成都食力

2014 年四月, 應該我係有史以來最有食神嘅一個月. 幾乎隔晚就有大茶飯, 除咗港九新界, 連成都三大私房菜都食勻.

我覺得成都對啲唔食辣嘅人嚟講, 係一個煉獄! 

因為嗰度乜都辣, 連早餐都辣.  一到夜晚, 成個城市充斥住陣陣麻辣火鍋味, 勁啃!  記得多年前留咗成都兩個禮拜, 餐餐水煮麻辣, 我咁食得辣, 都頂唔順痾三日.  而家可能好啲, 開咗好多商場酒店, 有多啲唔辣嘅嘢揀.

上週去成都開舖, 一早做定功課, 搵啲好地方吃飯. 因為有人請, 所以目標係貴夾唔飽嘅私房菜.

悟園

搵食艱難 :  
用辦公時間上網, 摷咗好耐都毫無頭絮.  大陸咁大, 剩係成都餐廳都有過萬,  啲簡體字食評又難睇, 我專注力有問題, 每次睇多過三行就集中唔到, 跳格. 
最後終於要屈服, 靠蔡瀾.

蔡瀾個 blog 介紹過成都三間私房菜  : 1. <喻家廚房>  2. <玉芝蘭> 同  3. <悟園>.   

悟園

 <喻家廚房> 之前食過, 今次試其他兩間.  除此之外, 我哋仲去埋 <寬巷子3號>.



淆底:
冇打算詳細評論食物, 因為我人比較膚淺, 詞彙少, 除咗 "正, 精緻,

悟園

好味, 有層次, 靚, 有驚喜" 之外, 真係噏唔出其他. 



不過我對 <悟園> 確實有啲失望.

啲嘢味道普通, 完全冇特色, 賣相最搞笑, 九唔搭八, 無嗱嗱搵盆沙堆幾粒石春貝殼, 同啲菜式毫無關係.




食完後, 只覺得好飽好飽, 可惜, 冇一度菜值得回味.

寬巷子3號

寬巷子3號

反而成日比人話商業化嘅 <寬巷子3號> 仲好啲.
  
唔只有風味, 起碼用嘅餐具, 都各有特色.  [拔絲鳥巢炒鵝肝粒], 拔絲做到個盆咁大, 仲可以撈埋啲鵝肝食. 上菜嗰陣, 個個都不禁 "嘩" 一聲! 


如果...... 你以為辣嘢一定要見紅 (辣椒) 同浸晒辣油, 今鑊實癩嘢.

個 [番茄雪耳], 啲雪耳簡直殺人於無形, 用青辣椒汁醃過, 辣到個後尾枕會卜卜跳㗎! 
呵呵~~  令我呢啲冇辣不歡嘅變態狂喜!

玉芝蘭

玉芝蘭

 <玉芝蘭> 
地方如其名, 勁優雅勁低調, 門口連招牌都冇.  

喺一條個名好普通, 但問極都冇人識嘅 "長發街" 度.

除咗幾道前菜之外, 完全冇大麻大辣. 佢嘅餸講求刀功, 技巧, 清到冇人有!

個豆腐絲用礦泉水做湯底, 一滴鹽都冇, 成晚對我嚟講, 太清淡喇.


還是覺得你最好 :
試晒四間私房菜, 始終認為 <喻家廚房>  
"高"啲, 佢貴但佢能將啲矜貴材料發揮得淋漓盡致.