小食神

浪接浪, 又有朋友離港了, 尋晚又出嚟食 farewell 飯, 又係去好難訂嗰間 Bxxxxd.

特別嘉賓係位眼仔碌碌嘅 8 歲小朋友, 咁細個就要出嚟行, 混喺成班阿叔阿嬸中, 但似乎佢見慣大場面, 成晚一啲怯場都冇.

小朋友已經係第二次被邀請出席, 因為我哋想睇表演 😂   皆因佢對食好有天份同非常之有要求, 聽佢精準地分析菜式材料 / 烹調手法, 唔使睇你班人面色嗰種老實不客氣嘅評價, 過癮 ! 

童言無忌, 永遠精彩 !

訂位嗰個唔想用腦所以 pre-order 咗 tasting menu. 不過一睇個餐牌就唔係幾開心, 因為 5 道菜當中 3 個竟然有我最怕嘅 : 黑松露 | 番茄 | 熟帶子.

之前講過嘅 魚子醬贏在起跑線 論 http://shirliek.blogspot.com/2022/10/blog-post_28.html, 唔好意思, 今日要收回, 因尋晚碟 [ 魚子醬 . 昆布 . 天使冷麵 ] 收咗我皮 !  九唔搭八, 整 pet 魚子醬落去都唔知為乜 ?!  啲臭狐味黑松露油完全騎劫咗碟嘢, 成口油, 但一啲魚子醬味都食唔到.

跟住貌似 pizza 造型嘅 [ 日本番茄 . 布拉塔乳酪撻 ], 掂都冇掂過就直接請咗肥仔朋友食.

再嚟嘅 [ 法國黃酒 . 北海道帶子 . 鱒魚卵 ], 牛油落得太重手, 食咗一舊, 好膩, 頂唔順, 俾埋肥仔.

食到差不多尾聲, 所有成人外出呼吸新鮮空氣, 剩低我同小朋友, 乘機訪問吓佢對當晚食物意見.  佢話還可以, 但都係上次嗰間好啲 ( 果然識貨 ! ), 成晚最好食係個佢食唔飽而後加嘅薯條, 但唔鍾意啲秘製茄醬, 因為加咗 tabasco 😆 

小朋友, 服咗你, 你真係堅 !  等多 10 年應該可以同你一齊出動, 飲好嘢 🍷🍷🍷🍷🍷🍷

First Class [ 𠽌𠽌 ] 聲

前晚喺沙田搭東鐵線出中環吃飯, 諗住豪吓坐頭等, 因為係火炭車廠開出嘅吉車, 所以車上冇乜人.

下一站大圍上咗條肥仔, 行為怪異喺車廂來來回回不停調位, 最後揀咗坐我斜對面, 除鞋除襪赤腳踩上對面凳.

最憎人用腳板底向住我 😡

當刻已經覺得好嘔心, 點知加倍嘔心嘅事, 陸續有嚟. 

佢係咁用手捽自己啲腳趾同腳板底, 好似女人着完高跟鞋好攰同隻腳按摩咁. 老實講, 呢組動作係人喺屋企都會做, 但唔係喺大庭廣眾嘛. 

睇相嗰陣嚇咗一跳, 以為影到玻璃反射半身女鬼

肥仔可能有玩開 yoga 身體相當柔軟, 竟然毫無難度 bend 腳板底向住自己去搣腳皮 😆   我返屋企嘗試模仿呢組動作, 點知連屈隻腳都屈唔到.

望到攰, 視線正要離開之際, 突然聽到 [ 𠽌𠽌 ] 聲, 原來係肥仔搣腳皮唔小心搣到入肉而發出嘅痛苦悲鳴 😂😂😂

核突嘢仲包括肥仔甩褲而露出嘅灰色大底底, zoom 近影啲大特寫喺朋友圈開心 share.

神棍出沒注意

如果最近覺得淹悶, 不如等我 show 啲嘢比大家笑吓啦.

燈燈燈凳 !  💖 師傅愛你 😂😂😂

睇真啲啦, 相中揸住羅庚嗰條木咀, 係我嚟㗎 !  😆

呃呃氹氹之下 friend 做咗白老鼠, 成就我 [ 神棍 ] 嘅第一棍, 俾我幫佢新屋睇風水, 實習吓.  半桶水, 連自己都覺得自己流, 點知講咗幾個模稜兩可嘅所謂重點後, friend 竟然話中 !  唔係掛 😅

人, 真係會對號入座, 只要噏中係人類都會發生或遇到嘅衰嘢, 例如 : 人 / 寵物有病, 血光手術, 搵唔到錢, 漏財, 投資失利, 爭家產, 老婆惡, 第三者, 爛桃花, 工作唔順利, 公司生意唔好, 仔女讀書唔好, 考唔到好學校, 小人, 官司, 俾人出賣, 冇拖拍, 嫁唔出, 生唔到仔, 瞓覺成日發惡夢, etc. 

見對方有反應就打蛇隨棍上, 入晒屋企啲衰位數 [ 註 : 每個宅都分 9 個宮位 = 4 個好 👍 + 5 個麻麻 / 衰 👎 ]. 

2023 九宮飛星

跟住, 再提出改善建議, 只要語氣堅定, 就有人信. 

神棍無處不在, 例如某大師, 教新婚女藝人 5 點 [ 行房吉時 ] 較鬧鐘起身同老公搞嘢, 就可以一擊即中成功造人, 簡直荒謬 !

超級迷信嘅人真係極多, 好似我風水班有個女同學, 上堂前喺樓下等𨋢撞到佢, 見佢攞住個 30cm x 30cm 嘅盒, 以為係羅庚, 佢打開個盒攞出嚟比我睇, 原來係個巨形

八卦鏡 !  頂 😂😂😂😂😂😂😂   當刻連個看更見到都忍唔住笑, 同學話間屋對住天斬剎, 搞到屋企漏水落樓下, 所以想攞個八卦鏡比師傅開光, 震壓吓 😂😂😂

混蛋一餐

尋晚托朋友洪福, 有幸去咗西環一間號稱香港 10 大最難 book 嘅餐廳吃法國菜.  

batard 包

餐廳叫 bâtard, 好多識少少法文嘅人會叻唔切話 bâtard 係英文 bastard ( 混蛋 ) 咁解, 啱啲啲啦, 但好明顯佢哋對法國靚酒同經典麵包冇乜認識囉.

batard-montrachet 酒

餐廳地方大, 驟眼空間設計還可以, 不過睇真用料全屬低成本之作, 手工相當粗糙.  雖然係咁, 但其實都有可取之處, 就係用餐區枱與枱之間距離遼闊, 客人私隱度十足.

 

 

黃油雞之賣相

至於嘢食, 係好味嘅, 只係少咗啲 wow factor, 可能之前祈望太高吧, 尤其係招牌 

" Signature Roast Chicken, Warm pilaf Rice

( 新界走地黃油雞 . 香茅大蒜黃薑飯 ) ", 好油, 多油到成個碟底都係, 食完好有罪惡感, 真係第日做運動原地跳 1000 吓都減唔番 ! 

" Grilled Threadfin, Fennel, Sauce Vierge

( 燒馬友 . 茴香 . 初榨橄欖油醬 )  " 反而有驚喜, 魚皮一格格燒得夠哂火候啖啖炭燒味, 魚肉甘香油潤, 正 !  

另一佳作係前菜 "

Kanpachi, Seaweed, Oscietre Caviar

 ( 間八魚生 . 紫菜 . 魚子醬  ) ", 因為我從來超級鍾意同絕對不能抗拒 [ 真 ] 魚子醬, 基本上呢個包含魚子醬嘅前菜已經贏在起跑線, 不同食材層層疊, 真係唔介意一次過連吃 3 份.

飲飽食醉, 最後埋尾嘅

" Selection of Farm Cheeses from Antoine Zaruba, The Cheese House

( 簡稱 : 芝士車 ) ", 車上芝士選擇非常唔錯, $280 可以揀 4 款, 跟住仲屈到 waiter 比多隻我哋試, 即總共 5 種 ! 今次仲唔抵到爛 ?!

寬己嚴人

靜咗排冇寫 blog, 因為又走咗去上堂, 學埋啲唔等使嘢.

上禮拜三晚畢業考試, 阿 Sir 臨考前一粒鐘堂上扮同我哋 revision, 查實喺度賣大包, 暗示將會出嘅試題, 我覺得相當明顯, 至於其他同學掌唔掌握到呢個提示, 真係要睇修行同造化.

考試題目涉及頗多 ' 數據同 formula ' , 大 L 鑊要計數, 中正我死穴, 唯一生路就係儘快將啲 formula 簡約地抄喺掌心, 以作參考.  正當垂死掙扎搏命狂抄之際, 旁邊一個細我 10 年嘅人忽然對住空氣講 : " 我唔出貓㗎, 讀書嗰陣都未出過 ".

( 喂, 你同我講嘢吖 ?!  係喎, 我最鍾意出貓喎, 吹咩 ! )

一小時考試大約進行到一半, 啱啱話未出過貓嗰個拍我, 原來唔識條同 ' 數據 formula ' 無關嘅題目, 想我幫手.  

哈 ~ 呢條咁啱我之前靠死背唔使出貓都識答喎.  Btw, 唔記得話佢知, 我短暫記憶好強, N 年前會考宗教 ( 臨考嗰晚漏夜死背聖經金句 ) 攞 A 😂 .  

結果我非常大方, 成條借俾佢抄.  我想問, 乜考試抄人答案唔算出貓咩 ? 

跟住仲精彩, 考試尾段, 佢成部手機擺上枱 ( 竟然冇人發現 ), 原來𥄫緊之前影低嘅 notes, 續頁摷跟嚟住填答案 !!   

無言.

義肢出貓法 😆

假狗計算機出貓法 😁

買少見少

餐廳喺沙灘上 . 就係望住呢個咁靚嘅景

香港搵吃, 將會再少一個特色地方了.  

咁啱 4 年前嘅今日 ( 2 Sep 2018 ) 喺 ViuTV 睇到 [ 深愛著你陳百強 ] 逝世 25 周年特辑  https://www.bilibili.com/s/video/BV13W411Z7bT, 拍攝地點係間海邊小白屋, 嘉賓品嚐廚師用 Danny 曲名做靈感創作嘅紫色菜式, 精巧賣相非常吸睛.   

門口

小白屋咁鬼 romantic, 邊度嚟呢 ? 

發瘟網上瘋狂搜尋, 終於找到 - 原來私房菜餐廳位於汀九泳灘, 地點隱閉隔涉 https://www.facebook.com/www.yinyang.hk/

野生捕獲 = 蒸魚

山長水遠, 由 ( 21 Feb 2019 ) 第一次幫襯到尋晚 last visit, 總共食咗不下 20 次, 勁癲 😆   

黃土雞

係咪因為啲嘢好食 ?  For 我主要係食 location, 實在太特別 !  除咗招牌菜黃土雞同蒸魚, 其他菜式有時太實驗性, 味道有啲莫名其妙, 不過當然一定 ok 啦, 唔係都唔可能回頭翻吃咁多次.

廚師 work in progress

好景不常.

業主收樓唔續租了, 餐廳做到九月中就要暫時結業直至找到新地方......  而家喺香港真係有得食就好食, 唔好以為可以來日方長.

因為尋晚有朋友未去過, 為免喺汀九迷途失散, 都係喺市區 K11 musea 先集合再 Uber 一齊去, 出發前, 當然要隊番幾支檳熱吓身先啦, 結果 6:30pm 到達餐廳已經成肚水同好眼瞓 😂.  睇在係結業前最後一次, 靠意志, KO 晒成晚咁多碟, 全部食清晒 !  真係好飽好飽好飽, 識我嘅, 都知我食量極少, 今次真係畀足面.

香港特色餐廳買少見少, 希望佢哋可以快啲找到新舖, 再戰江湖 !

開故

又掛八號, 今年第三個 👍 , 希望堅持打到聽日 9am, 咁就可以又 WFH 唔駛返 office 了 ( 公司 policy ).

[ 流行都市 ] 主持大合照

點解 ' 又 '  WFH ? 因為今日已經 WFH 囉 😜.  趁 lunch break 睇 TVB 唯一可以忍到睇超過半粒鐘嘅 [ 流行都市 ].  

唔好笑, 雖然係 C9 節目, 但我真心覺得 ok  ( 咁我一早係 C9 年紀啦 😆 ), 除咗保健養生 / 醫學資訊, 最鍾意就係煮餸環節, 一個禮拜五日不同廚師教整家常小菜, 幾好吖.

呢期仲正, 逢星期三有蘇民峰教風水掌相, 開正我嗰瓣 ! 

就喺今日, 蘇師傅揭開咗我一個幾十年嘅謎團 ❓❓❓ : 尾指四節紋 .

我手尾指有四節 . 唔好驚 😂

 

我右手尾指有四個節 ( 左手正常, 得三節 ), 十幾歲已經留意到, 一直尋找解讀四節紋嘅掌相資料, 但搵唔到. 

記得多年前喺巴黎搭地鐵, 同坐旁邊嘅 friend 講起我尾指有四節, friend 覺得非常神奇, 立即攤開手板睇吓自己有冇, 而坐對面條法國佬, 偷聽完我哋對話, ' 射呢眼 ' 咁去𥄫自己尾指, 以為冇人睇到, 低能白痴仔 😄.

電視 cap 圖

根據蘇民峰, 尾指有四節代表具科學, 語言天份, 商業頭腦, 交際手腕.  同埋如果原本尾指太短過唔到三關 ( = 我 ), 但有咗呢條四節紋就等於一個無形 extension, 變成過到.  

吓, 咁著數 ?!  丞蘇師傅貴言 !

語言天份同交際手腕, 夾硬認應該有啲啲, 但科學同商業頭腦, 真係完全冇囉 😆 

七月十四食好嘢

今日下晝公司放暑假, 邀請個識咗好耐, 睇住我由 [ 廿歲靚妹變五十幾阿姑 ] 嘅朋友上屋企 house warming.   

住家填鴨 . 都係第一次

 

朋友都算係咁, 親自由 MK 外賣速遞成隻北京填鴨到火炭, 食到成口油, 右邊咀角仲黐住粒加料麻辣雞翼尖嘅芝麻, 忽然問咗個九唔搭八問題 : " 你而家係咪鍾意意大利唔鍾意巴黎喇 ? "  語調好似責怪我點解拋棄巴黎咁.

本能反應答佢 " 係 ! 我對巴黎已經冇咗感覺喇, 而家至愛係羅馬 😂 " 之際, 還要忍笑, 因為諗起佢晚黑有芝麻做宵夜 ( 我係唔會提佢嘅, 除非佢自己照鏡發現啦 ), 都 ok 好笑.

Bombana

疫情前一年飛幾次意大利, 而家三年冇去過, 唯有喺香港食吓意菜頂住先. 老實講, 香港大部份意大利餐廳都唔掂, 耿耿於懷, 要再數肥佬中環嗰間 Oxxxxxxm http://shirliek.blogspot.com/2021/12/blog-post_27.html, 期望愈高失望愈大, 後尾發現廚師原來係奧地利人, 唔怪得咁啦.

前晚農曆七月十四, 特別日子終於食到間像樣的了. 

餐廳走高檔路線, 主打新派意大利中南部拿波里菜, 上年九月開業起晚晚爆滿, 試咗 N 次想訂位都失敗. 早兩個月搭火車返工途中心血來潮, 上餐廳網頁見到 booking 依然都係 full 到年尾, 唯有 8 月 11 一千零一夜 8pm 竟然 available !  唔理喇, 立即落訂 book 咗先, 之後再搵飯腳.

提示 : 餐廳招牌喺左上角

 

餐廳門口招牌同幅牆一樣色, 差啲睇唔到, 設計師好嘢, 咁搞個客都 buy 😆

一定要 encore 嘅魚子醬紅蝦 tartare

 6 度菜 menu 見有魚子醬立即雙眼發光, 雖然加 $500, 但魚子份量十足塞滿晒個碟, 唔係求其喺面頭 hea 兩羹嗰種, 再攞高分係隱身於魚子之下嘅紅蝦他他, 混合甘香蝦膏, 鮮味爆燈 ! 如果可以單點, 我一定即場再叫多個, 可惜冇.

大閘青口

香港食青口有陰影, 可能用雪藏嘢, 啲人通常煮得好熟好熟, 食落似咬擦膠.  所以知道第二度菜係青口, 戴定頭盔同朋友講一陣我碟比埋佢.  話口未完侍應攞盤石春嚟, 上面擺咗幾隻未煮嘅北海道青口.  哈, 大閘蟹食得多, 用繩綁起嚟蒸嘅青口真係第一次吃 😆

青口完成品 . 醬汁無比驚喜

 

結果煮好嘅青口因為出奇地美味, 我好仆街咁反口, 冇比 friend 食 😂

好食到冇朋友嘅羊

個人口味而言, 全晚滿分一定係羊架 + 里脊肉, 人生好似冇乜幾次食到嫩口得嚟又咁有肉味嘅羊, 真係要畀一千個 like !