無敵午飯

尋日約咗同樣中完招啱啱出關嘅朋友食晏, 大家咁高咁大, 唔怕邊個傳染邊個. 

地點係大埔紅林路嘅 Le Vow ( 金鷺湖 ) 中菜, 以前搭火車經過見到白鷺湖邊座白色建築覺得好靚, 而家終於得償所願揾到人同我顛, 入內一窺全豹.

餐廳設計我比 like 👍 :  簡約, 明亮, 地方寬敞, 落地大玻璃, 樓底高空間感十足.

食物主打手工點心同鑊氣小炒, 我哋叫咗玫瑰金蝦餃, 鮑魚海鮮煲仔飯 ( 我唔食鮑魚呢, 但我 friend 想食 😉 ) 同脆皮鷄, 三樣味道都好好. 

新界地方, 食客果然係比較自我隨性, 進食期間隔離枱條冬菇頭肥仔喺地上爬嚟爬去, 佢阿媽都只能用勸喻方式叫佢起身, 因為條肥仔實在太重, 我見佢媽試過想扯起呢條發力中嘅肥仔, 但徹底失敗, 完全扯唔起 😂

右邊肥仔剛剛表演完, 左邊一枱嘅阿姨已經急不及待露股, 正在 ' 孔雀開屏 ' 中 😱😱😱.

心諗, 張櫈質地唔通真係有佢特異之處, 搞到阿姨要毫無隔膜地打真軍, 同佢埋身肉搏 ?

磨爛蓆坐到人哋六點關門, 既然一場嚟到喺餐廳附近四圍行吓.  哈, 嗰啲就算已經開到水尾嘅鬱金香都仲 ok 靚喎, 唔怪得早排咁多人嚟打卡啦.  

餐廳旁邊有花店賣鬱金香, 我都買咗盆, 趁吓熱鬧.