虎父無犬子

前日比 IT 同事笑我搵命搏, 話 office 同座三日出現兩單確診都仲返工, 比佢一嚇當堂有啲怯, 決定嚟緊嘅日子 WFH 算喇, 橫掂 HR 話可以.  大佬, 打份工啫, 無啦啦俾人迫去強檢就好唔抵. 

之前提過唔太享受 WFH, 好 free 嗎 ? 幾嘅, 但一日到黑對住個 mon 開會講嘢, 真係人都癲眼都盲.

疫情爆成咁, 睇怕至少都要 WFH 到二月底三月頭.  同好多人一樣, 成日踎喺屋企冇嘢好搞自然就會廚神上身煮番兩味, 今日整咗塊見得吓人嘅 sirloin, 正當煎好 rest 緊塊扒, 行出廳等候美滿成果之際, 聽到樓下好嘈, 我咁八當然第一時間衝去騎樓𥄫吓.

嘩 ~ 係我最鍾意睇嘅嗌交呀 😆 !! 

 一對中年男女 [ 黃圈 ] 為啲𡃁仔喺屋苑平台踩單車嘅問題吵大鑊 ( 男人應該係其中一個嘅老豆 ), 殺聲震天, 黑衫肥婆個老公好嘢 [ 桃紅圈 ], 企開 10 呎隔岸觀火. 

除咗我, 火爆場面亦吸引不少樓上住客齊齊睇 show [ 紅箭嘴 ].  講真, 條佬好唔掂, 肥婆其實都行開唔想再嘈, 佢仲追住人一路大吵大鬧, 講埋啲爛到震嘅英文, 什麼 : " Shame for you ! ", " Why you not apologize ! " 唔係撩交打係乜 ? 比著我係肥婆都再同佢死過啦.

激烈嘅一刻值得拍片留念, 影咗大約兩分鐘比條細路發現, 走去同佢個正在吵到手舞足蹈嘅老豆報寸, 跟住成班人望上嚟見到我鏡頭對住佢哋, 就突然四散.

一切回報平靜不到 10分鐘又傳來吵鬧聲, 原來肥婆搵埋老公趁人哋老豆行開咗, 走去凶人個仔, 秋後算帳 !  哈 ~ 有老豆身教, 條𡃁仔一啲都唔弱, 雙語並用句句頂到行不特止, 仲叫埋幾個 friend 幫拖同肥婆對駡添, 最後肥婆不敵, 無癮離開.