上海食力

上星期二, 終於可以親身到訪 LV 上海嗰隻鐵皮船 [路易號], 上艇食個漂亮飯.  

個人覺得隻船外觀奇醜, 好彩只係臨時建築下年就拆, 當地朋友話唔知係咪咁啱得咁橋, 自從隻 [路易號] 落 "地", 上海市區一落大雨就不停出現大水浸, 之前唔會個喎 😆 

餐廳訂位食飯可免排隊參觀埋 LV 展覽館, 瀨都瀨嘞, 又唔使錢, 順便睇埋吧  (車~~ 去到根本都冇人排隊 😂 ). 

LV 在線客服建議客人用餐前預留 30-40 分鐘時間參觀展館, 我專注力缺乏, 諗住快閃 10 分鐘打幾個卡就算, 點知入到第三展廳 "溯源 The Origin" 門口, 就比個靚女導賞 mark 實, 落力介紹啲 LV 古董篋淵源.  

心諗, 大鑊喇, 實有排玩 😬  同場成 30 幾人, 為何偏偏選中我?!  打算同靚女講, 我其實喺 LV 做過 10 年對品牌非常熟識, 叫佢過主搵第二個, 但咁講又好似唔係幾好, 辜負人哋一番熱誠. 

結果最後乖乖聽晒女導賞對幾十隻篋逐一介紹, 仲同佢互動交足差不多 30 分鐘戲, 算係咁 lu 掛. 

哎吔, 比個展覽殺個措手不及, 搞到大遲到, 嗱嗱林跑上 3 樓餐廳, 好彩朋友仲未黑面 😛 

餐廳疑似係郵輪主題設計, 不過成世人未上過郵輪, 所以都唔太肯定. 又或者呢啲就係而家所謂嘅 "潮奢" 風格?  哈, 咁我一定唔潮啦, 因為我覺得餐廳環境同氛圍其實好老餅, 仲係阿伯嗰隻.

可幸員工服務同食物水準相當一流, 俾到真正 fine dining 質素, 呢間係去過嘅 LV 餐廳中 (巴黎.曼谷.上海) 至全面 ok 嘅. 

去得 LV 食大部份人主要目的都係打卡, 咁呢方面應該冇客人會失望, 因為枱面杯碟碗筷都印滿 LV monogram, 連飲酒侍酒師話隻杯都有得揀 : 刻晒 logo 款同冇 logo 嘅正統酒杯, 咁梗係嚟個 LV 全套沉浸式體驗啦.

因為主打飲酒, 我哋只係叫咗少量食物:

1) 魚子醬牛油果吞拿魚 TACO - 巨好味 ! 

2) LOUIS HAO 路易號 鯛魚薄切 - 味道屬正常發揮, 但擺盤就真係靚到無話可說 💖

3) 帝王蟹意粉 - 叫嗰陣冇乜祈望諗住都係意粉一碟, 點知成晚最驚艷原來係呢個, 意粉掛滿由蟹熬製嘅濃汁, 鮮味滿溢, 啖啖帝王享受.

4) MONOGRAM 義大利餃 - 牛肝菌菜肉餃, 綠色 monogram 餃皮蒸到變晒形有啲樣衰, 但中西合壁嘅味道又竟然得喎.

望見隔離枱食緊 LV 暗花造型法式甜點, 靚到不得了, 可惜我哋都唔係甜食鐵粉所以冇 order, 臨走前走去甜品 counter 打個卡當食咗.