分明畜生相

尋晚打邊爐, 飲大兩杯, legal 同事話覺得我好 "入世". 都唔知褒定貶.
 
以前讀設計, 同學覺得我似河馬.  
教設計個阿 Sir 就笑我醜小鴨變天鵝 (因我以前箍牙).  
十幾年前, 舊公司同事個老公話我似條蛇.

而家好喇, 脫離畜生系列, 仲 skip 咗人跳進 "入世" 超然境界.  
既然係咁, 要做吓啲脫塵嘅嘢喇......

今日, 終於去咗個想去咗好耐嘅地方 : 深圳 大芬村藝術區.

唔係好遠好易去, 羅湖口岸打的, 40 蚊人仔就可以去到門口.

話係藝術區, 其實係個有兩個半維園大嘅油畫集散地. 

裡面充斥住大大小小 600 幾間畫廊, 成萬個畫家喺度畫畫畫.  眼花撩亂, 乜畫都有, 除咗抄, 仲可以度身訂造. 

我同個 friend 各自都 order 咗張心頭好, 兩個星期後交貨, 係龍定蛇, 下回分解.