勇闖南半球

同英語系國家無緣, 無論身邊有幾多竹升 ( ABC / BBC / 加燦 ) 朋友, 都引唔起興趣走轉澳紐美加.  咁多年, 來來去去都只係去過英國咁多.

唔好問點解冇去過美國, 識我嘅都知我同美國有仇.

加拿大 ? 未曾相愛已無情.  所有相熟 CBC 知我脾性, 叫我信佢哋千祈唔好去加拿大, 話我去到一定發火.

剩番澳洲, 唔知點解, 真係冇諗過......  澳洲三寶 ( 烏蠅, 肥婆, 醉酒佬 ) 全部冇興趣, 半個國家都係中國移民, 去嚟做乜.

多年嚟嘅堅持, 前幾日終於失守, 避無可避, 要到 Sydney 出差三日兩夜. 


第一次踏足澳洲, 感覺 ok, 機場海關關員 check 完 passport 竟然同我講 :  " xx ( 我英文名 ), welcome to Australia ! "  😱😱😱 受寵若驚, 成世人過 N 咁多次關, 真係未試過有人歡迎我.

搭的士仲好笑, 一上車, 司機 say hello 之餘, 仲會加句 how are you ( 即 : hello ~ how r u ? ). 

細個學英文, miss 教要有禮貌, 人哋問 how are you 一定要答 I am fine ( 就算當刻唔老黎, 都要話 fine ), 答完仲要加句 and you 問候番人. 咁究竟我應唔應該問候司機呢 ?

𥄫吓澳洲同事, 原來佢哋回番句 hello 就算, 冇人會再答 I'm fine and you 囉.   < 認真便輸了 > 呢句, 果然有道理. 

做完野,  同事提議去 Bondi Beach happy hour, 的士司機介紹話飲野去 Icebergs Club 啦.  果然冇冼我哋, 去到 Icebergs 不禁 " 哇 " 一聲嗌咗出嚟.  他媽的, 點解可以咁靚㗎 !  啲海水會湧入個泳池咁搞野都得 ?!

飲住白酒, 望住個邦迪海灘, 吹吓海風, 真係好 heah, 去旅行嘅感覺出晒嚟, 如果再有生蠔食就一流喇.

雖然唔係生蠔超級 fans, 一場嚟到, 冇理由唔食番打 pacific 同 sydney rock 掛. 

哈, 又真係幾鮮幾好味喎. 






一路食, 一路諗起個超級鍾意食生蠔嘅 friend, 平時自助餐佢閒閒地都食幾十隻, 如果佢喺度見到呢啲好野, 一定失控食過百, 壯陽得滯, 爆偈 😆

第二朝開完會未夠鐘上機, 嚟個另類行程, 走咗去魚市場行吓. 大橋同歌劇院呢啲, 搭車遠睇就得啦, 行咁近反而乜都睇唔到.

 
魚市場唔喺大街大巷, 但好易搵, 因為有魚腥 GPS.  都未行到, 已經飄嚟陣陣濃烈腥味, 當刻立即諗起個勁怕腥嘅朋友, 對佢嚟講, 呢個地方會係人間煉獄, 下次見到佢, 一定要警告佢去 Sydney 唔可以行近 fish market 同附近周邊.

果然係華人當道, 市場告示中英對照, 生猛海鮮.  

即點即蒸我就冇興趣喇, 身為魚生刺身怪, 見到嗰啲又平又靚勁新鮮嘅龍蝦海膽生蠔, 心如鹿撞.  

最頂癮係 fish market 裡面有間酒舖, 可以買酒坐低一路飲一路食, 可惜 bad timing, 有得睇冇得食, 冇理由晨早溜溜十點幾食魚生㗎. 

大佬, 簡直係折磨, 真係好想食呀 ! 唉 ......   

啲人見到我望住啲海膽發呆而又好遺憾嘅樣, 實以為我痴線.

鞭鞭有力

洪崖洞

前晚, 去重慶名勝天空之城 - ' 洪崖洞 ' 裡面嘅 < 小天鵝火鍋 > 打番個重慶邊爐.

7 點半出發, 同行啲佬刁僑扭擰, 剷極唔郁, 加上截唔到的士, 去到 < 小天鵝 > 竟然成 9 點鐘, 誇張搞 L 錯 !

一坐低服務員仲緊張過我哋, 想我哋快啲落 order ( 點解 ? 因為怕我哋食到好夜, 阻住收工嘛 ).

好趕咁叫咗 menu 上嘅所有肉, 點知啲佬秒殺, 話咁快食完要追加, 好想食但又冇人肯揸主意喎.  

咁, 唯有我拍板, 替天行動.  

要肉 / 慾吖嘛, 益吓大家, 整碟好野.

 



見到牛鞭開花嘅造型, 啲佬非常 / 極之好奇, 竊竊私語 .......

呵 ~ 原來全枱人得我咁前衛, 以前食過牛鞭 😝

女人之家, 當然唔會同男人爭牛鞭啦, 只係食咗半舊.  但同枱竟然有人一試鍾情, 做大股東 ' 拍 ' 咗成條 !  
心諗, 佢今晚大劑, 必定發老姣.

我就冇發姣, 但第朝瞓醒起身落床嗰吓, 突然流鼻血, 真誇張.

下晝去到工地, 八吓其他人昨晚有乜反應, 有人話半夜瞓瞓吓出汗熱醒咗 😜    然而 chur 咗成條牛鞭嗰位, 竟然話乜都冇發生. 

No way ~ 我唔信.

好行夾唔送

人有時總會認吓叻, 稍有深度嘅, 就算自己真係叻, 唔會四圍講, 或者去做啲行徑展示自己點叻.  但有啲笨實, 唔知點樣竟然會認為自己真的比別人優勝, 態度囂張大支嘢.

我公司隻馬無疑係醒目仔一名, 工作能力係有啲, 但距離叻, 仲有十萬九千里.

先講語言能力, 唔識外語都算, 連廣東話都可以講到鬼食泥, 一舊舊.   大學生, 你啲將 ' the '  讀成  ' Durrrr ' 咁鬼難聽嘅英文, 喺邊差度學㗎 ? 平時寫 email 鬧人長篇大論, 點知一開口見光死.

完美主意, 對別人要求嚴苛, 亦覺得自己做事無可挑剔.  可惜事實唔係囉, 其實你平時勁多錯漏, 不過見唔係大鑊, 隻眼開隻眼閉啫.  有兩次比你跣鑊甘忍唔住出聲, 第一次唔睬我;  第二次發老脾, 否認自己做過, 仲話指證佢嗰個人飲大咗屈佢 👀   好心你男人之家, 比啲氣量出嚟, 認吓衰啦.

論工作技能, 好似唐英年話齋 : " 你 ! 呃 ! 人 ! "  
見工嗰陣, 明明唔識電腦繪圖 (autoCad) 又扮識, 點知入到公司就話個 software 有問題, 裝成 3 個月都裝唔到.  後尾發現條友拖字訣, 根本都冇配合 IT 去裝個 software, 因為驚人識穿唔佢識用囉.

冇禮貌 !  最㷫就係一月派 bonus 加人工封信嗰陣, 唔該都冇聲攞咗起身就走. 屌, 欠咗你咩 ?!  以你 so-so 嘅學歷 ( 2nd-class honours 畢業 ) 同年資, 攞咁嘅人工, 執到啦.   公司搞合併, 我人工加雞碎咁多, 就算點不滿, 都有同老闆講 thank you.

街外啲人同我講條友周圍唱話份工 好大壓力, 成日飛, 好多嘢做, 好多 politics 嗰陣, 情不自禁爆咗句粗.

• 好大壓力 : 大中華區 2017 年 20 個 projects , 你睇得嗰 4 個, 大壓力 !

• 成日飛 : 1 年先出得嗰 5 個 business trip, 咁都叫多 ? 你係咪將自己 1 年飛 4 次日本嗰啲私人 trip 都入埋公司數先 ?

• 好多嘢做 :  挑 ~ 咁多嘢做, 日日 5 點半又可以準時放工 ?

• 好多 politics :  不知所謂, 又唔係高層, politics 有你份玩咩 ? 

所以, 佢 6 月頭劈炮嗰刻, 完全唔 shock, 仲開心到差啲滴咗滴眼淚出嚟.   

一坐低, 強調未揾工唔係跳槽, 咁即係裸辭啦, 既然咁想走, 講多無謂, 我嘅回應只係呢兩句 : " 估到啦 " 同 " 你通知期係咪 3 個月, 幾時 last day ? "

抵死 !!!!

完全冇問佢做乜要走, 咁全行都知道點解啦, 好大壓力, 成日飛, 好多嘢做, 好多 politics 嘛.


留佢 ? 更加唔駛旨意 ! 我冇興趣, 而公司亦都比唔起更高人工.

佢比我咁冷漠嘅反應殺過措手不及, 面上一副錯愕表情.


跟住 3 個月, 基本上當佢透明.  車 ~ 都撇啦, 唔通再同你相討發展大計開啲新 project 你做咩 ?  點知佢同人講, 話我 ' 忽略咗 ' 佢.   挑喇星 ! 有病.

要求佢喺走之前同新同事 briefing, 人哋未正式上工都肯嚟 office 提早做 handover, 但條友竟然隔日請病假, 又唔通知人, 擺明玩嘢想人白行一趟, 咁賤都得.

同人噏三噏四, 話我唔比打的 ( 詳情見下 ), 人哋如果唔係一早識我, 知道我為人, 分分鐘會以為我真係好刻薄.

• 條友有次去東涌開會, 竟然喺黃竹坑 office 打的, 成 400 幾蚊, 咁簽單嗰陣當然哦咗幾句, 叫佢下次搭 mtr.  但最終都有批, 佢收足錢㗎.

• 另一次就係出 trip 搏大霧, 喺大埔太和屋企飛的去機場, 來回成七舊幾八舊水, 離譜咗啲嘛 ? 咁我當然唔批啦, 因公司 travel policy 寫明香港去機場唔可以搭的士嘛 (自己都唔 claim 啦), 就算我簽佢都一定比 finance department challenge.
  

估唔到條友懷恨在心, 咁小器, handover 都不忘中傷我.  

星期五 last day , 無啦啦又同我重申 : 仲未搵工, 想唞吓先. 
挑 ~ 話之你吖 ! 


不過如果真係以為自己好叻, 要執著喺出面攞番而家份人工, 應該可以有一段好長日子你唞.

T10

皇天不負有心人, 今日 2017 8月23, 終於轟轟烈烈, 打咗場 10 號波.

同好多打工仔一樣, 最開心就係唔駛返工. 

今朝起身, 感覺好 fresh, 真係好耐...... 好耐...... 好耐...... 都未試過會 " 期待 " 一日嘅開始.

通常朝早唔係趕返工就趕騎馬, 今日難得乜都唔駛做, 毫無壓力, 慢動作上網, 煮咖啡, 望住窗外風雲色變, 狂風掃落葉, 突然覺得好自在, 同時又好 hyper. 

精神分裂咗陣, 啲 whatsapp 就嚟喇, 應該有人覺得我唔可以自理, 竟然關心我屋企有冇野食. 

搞錯呀, 第一日識我 ? 我有酒飲就得㗎啦 😂.  如果餓, 成屋成雪櫃都係罐頭雪藏野殭屍肉 ( 講笑啫, 都有啲新鮮食品嘅 😜 ) , 一日 3 餐食10 日 8 日 no problem.

天鴿破壞力不小, 可能天文台近期放流料太多, 搞到大家掉以輕心. 

其實比起公司啲亂, 天鴿都唔算啲乜啫, 自從屎淋尿瀨趕住合併之後, 基本 office 日日都係惡劣天氣.



講完又講, 都覺得自己口臭, 但公司啲 cheap 法又真係陳出不窮, 有排寫.

唔好講人, 講吓自己.  

八月頭, 老闆召我入房, 原來係講加人工啲野.  自己太天真, 認為公司炒晒對家成條 team, 比晒亞太區啲屎我哽, 就算唔比埋人哋份糧我, cheap 極起碼都加 20-30% 掛.  

睇到封信嘅銀碼, 打咗個突, 屌, 管理成個大中華 + 亞太區, 加得個單位數 😡 ?!  唔係嘛 ?  XYZ@#!!!  當刻腦海一片空白, 跟住老闆噏乜, 一啲都再聽唔入耳.

當晚立即收到 HR 電話, 原來我不經意流露咗個非常唔 likey 嘅表情, 所以想第二朝面談, 化解怨氣.

化解 ? 同 HR 講, 如果唔係啱啱撬咗隻舊馬入嚟公司做, 要對佢負責任, 今日你應該已經收到我辭職信 !

迫虎跳牆, 唔同你間 cheap 公司客氣, with immediate effect 將蛇王行動升級, 目標為 :

每星期至少 1+ 天 x 4星期 = 每月少返 4+ 天.

咁樣嘅話, 就可以 adjust 加薪條數去到10% 以上.

離婚 DNA

上星期日下午無無聊聊, 開電視睇奇妙 77 台, 播緊翻炒幾年前有線黎燕珊主持嘅 < 往事‧並不如煙 >, 嘉賓李司棋.

 
原本對司棋姐冇乜特別感覺, 唔鍾意又唔憎, 只覺得比起同期無線花旦 (汪阿姐 / 黃淑儀), 佢係最 keep 唔到, 走樣走得至勁嗰個.

不過睇完呢個訪問, 對佢印象完全插水 !

第一任

第一段婚姻 :  老公有第三者.

佢話 : 「當年搞移民, 自己去加拿大坐移民監, 老公就喺香港有新歡, 佢要離婚, 唔通要我跪低求佢咩 ! 」






四十幾第二嫁 :  識咗人冇耐就𦧲結婚, 原來係貪人 有錢靚仔 ( 自相矛盾 2 , 見下 ) 同驚自己會孤獨終老.   

幼稚兼自私 !

第二任

結完婚, 老公對朋友仲好過對自己, 個個 weekend 寧願喺公司 '吽' 都唔返屋企陪佢 (哈 ~~ 咁得意 😅) , 覺得大家生活步伐不一樣, 所以怒斬 3 年情.   

話自己喺感情呢方面好灑脫 , 唔開心就分開 ( 自相矛盾 1, 見下 ) .

第一任

訪問下半部, 講個女葉子青.

一直反對佢入行, 但個女一意孤行, 堅持返香港發展, 搞咗陣, 竟然又話要退出返加拿大結婚.  

點知, 幾年貨仔就鬧離婚.  


司棋姐話當時發火鬧女, 話兩夫妻相處唔可以話離就離, 點都要忍 喎 ( 自相矛盾 1 ).

第二任

啋你都傻, 個女當然係離婚啦, 你忍唔到做乜要我忍 ?


End up 第二次再嫁, 都係離婚.  








就報章訪問, 對個女兩段失敗婚姻, 司棋姐為自己曾經歷的兩段婚姻感觸, 話 :「 兩人相處一定要有愛, 並不是 以錢或心急有個家庭 ( 自相矛盾 2 ) 而結婚. 」

唉吔, 你有乜資格講呢啲......  可能你個女同老公生活步伐不一致呢 ? 又或者佢老公有外遇要同佢離婚呢 ? 你就得人哋就唔得.

想法同做人都自相矛盾, 個女學足你囉 !

爭櫈仔

真係精神虐待, 差唔多成兩個月, 公司都仲未正式公告留得低嘅人會點搞.

最差就係, 被裁嘅, 連幾時先走得都唔知, 公司一未拖字訣.  

係就係, 唔係就唔係囉, 做乜要喺度拖泥帶水, 浪費時間, 燃燒人哋所剩無幾嘅青春啫, 變態 !


兩個 office 合併, 搵着我嚟搞, 坐開 40 幾人嘅地方而家要塞成 70 幾人入去, 淨係要踱掂個劏房 layout, 已經死咗好多細胞.

我計過喇, 平均呎數由每人 200 sq.ft. 下降至每人 137 sq.ft. -->  縮水 3 成多.

仲有個 toilet, 因為同事習慣喺屋企有屎唔屙, 留番喺辦公時間大解, 以至朝早返工 / 食 lunch / 放工前後, 呢啲所謂 peak hours , 廁所一定迫滿人.


原本已經𢺳車邊, 而家仲突然加多 3 成 " 屎 " 用率, 我怕呢座甲級工廈嘅排污系統頂唔順, 穫利回吐, 廁所噴番晒啲屎出嚟.

講番啲部門阿頭, 由見到個坐位表嗰刻開始, 就個個都好有意見, 人人都要坐靚位, 死霸爛霸, 連 store room 都有人爭.

坐邊度, 其實都係老闆欽點㗎啦, 不過有啲人又真係唔知自量, 係都要划爛塊面走去同老闆 lur, 話自己個部門有乜乜物物價值, 要擺喺啲 dominant 嘅位置, end up 答案當然係 NO 啦, 自討沒趣.

啲有坐到好位嘅人, 竟然又要眼紅人喎, 話某人之前都係坐 general office 之嘛, 點解過到嚟呢邊會有房坐, bla bla bla......

妖, 人哋坐唔坐房關你 L 事, 你冇聽過乜野叫 "大躍進" , "升呢" 咩 ?

唉...... 而家先至係開頭, 遲啲知道啲櫈款有分別之後, 一定又嘈到拆天, 集體爭櫈仔 !

哈利路亞

自從 4 月公司縮皮, 取消放工由黃竹坑鬼地方 -> 新界嘅 shuttle bus 後, 我返歸嘅途徑, 只有 3 種 :

1. 老闆唔喺香港, 又冇乜 urgent 野 = 唔返工 ---> 根本已經喺屋企, 所以唔需要搭車返屋.

2. 老闆喺香港, 但冇 urgent 野 = 返工 ---> 喺上午出盡飲奶之力做晒啲野, 食完 lunch 如果冇乜特別事, 3 - 4 點提早走人, 天氣 ok 就搭巴士 + 火車再轉小巴, 唔好就直接打的或 call uber.

3. 老闆喺香港, 又有 urgent 野, 比人 chur 爆 = 返工 ---> 搞完啲屎就 9 秒 9 call 的或 uber.

一句講晒 : 鬼地方不宜久留.

另有例外情況, 就係有 project 喺香港, 咁就可以完全唔駛喺 office 蒲頭, 幾日唔出現, 攞正牌出去開會 / 落地盤.

不過要補充, 踩地盤唔係咁過癮, 又熱又焗又臭又污糟又嘈又危險又多佬. 我哋做客, 一日落去個幾鐘, 已經覺得係人間煉獄. 諗吓要成日喺嗰度趕工嘅人, 賺嘅絕對係辛苦錢 .


今日喺 ocean terminal 開完會, 滂沱大雨, 當然要儘快返家, 唔通仲返工咩.

喺尖沙咀鐘樓的士站排隊, 的士貨如輪轉, 前面啲客一車接一車. 點知輪到我, 車上面嗰一男一女茂里, 你推我讓爭找數, 又跌錢又執錢, 比完錢先問司機攞單, 搞咗成分鐘都仲未落到車.

上到車, 司機目露凶光, 唸唸有詞, 開車嗰陣, 響咗好大吓按, 以示不滿. 當刻心諗, 如果我發明一種響按, 唔係 " bip ~ " 而係好大嘅 " 屌 ~ " 一聲, 喺香港必定大賣.

可想而知, 由尖沙咀行到佐敦, 司機當然就係繼續大罵嗰對男女, 話真係想一腳 "申 " 佢出去 😂.  鬧咗陣, 突然轉主題 : " 女人惡唔緊要, 最緊要唔好惡加蠢 " , " 我老婆就係咁喇 ! "

佢話佢又蠢又惡嘅老婆成世做得最叻嘅事, 就係 30 年前呃到佢結婚 😆.  話嗰陣拍咗 3 年拖, 仲要乜都冇做過, 但又覺得拖咗人哋 3 年, 所以結婚, 好後悔.

老婆成日鬧佢, 因為唔抵得佢叻 : " 邊有女人唔鍾意自己個男人叻㗎 ?! " 😂😂😂.   笑爆咀, 正當想問佢有幾叻, 司機已經早有準備, show off 佢 samsung galaxy note 裡面嘅一連串圖像, 佢所謂嘅 " 功績 ", 有 mark up 咗嘅道路交通圖片.



佢話呢 30 年嚟奉獻咗自己嘅時間精力同金錢, 做義工監察香港交通, 不斷向運輸處提交改善道路嘅方案, 減少塞車, 點知好多時運輸處偷咗佢啲橋, 打完齋唔要和尚, 唔肯比番個 credit 佢.

同議員投訴, 啲人揸流灘, 回封 photocopy 再 copy 反覆影印 N 次嘅確認信比佢就算.

仲話去申請最傑出義工獎, 因為唔係慈善團體, 不被接納, 所以佢會向申告專員投訴, 討回公道, bla bla bla...... 省下數百字.

初頭都有回應吓佢, 後尾愈聽愈唔對路, 我直情唔出聲, 由佢自己噏. 點知佢又真係可以好似開咪做電台節目咁, 繼續唔停鬧足 20 分鐘 !  怨氣甚重, 仲一路開車一路搞部 galaxy note, show 啲政府部門嘅回信比我睇.

當時諗, 萬一條友突然激動發癲, 我可以點樣自救呢 ? 答案係 : 自求多福.

好彩最後都安全到達目的地, 真係哈利路亞 !