端午彩蛋

果然噏中 !  真係話咁快就 drop out 工聯會風水班, 未捱得過三堂已經決定放棄, 因為教嗰位實在用太多篇幅去 hard sell 自己, 第一堂個幾鐘講埋啲無謂嘢, 臨尾 10 分鐘先教少少九宮飛星, ok 算, 當係 warm up.  

點知第二堂成堂播自己陳年幻燈舊片, 全部都係 N 年前大陸房地產搞風水拜神相, 內容完全同課程無關. 

華潤竹筍

最爆笑係自稱連華潤高層都聽佢建議將深圳最新大樓設計到成條竹筍咁.  真的嗎 ?

best architecture photos of 2019

跟住 show 張 [ Best architecture photos of 2019 ] 話竹筍大樓攞 CNN 最佳建築獎, 大佬呀, best photos 呀, 唔係 best architecture 囉 😂, 都唔知佢文盲定當我哋文盲.

最㷫係揼波鐘播完 slides 已經落堂, 乜 Q 風水都冇教過 !  所以我決定唔再嘥時間上佢堂.

反而原本以為好快會支持唔住嘅八字班, 竟然又 ok 喎, 阿 Sir 冇吹水教法易明, 上 3 堂派咗兩個彩蛋 🥚🥚.

🥚 ( 其實唔算 ) #1 - 阿 Sir 比咗個八字我哋即場開做練習, 計吓有幾多個 [ 沖 / 剋 ], 話呢個八字屬於一個中年學生, 佢唔介意攞嚟喺班上做 case study.  因有太多 [ 沖 / 剋 ] ( 16+ 個 ), 阿 Sir 問學生人生有冇缺失或不如意, 學生話冇乜, 屋企仲有啲家底, 揸靚車, 住西貢獨立屋. 

後尾學生再冇上堂, 阿 Sir 不以為意, 有日同班同學問阿 Sir 有冇睇報紙, 原來學生出事連人帶車衝落海死咗 😱😱😱

🥚 #2 - 尋日上堂阿 Sir 叫我哋再練習起自己個八字, 叫有 10+ [ 沖 / 剋 ] 嘅請舉手, 結果有 3 人.  跟住阿 Sir 問 : " 後面男同學, 你介唔介意分享吓你個八字 ? "  幾秒過後全冇動靜, 回頭一看, oh shit ! 阿 Sir 你搞錯咗喇, 係個身型外貌都似男人嘅 TB 嚟㗎 ! 😂😂😂

TB 大方 share 自己八字, 我冇功力完全唔識睇, 但發現佢日柱天干地支都係 [ 水 - 水 ], 屬相同五行.  放學後上網摷吓, 原來日柱天干地支屬同一五行都會係同性戀其中一個特質.