前日食完 lunch 走去 IFC 染髮, 飯氣攻心, 啲染髮劑搽落頭皮度涼浸浸舒服到爆, 一路染一路釣魚. 半夢半醒之際, 比身後一把好 ' 拆 ' 嘅女人聲嘈醒.
佢好勞嘈, 扯晒火當眾大鬧個賓 ( 女佣姐姐 ), 話佢蠢, 講極唔明仲駁咀. 佢應該係叫賓妹攞件衫去比人改, 想吩咐賓妹提醒人, 佢件 < 黑色 lace 袖成兩萬七千五蚊嘅衫 > 係好貴嘅, 點知賓妹唔識聽廣東話, 佢又唔識英文, 雞同鴨講.
實在太眼瞓, 冇為意, 繼續釣魚, 點知釣唔夠 3 分鐘又比條八婆把 ' 拆 ' 聲吵醒, 張開眼, 驚覺附近客人已經四散, 身旁坐位全 ' 吉 ', 跟住髮型師走埋嚟, 細細聲問我...... 駛唔駛調位 ?
吓, 點解嘅 😆 ??
洗頭嗰陣, 髮型助理同我講, 呢個女人每次嚟都大吵大鬧, 扮晒勁引人注目, 成間 salon 都怕咗佢.
咁巴閉, 洗完頭, 認真𥄫吓佢乜料先 !
他媽的, 只不過係其貌不揚, 短小兼肥腫身材嘅中女一條 ! 佢啲碼頭 ? 手上普通戒指仔鑽石都冇粒, 一個人攞兩個手袋出街, 左 Gucci 右 LV, 仲要係十幾年前舊貨, 再搭個 ' 巢 ' 爆嘅 LV 大紙袋, 裡面擺滿膠袋雜物, 真係睇唔出佢有乜貴氣. 最爆笑係佢要人舖毛巾墊住啲 LV Gucci 同紙袋.
終極怪行, 係埋單嗰陣喺 Gucci 袋攞咗 ' 棟 ' 3 吋厚嘅信用咭出嚟, 目測應該有三四十張, 仲白痴到喺人前演嘢, 逐張咭揭, 然後慢動作抽出一張遞比人轆 . 心諗, 你覺得咁好型, 人哋會羨慕咩 ?事實係, 你行咗出門口後, 髮型屋個個揞住半邊咀, 笑你囉.
沒有留言:
發佈留言