看更唔易做

尋日屋企有工程，因樓上塞水渠，要打開我㕑房同厠所假天花去通。 管理處老點，話兩點開始，好彩我晨早返歸，果然...... D 人 1:40 就到。

兩個渠王嚟搞，我最初坐喺梳化睇電視，上吓網，玩 whatsapp，以為頂籠兩粒鐘搞掂。 點知...... 佢兩條友搞到氣來氣喘，發出＂咿咿＂聲，又話要出走廊抖氣，滿頭大汗，十足接生咁款。

等到 3 點幾，飯氣攻心，當刻真係非常極度有需要去午睡。 但 D 佬喺度，唔瞓得，電視又冇嘢睇，唯有攞隻已經睇過 N 次嘅 DVD 嚟播。 其間，渠王燒 D 喉，烽煙四起，成間屋充滿金屬打磨味，攞命。

5 點幾，套戲播完，與此同時，渠王突然發功，開鋸發出巨響，天呀，咁即係乜都唔駛做啦。 再等，6 點天都黑，搞足 4 粒幾鐘，唔好話生仔，心臟搭橋都做完啦！  我已經等到容忍極限，同渠王講 7 點要出街食飯，無論如何一定要 6 點半搞掂走人。

比我凶咗嘢， 渠王快馬加鞭，嗱嗱聲整，6 點半收band。 走嗰陣竟然讚我好老皮，話比着其他人，一早媽媽聲。

呵～～  我而家好少鬧人啦！

喺呆等嘅幾個鐘，真係好 Q 悶，我深深體會到做看更嘅無奈同苦悶，終於明白點解佢哋會咁殷勤走嚟走去同你開門，好熱情咁打招呼。 我都話可以睇電視聽歌自由活動，佢哋唔得個喎，日光日白，燃燒歲月;  當夜更，仲要驚鬼！