會所初體驗

 

 

托朋友鴻福, 有幸踏足西環一所標榜專為文化創意人士而設嘅私人會所.

記得上年會所開幕初期, 各界人士趨之若鶩, 一窩蜂爭崩頭趕住入會, 蔚為奇觀.  無他嘅, 自稱高級會所但門檻低, 搵兩個 member 簽紙就得, 完全唔駛幾十萬入會費, 年費二萬二, 即每月一千八百幾, affordable 啦.

會所門口

平時搭車經過門口十分好奇, 玻璃窗貼晒黑色 sticker, 入口黑麻麻, 究竟裡面係點嘅呢 ?

前晚, 終於可以一窺全豹.  

其實我覺得設計還可以, 似 Dan Ryan's x Kee Club 再 modern 少少 ( 希望設計師睇到我咁形容唔會斬死我 😅 ).  至於員工服務, 要比個 like 👍 佢, 禮貌友善反應又快, 對會所設施非常 knowledgeable.

成棟大廈廿幾層頂樓數落 3-4 層 F&B, 之後幾層 gym 同 spa, 仲有影院, function rooms, art exhibition, 遲啲開埋多層 co-working space.  不過個 club 多 9 餘, 自我感覺太良好, 話唔接受 banker, 律師, 醫生申請入會喎.  心諗, 人哋一早入晒 Golf Club, Country Club, Hong Kong Club 同 American Club 啦, 做乜要喺西環電車路同班文化創意人爭入會啫 ?

白蠟燭 ( 偷影 )

晚飯喺 28/F House Brasserie 食中餐, 但 menu 有 burger 個喎, 的確夠晒創意.  枱面仲點咗支白蠟燭, 啋 ~~ 真係大吉利是.

全場滿座, 九成半係西人, 諗住嘢食都係呃鬼佬嗰類味道啦.  點知出乎意料之外, 佢哋中餐做得好過幾間高級私人會所好多, 完全冇遷就外國人口味, 尤其個蝦多士同烤鴨, 做得特別出色 ! 非常之好食, 可惜會所唔比影相, 記錄唔到美好回憶.

蝦多士