黑狗得食 . 白狗當災

成個月冇寫 blog 因為好攰.  日日放工準時走, 冇飯局嘅話唔知點解返屋企未到 9 點就會不知不覺喺梳化瞓着, 跟住大約 11 點就會自然醒爬入房瞓, 晚晚如是.  搞成咁, 係工作環境人事壓力 : politics.

我敢講, 現職公司係過往 30 年職場生涯最多辦公室政治嘅一間.  返工主打唔係做嘢, 部門班小學雞日日拍枱嗌交爭嘢平常事, 大蝦細, 細蝦大, 人人各懷鬼胎冼人 / 篤人 / 㨃人, 就算你點唔想, 或多或少都已經被動地捲入旋渦, 每日返工 9 個鐘四周狗咬狗骨, 過得相當驚心動魄.

坐對面條女 [ 同事 T ] 初頭識落幾啱傾, 大家都係顛顛哋又鍾意飲香檳, 點知一次 happy hour 就露出港女喉擒真面目.

事原英國竹昇仔同事叫咗另一竹昇仔 friend join 我哋 : 後生 + 身高 183 + ok 好樣 + british accent + 唔鹹唔淡中文 + 教 physics = 成個 package 非常吸引, 連我呢個阿婆都流咗一滴口水, 唔怪得單身 [ 同事 T ] 立即孔雀開屏發姣求偶.  

自稱喺加拿大成長嘅 [ 同事 T ] 其實年紀唔細, 望住佢發出求愛信號扭身扭勢 " mi " 晒眼嗰種媚態, 打咗好多個冷震.  搞成半晚見條竹昇都唔受落, [ 同事 T ] 明顯加強攻勢狂飲白酒隊爆自己, 之後開口叫竹昇仔送番屋企.

搞到咁肉酸根本冇人想送佢, 班仔推莊話未飲夠要留低繼續飲.  冇風度 ? 係喎, 但又難怪, 個個住港島區, 冇理由冒險送呢 " pat " 發情中嘅物體返新界啫 ? 路程咁長, 畀條女抽水咪蝕 ?!

[ 同事 T ] 住大圍, 冇人肯送最終搞着我.  喺的士大龍鳳, 又話想嘔又話想瀨 ( 尿 ), 嚇到我同司機都好驚.  終於到達佢住嘅屋苑, 但又爛醉到講唔出自己住邊座, 跟住仲發脾氣鬧爆個司機唔識路, MY GOD !