羅馬4寶

三月頭 backup 個 iPhone, 搞搞吓, 畫面彈咗段好長嘅 message 出嚟, 冇睇清楚內容, 一嘢噤咗 OK.

幾日後, 發現部 laptop 裡面嘅相唔知做乜全部冇晒, 包括我 8 年來騎馬生涯所影嘅, 同上年 10 月去羅馬嘅尋根之旅, 通通冇晒!   欲哭無淚, 打擊之大, 筆墨難以形容.

• 由發現當刻嘅震驚 ! 

• 繼而憤怒 !  嬲自己買咗個 external hard drive 都唔 save 啲相落去. 

• 無助 !  因為用網上軟件收復唔到, 仲因為裝咗而 override晒啲 data.
• 到最後, 絕望 !  
• 妄想! 日思夜想, 盼有奇蹟出現...... 瞓醒覺開機, 啲相會喺番晒度.

 奇蹟就冇喇, 不過有 4 件開心事.

Pope John Paul II - 3D postcard

  

1

上兩個禮拜返阿媽屋企食飯, 喺個啲書多到就 'lum' 嘅書架, 發現咗本陳年舊書, 裡面竟然夾咗呢張唔見咗 N 年, 搵極都搵唔到嘅教宗保祿二世 3D postcard. 

太好了! 呢張咭係廿年前第一次去羅馬買嘅, 好有記念價值.   教宗保祿二世已經死咗好多年, 投咗胎, 但張咭仲保存得好好.

Renato Zero - book cover

2

冇意中喺網上發現到呢本我羅馬時期最喜愛 pop singer Renato Zero 圖冊.

280 頁精裝, 意大利速遞過嚟, 都唔駛 4 舊. 諗都唔諗, 即刻落 order.

Renato Zero 係羅馬歌手, 係 icon, 意大利冇人不識.  妖氣沖天但又非常唱得, 由 68 年尾開始唱, 70 年代走紅直到今時今日, 縱橫樂壇 6 個 decades, 持久力特強.

封面相佢 20 幾 (右), 而家已經 60 幾喇 (下).

Renato Zero 2013 - in his 60s

3

呢本其貌不揚 A4 size 嘅羅馬街道圖 TuttoCitta (All City 咁解), 90 年代隨電話簿附送. 

老實講, 本嘢係我讀書時期喺街邊執嘅. 

除咗刨馬經, 我仲有舖刨地圖癮.  呢本又殘又舊嘅地圖, 喺當年冇網上嘅年代, 陪伴我度過不少日子.

本地圖, 肯定有帶返香港擺咗喺阿媽屋企. 不過從此之後人間蒸發, 十幾年來, 一直摷佢唔到. 冇嘢怕, 至怕阿媽當垃圾掉咗.

早排同阿媽 confirm, 佢冇揼我啲書. 上星期六, 翻箱倒篋, 狂摷之下, 終於搵到呢本被活埋嘅地圖. 久別重逢, 開心到爆, 自隊一支 magnum champagne 都未夠!

Rome - area where I used to live

Carabinieri - 1999 Calendar

4

<警察 + 女人> 呢個配搭, 香港應該唔會出現.

意大利, 根本就喺中國大陸嘅西人版, 乜都亂嚟.  意大利, 連警察都有三款 : Polizia, Guarda di Finanza 同 Carabinieri.

除咗制服唔同之外, 職權完全重疊, 一字記之曰 : 亂

不過我最喜歡 Carabinieri, 因為佢哋啲制服真係靚到 dump 一聲.

右邊呢個意大利警隊年曆, 我 1998 年尾喺羅馬每個政府機構都會見到.  無論見咗幾多次, 每次都眼前一亮, 望住呢個封面, 感覺好 romantic, 英雄配美人.  好想要, 但又冇辦法攞到, 啲人話一早派晒, 冇啦......

返香港, 念念不忘.  直到 2003 年, 喺 Portofino 一間酒店, 同個老闆有偈傾, 見到佢枱頭掛住呢個年曆, 即管問佢可唔可以賣比我.

佢話 : " 賣乜吖!? 攞去啦! " 

哈, 竟然比我恨到, 夢想成真.   所以, 我覺得消失咗嘅相, 喺某年某月某日, 會再出現.....