Horsey is fun

2019年6月12日星期三

偽書卷

一年一度又要單拖出 trip, 為咗唔想覺得空虛, 寂寞, 凍 😂, 每次都會 set 個主題, 令自己有啲細藝. 2018 < 遊花園 >; 今年 2019 : < 圖書館 >.

對圖書館冇好感, 除咗 ' 書書 ' 聲唔老黎之外, 我都唔鍾意睇書. 仲記起 Form 6 喺學校圖書館無啦啦比條八婆老師喪鬧, 為乜春唔記得喇, 應該都係我哋胡鬧嘈親人之類. 但 4 個人一齊有份嘈, 條八婆唔知點解凈係向住我一個發炮 ! 痴孖根, 變態.

網上資料搜集, 原來歐洲有好多靚圖書館, 鎖定目標, 巴黎參觀 4 間, 羅馬 3 間. 點知去到巴黎, 先發現原來係法國假期, 所有圖書館關門, 而第二天亦一早訂好票做另外嘅事, 所以臨時取消圖書館行程, 去咗個結果令我非常滿意嘅景點.

到羅馬有啲忐忑, 唔知圖書館比唔比外國人入呢 ? 個樣咁老, 又扮唔到留學生去做 research 寫 thesis 😆.

BIBLIOTECA CASANATENSE . 一條友玩晒 👀

去到第一間 ( Biblioteca Casanatense ), 同門口職員打個招呼就掂行掂過, 點知被截住, 問我做乜, 我話 : 想入去睇吓...... 跟住佢講咗一大抽意文, 內容大致係要等一個人返嚟. 哈, 咁得意 ? 喺門外張櫈坐咗陣, 果然有個學者 look 嘅人出現, 帶我穿過好多間房後入咗個靚到令人 0 咀嘅 hall.

館內所有物品都有 475 年以上歷史

原來呢個地方雖然係圖書館一部份, 但絕少對外開放, 我唔知行乜運, 竟然有幸一窺全豹, 仲有學者介紹歷史典故, 可惜講解好深, 淨係聽得明兩三成 😅

BIBLIOTECA VALLICELLIANA . 樓梯

去到第二間 ( Biblioteca Vallicelliana ) 比人彈鐘, 話館裡面做緊 setup, 叫我下晝 5 點再去.

哇, 係咪堅㗎 ? 唔好等我 5 點山長水遠返轉頭, 你先話都係唔開喎.

DETAILS OF BIBLIOTECA ANGELICA

BIBLIOTECA ANGELICA

咁唯有先去第三間 ( Biblioteca Angelica ), 嗰度管制比較寬鬆, 無掩雞籠, 自出自入.

面積小樓底高, 書架有三層, 眼見個二百磅肥婆擒咗上三樓騎樓行嚟行去, 心中暗驚, 怕啲古董木承受唔到重量, 啪一聲爛咗飛埋佢落嚟, 壓親人就大鑊.

終於 5 點, 走返第二間睇吓乜料, 門口個人見我真係走番返嚟, 同我單咗吓眼 😜 就開門放我入去, 裡面烏燈黑火, 未見過咁暗嘅圖書館.

BIBLIOTECA ANGELICA . LOCAL ARTIST EXHIBITION 開幕酒會 😭😭😭

有記者, 又有著得好高雅嘅人士, 後尾發現, 原來我身在一個 local artist 展覽嘅開幕酒會囉, 門口個人真係大整蠱, 見啲人開始眼望望, 快閃影幾張沙龍, 心虛, 走人 !

2019年5月10日星期五

虫之恐襲

又有嘢估...... 圖中呢兩樣係乜呢 ?

1. 短小銀色 : 點蠟燭用長條型火機

2. 又長又幼 : 用嚟固定蘭花嘅鐵支

而家落喺我手上, 除咗原有用途, 佢哋已經被 add value, 成為殺戮工具.

廣翅蠟蟬

唔知搞乜, 今年騎樓植物比 < 廣翅蠟蟬 > 騎劫. < 廣翅蠟蟬 > 外形奇特, 幼蟲同成蟲長相截然不同, 完全兩個 form.

白色蜘蛛狀幼蟲幾廿隻密集式爬行, 食晒啲葉, 搞到棵桂花光禿禿. 上禮拜忍無可忍, 諗住攞水槍掃射, 點知佢哋竟然識閃, 光速彈開, 無耐又彈返番嚟.

啲成蟲 ( 娥 ) 夜晚飛入屋, 喺光源附近爬嚟爬去, 都算 ! 最㷫就係躝喺電視機畫面上阻 Q 住晒. 其實可以閂窗, 不過呢排天氣涼浸浸, 夜晚微風陣陣勁舒服, 冇理由閂窗避班仆街.

桂花原本好茂盛嘅葉比啲 PK 食晒

尋日下晝賦閒在家, 望住啲白色蟲喺棵已經近乎全裸嘅桂花上爬嚟爬去, 好㷫之餘忽發奇想 : 用 🔥🔥🔥 燒 !

長型火機, 火喉適中唔會太大燒到啲葉, 修長身型隊到埋身先撻 🔥, 唔怕打草驚蛇, 呢招 100% work, 完全殺佢哋措手不及. 入夜嚴刑侍候, 所有飛入屋嘅成蟲比哂機會趕走, 堅持留低者就閂窗攞 🔥 逐隻燒.

好變態 ? 幾㗎, 不過信不信由你, 如果唔係咁殺一警百, 今日就唔會連一隻都冇出現.

紫雪花快高長大 . 可惜有蟲

咁支長鐵支又點用呢 ?

除咗 < 廣翅蠟蟬 >, 另一盆棵紫雪花亦被我呢世人最怕嘅 < 毛蟲 > 侵襲, 早幾日起身淋完花, 啲蟲就會爬上啲花嘅最尖端, 雖然每日只出現一兩條, 但諗起實際上蟲嘅潛在數量, 實在毛骨悚然 !

迫於無奈, 出盡小宇宙攞屋企長形雜物將眼見嘅蟲拍走, 又因為距離極近, 拍嗰陣, 真心好驚好驚好驚啲蟲會反彈埋嚟, 跟住成日仲 ' 形 ' 住有蟲爬咗上身.

後來諗起 office 有支 3 呎長鐵支, 嗱嗱聲攞返屋企. 支嘢咁長, 而家冇有怕, 伸長手唔駛企出騎樓, 遠距離都已經可以拍到所有枝葉.

支嘢, 多謝你呀.

2019年5月7日星期二

Bon Appetit

好耐冇 update 公司怪事, 同圖中 4 件物件其中一件有關...... 係乜春呢 ?

開故 : 右下角灰色有 waste 字樣嘅 " 嘔袋 ".

***** 將會食飯 / 食緊飯者 . 慎入 *****

今朝返工坐低冇耐, 兩位 HR 同事九秒九衝入我房. 心諗, 咁趕係咪炒 ? 係就快手賠錢立即走人, 點知又唔係, 原來係派嘔袋, 每人一個.

攞住一大疊嘔袋晨早溜溜四圍派 😆😆😆😆, 問佢哋搞乜, 最初支吾以對, chok 多兩嘢, 終於爆料, 話呢排 office 有人成日嘔.

吓, 成 ~ 日 ~ 😱😱 嘔 ????! 以前細路返學啲同學仔就會啫, 乜而家返工都會咁嘅咩 ?

追問下, 目標人物出現 ( 下稱 < 嘔人> ), 嘔唔係問題, 但 < 嘔人 > 嘔得特別衰格, 女廁馬桶唔嘔, 係都要嘔落旁邊個 M 巾桶度, 仲要唔係一次半次. 清潔阿姐投訴多時, 結果星期一爆鑊忍無可忍, 話如果再整多一次就劈炮唔撈 !

阿姐咁㷫, 皆因 < 嘔人 >上禮拜五 office hour 後又嘔落 M 巾桶, 但因清潔時間已過, 嗰啲 " 嘢 " 就喺 weekend 發酵, 乾涸...... 結果, 星期一阿姐返工, 一開廁格門完全比眼前景象同臭味震懾, 超級嬲豬衝去同 HR 咆哮 !

我知 < 嘔人 > 係乜水, 外貌清秀, 平時施施文文, 聽聞當年會考 5 條 A, 仲喺 Simon Fraser double major 畢業添 ! 知佢有咗, 不過唔係大晒, 如果做清潔嗰個係佢媽咪, 唔知佢會唔會照樣咁做, 或者會唔會介意人哋咁對待自己阿媽呢 !? 一句講晒 : < 嘔人 > 人面獸心自私讀幾多書都冇用.

話時話, 派嘔袋呢招, 騎呢又搞笑, 虧 HR 諗得出 😂

2019年4月18日星期四

米芝蓮身材的形成

我肥腰但肚腩還可以, 只係胃腩凸. 但胃腩係大肚腩嘅先兆, 要儘快處理, 前陣勤做 exercise 似乎有啲成果, 可惜個 ' 果 ' 前幾日已經徹底被打爆.

澳洲菜同法國意大利當然冇得比, 不過作為西餐我覺得算係好食, 不過要強調, 一定要澳洲本土嗰啲. 澳洲地方大, 人口少污染少, 原材料素質一流, 廢話啲都要講 : 肉有肉味, 菜有菜味, 蛋有蛋味. 唔好笑, 我好耐冇喺香港食到有肉味嘅肉, 有菜味嘅菜, 同有蛋味嘅蛋.

喺悉尼 5 日 4 夜根本完全未餓過, 除咗酒店 breakfast, 平均每餐 ( 連劈 ) 3 粒鐘, 換句話說, 餐同餐之間只有少於 3 小時去消化, 仲未計中途身痕走去食杯海鹽雪糕飲杯 cocktail, 食太多屙唔切, 我諗今朝都仲係屙緊前日食嗰啲.

以為澳洲四圍有袋鼠肉吃, 點知原來要高檔少少嘅餐廳先有, 今次終於可一嚐 ! 紅肉, dry dry 哋, 有啲粗獷但又未夠野味咁濃, 要烤先好味, 感覺冇乜特別, 呢次試完下次可以慳番了.

DAY 1 - LUNCH @ GANTRY

DAY 1 - DINNER #1 @ CAFE SYDNEY

DAY 1 - DINNER #2 @ BARANGAROO

DAY 2 - DINNER @ SAINT PETER

DAY 3 - LUNCH @ FISH MARKET

DAY 4 - LUNCH @ AQUA DINING

DAY 4 - LUNCH DESSERTS @ AQUA DINING

DAY 4 - DINNER @ BENNELONG RESTAURANT

DAY 4 - DINNER DESSERTS @ BENNELONG RESTAURANT

悉尼自由行

之前悉尼公幹見啲澳洲人咁 hea 非常羨慕, 今次終於可以一嘗頹廢之樂, 去 4 日玩番轉. 出發前睇天氣預告大部份時間落雨, 點知去到唔止冇, 仲竟然連續 4 日都 😎, 真開心.

我哋坐嗰隻 Tall Ship < Soren Larsen >

出得埠, 瘋狂飲食係必須嘅, 但都冇可能 4 日不停食, 所以加插咗少量遊覽活動, 嚟個 Sydney Tall Ship ( 高桿帆船 ) champagne brunch 船河.

食物非常美味冇揸流攤, 可惜影遲咗, 比人食晒

坐 1949 年下水丹麥古董貨船遊悉尼海港, 全程航行 2 小時, 無限香檳酒水 + 多款 finger food 供應, 每人唔駛 HK$ 600, 抵到爛.

桅杆攀爬 . 咪搞我 😅

有氣力者可以幫手起帆, 自問有膽色仲可以徒手爬上桅杆頂, 高人一等欣賞海岸景色. 我手軟腳軟又畏高, 唯一酒量有少少, 只得盡力劈.

船長 & 船員講解

開頭擔心會暈浪, 點知高桿帆船航行出奇穩定, 連啲啲 < 啷吓啷吓 > 嘅感覺都冇, 高腳香檳 ( 膠 ) 杯放甲板上完全唔郁.

我哋係船上唯一中國人, 但失禮死, 同行有一大陸朋友因唔識英文, 聽唔明就漠視船長同船員講解, 眾人留心聆聽航行安全須知 / 船上守則之際, 竟然完全唔比面行嚟行去大聲播 wechat !

勁樣衰, 真係想搶 Q 佢部手機掉 Q 落海. 幸好船員唔介意, end up 只係輕輕帶過, 叫我去翻譯番比 < 行嚟行去講電話嗰位先生 > 聽.

曬太陽吹海風飲香檳 . 睇都知 hea 啦

大隻佬起帆中 . 力的表現

眾人喺甲板飲酒食嘢曬太陽, 唔知做乜同行嘅大陸人 ( 除咗行嚟行去講電話嗰位先生 ), 個個頸巾包頭帶晒黑超, 匿喺船倉縮埋一二角, 唔知係怕醜怕曬定係唔見得光. 同埋, 幾個都喺到玩電話, 冇人望過個海一眼囉, 吹漲.

後尾發現, 佢班人一心只想食同鳩嗚 ( shopping ), 對觀光遊覽 0 興趣, 咁遠飛落澳洲都唔知為乜, 早知唔駛 plan 咁多嘢啦.

所以之後幾日嗰啲悉尼大橋 Bondi 沙灘行程一率取消, 全部改晒去商場藥房超市購物 ! 而我就賣甩佢哋, 去自己想去嘅地方, 到食嘢嗰陣先集合等佢哋埋單.

劈住欣賞靚景 . 爽 !

2019年4月9日星期二

一路向北

呢排親中, 無啦啦心血來潮, 連環開咗大陸手機號碼 --> 大陸銀行戶口 --> 仲申請埋大陸駕駛證 ( 車牌 ).

尋晚比人笑我 hk break ( 逃出香港 ) 😆 No laa ...... 國家政策五時花六時變, 剩係睇做緊啲工程, 審批準則話改就改毫無先兆, 日日比官玩到氹氹轉就知驚啦, 所以有買趁手, 無謂夜長夢多.

本來只係諗住開手機 + 銀行戶口就算, 但出奇地巧合, 兩日內竟然有三個互不相識, 但又都係喺國內跑咗好耐嘅佬, 叫我嗱嗱臨攞個香港 ( 車 ) 牌去換中國牌 😲

三重彩呀 😂 咁竅. 上天明顯啟示一定有嘢, 橫掂都煩, 唔爭在搞埋個牌啦.

譚仔阿姐口音

幫襯 < 李 kin > 一條龍服務, 尋日出發深圳做體檢兼去車管所辦證. 同行另有 6 男 3 女.

言談間, 發現 3 女講嘅係譚仔阿姐口音 ( 見附圖 ), 明明大陸人點解要喺香港搞中國牌呢 ?

後尾我明喇, 原來大陸考車筆試勁難, 100 條問題只可以錯兩條, 香港易好多囉. 可能因為咁, 譚仔阿姐會嚟香港考牌後再攞去 " 笈 " ( copy ) 番個大陸牌.

體檢 7 關. < 辨色力 > 呢關非常淆底, 雖然做設計咁耐, 但都唔敢肯定自己係唔係 100% 冇色盲 / 色弱. < 視力 > 唔駛講都好驚吓, 勁散光, 仲可能有啲夜盲添, 好彩最後通通過關 🙏