

唔明點解佢兩個專揀夜闌人靜, 臨天光先嚟嘈交? 仲要打開窗不斷嗌, 搞到成個屋苑啲狗吠晒, 加上回音, 真係冇辦法可以瞓到.

同上次一樣, 嗌到咁上下就玩跳樓, 簡直係dejavu! 搞到啲護衛, 警察, 消防, 十字車嚟齊, 好墟嵌.

擾攘咗一輪, 條八婆 (我真係忍無可忍先咁形容佢!) 終於比人抬上擔架床送院, 佢個 TB partner, 仲一路行一路叫啲警察去拉佢 (條八婆), 又話要攞埋個手機, 打去理財戶口改密碼, 驚條八婆攞晒佢啲錢喎, 正一痴 Q 線!

佢兩條友今日見晒報, 比大家欣賞吓 :

睇真啲, 瞓喺床嘅就係條八婆, 佢真名叫 Shadow, 全火炭都知, 因佢上次玩跳樓時佢 partner (左邊格仔衫嗰個) 猛叫佢個名!

2013年9月15日星期日

無良設計師

以前做室內設計, 喺香港仔黃竹坑道某大廈 design 咗個廣告公司 office, 懶型咁, 成個場搞到好暗, 天花油晒深藍色.

起貨冇耐, 老闆同我講, 個客話office 鬧鬼.

跟住輪到自己告士打道 office, 日光日白都見到, 好猛.

老闆搵咗個師父, 佢唔駛上嚟, 剩係攞老闆時神八字, 就講得出嗰位靈界朋友嘅樣貌形態 (同我見嘅完全吻合!), 以及出沒嘅原因.

原來 office 裝修太中國化, 朋友好 like, 所以喺到留連......

所以話呢, 做設計要小心, 唔係分分鐘賴野.

"安樂蝸" 呢個節目做咗好耐, 間唔中睇吓, 啲人施展渾身解數, 火紅火綠整色整水, 搞到屋企成個冒險樂園咁, 幾好笑.

有時又訪問吓啲設計師 (好似下圖咁), 一望佢個 look, 諗都唔駛諗, 你就知道可以將間屋完全交比佢搞啦!

上幾集, 有個designer (紫衫嗰位四眼哥) 將個客全屋啲牆油晒黑色, 真係大整蠱, 我可以寫包單, 住喺度嘅一定冇運行.

亦有一集, 一對夫婦冇師自通, 間屋細做 open kitchen.

因為老婆矮過老公成個頭, 所以諗到升起廚房地台, 咁老婆住飯嗰陣老公喺廳, 兩個人都可以同 eye level 互望, 好 sweet sweet 咁話.

不過我睇都好少機會發生, 因為老婆一定病到阿媽都唔認得. 點解?

為咗偷位, 佢哋將個廁所做係廚房入面 (即要經廚房入廁所), 犯下 "廚廁不分" 呢個係風水大忌. 就算唔講風水講衛生, 你煮飯嘅地方有人喺附近開大, 你覺得點?

2013年8月25日星期日

Paris welcome you!

今年一月去巴黎, 發現以前成日住嘅一間酒店執咗笠, 好失落.

酒店老板係個阿伯, 每次去, 都會同佢吹水, 大家都有共通點, 就係好唔 like 美國人.

其實每次去, 都有意無意𥄫吓以前去開嘅地方, 睇吓仲喺唔喺度. 好多時, 人去樓空, 或者已經比啲潮流品牌取締咗, 覺得好欺虛.

好彩, 今次見番間老朋友 ~ 呢間賣殺蟲用品嘅店舖!

所有有害嘅害蟲動物, 佢哋都有配方, 最爆係佢嘅 window display.

1925 年喺附近街市捉嘅老鼠, 1995 年第一次見到, D 標本都係完風不動, 好大隻, 成尺長!

靈感的泉源

早輪電視旅遊節目, 台灣女主持喺法國飲 Absinthe (苦艾酒) , 見佢個飲樣十足第一次, 好驚好純情, 搞到我都好想飲埋一份.

以前讀書, 聽聞過呢隻酒嘅厲害, 法國好多大文豪, 藝術家, 飲到欲仙欲死, 上晒癮, 一句講晒, high 爆.

加上網上嘅介紹 (如下) ...... 嘩, 真係好想飲呀!!!!!!

<苦艾酒係烈酒，酒精含量68%，足以令人"酒後亂性"，釀成不少悲劇. 1906年起，苦艾酒在歐洲各國及美國都成為禁酒，直至最近，歐洲才解除了苦艾酒的禁令。>

隻酒喺香港唔易搵, 揾咗幾日, 終於喺 Olivers 找到. 回家途中, 心情既興奮, 又忐忑, 十足十癮君子等開飯!

苦艾酒飲法 :

1) 先將 1 part 綠色苦艾酒加入杯內;

2) 然後攞支匙羹或者叉, 放粒方糖喺上面, 擺喺杯面;

3) 慢慢淋兩 part 冰水喺糖度, 跟住糖水就會滴落 D 酒度;

4) D 酒變成奶白綠色, 飲得!

苦艾酒味道 : 好似草藥喉糖 (liquorice) + 茴香 (fennel) + 八角 (star annis). 我就好like, 不過我諗好多人會頂唔順.

連飲三杯, 完全冇反應, 第二日試吓加重料, 多 D 酒少 D 水, 睇吓點..... 哈, 結果完全收皮, 竟然由晏晝 4 點瞓到第二朝 4 點, 瞓足 12 個鐘, 真係十幾年都未試過!

恐怖......

2013年8月14日星期三

London welcome you!

上次去倫敦係2005年, 今次重遊, 發覺街道市容冇乜變, 英國女人, 都係咁醜樣. 但啲人, 就明顯友善咗好多同好有禮貌.

無論海關, 餐廳侍應, 舖頭, 酒店, 售票處職員, etc. 個個都會同你 say hello 寒暄兩句, 就算係行貨, 假風度, 至少人哋肯講出口.

例如喺 Harrods 人頭湧湧嘅超市, 買礦泉水比錢嗰陣, 收銀阿叔見我手上揸住盒藥, 會同我講 : "(支水) 用嚟食藥㗎 ? 不如喺呢邊食吖 (用手示意), 少啲人, 冇咁迫." 嘩! 咁 nice 嘅?! 以為自己聽錯......

有晚去高檔餐廳, 之前為某原因趕唔切喺酒店換 <戰衣>, 著到頗 casual, 竟然完全冇比人白眼. 食嗰陣啲 waiter / waitress 好 friendly, 招呼好周到添.

隔離枱咁啱都係香港人, 食緊個 8 度菜嘅 tasting menu, 佢哋有個完全唔得意唔 cute 嘅仔 (7-8歲), 可能上菜過程太漫長, 悶到半個身趴晒喺枱度. 啲侍應見佢咁, 走去撩佢傾計, 點知條細路唔睬人仲 9秒9 走咗去佢老豆身後呢埋, 啲咁嘅港童, 帶佢去遊埠簡直係晒錢晒時間啦!

2013年8月13日星期二

HK welcome you!

早幾日去完 trip , 一落機, 接觸到喺機場服務嘅香港同胞 (包括 : 地勤, 海關, 的士司機), 晨早溜溜, 個個黑口黑面, 腦海立即浮現一句 : <熱情香港 . 好客之道 . 點少得你>, x@#Yz!

指示 connecting flight 嘅女地勤 -- 目無表情死魚眼, 個個行路踢住個鞋掙.

班機師空姐 -- 冇人互動㗎, 一出機倉, 個個攞住部手機噤! 噤!噤!

海關 -- 攞住你張身份證, 但永遠都係同隔離個伙記吹緊水, 講部門壞話.

的士司機 -- 你講完目的地, 永遠唔應. 行錯路, 你提佢, 佢就會用好似你好傷害到佢尊嚴同專業嘅語氣講 : "得啦! 得啦! 我知啦!"

呢啲....... 就係外國旅客見到 <熱情香港 . 好客之道 . 點少得你> 嘅第一印象.

咁都仲有人嚟, 一係啲人好厚顏, 唔係就香港嘅吸引力無比巨大, 可以 compensate 晒所有冷漠, 不禮貌嘅屈辱.

好客之道
主唱: 林子祥
Your every smile
Your every hello
Every hand that you lend
You make a difference
Every step that you take
you make a difference