好靚 . 好得意 . 好有趣

Roman Holidays . Spanish Steps 經典場面

N 年前 Audrey Hepburn 套 < 羅馬假期 > 帶動羅馬旅遊熱潮, 亦令到 Spanish Steps 成為朝聖景點.  

樓梯頂嘅 Trinita dei Monti 教堂左手邊, 原來係間修道院.  
http://trinitadeimonti.net/en/church/to-visit-trinita-dei-monti/

修道院平日唔對公眾開放, 但夏令時分每星期會有幾個法文 / 意文導賞團, 只接受電郵預約, 一於向難度挑戰, send email 試吓, 結果得咗 ! 法文團夾唔啱日子, 唯有意文都殺.

修道院門外 . pastel 羅馬景色

修道院內庭

去到集合點, 7 個團友都係意粉, 得我一個亞洲人, 好彩導賞唔駛太互動, 萬一當場叫我 share 睇法, 唔好話意文, 就算廣東話都唔掂 !  我極 low 嘅意文程度, 出盡奶力應該都只擠得出呢 3 個形容詞 :

• Bellissimo! ( 好靚 ) ;
• Originale! ( 好得意 ) ;
• Molto interessante! ( 好有趣 ).

笑大人個口 😂

教堂外人潮洶湧, 修道院內異常寧靜, 有種隔世感覺. 

修道院內庭門廊 details

修道院閉門修葺咗幾廿年, 2018 年尾重開, 比導賞團參觀, 為咗保存剛復修好嘅文物, 平時所有門窗都關上, 只有參觀時打開一陣, 睇完就要立即閂番. 所以呢個地方應該陰氣好重, 自己一個唔敢行.

小禮拜堂

一樓 "Mater Admirabilis" 小禮拜堂裡面, 有幅色彩繽紛嘅年輕聖母壁畫, 導遊話幅畫牽涉幾個神蹟, 可惜當刻智障, 醒唔起許願祈求自己可以高多 4 吋, 超級嘥料.

拱形藍色天花, 有好多立體星星圖案...... 嘩 ~  靚到呢.  

小禮拜堂 details

view from 走廊頭

醉翁之意不在酒, 今次參觀最想睇係 "Anamorphsis" 分別喺兩條 20M 長走廊嘅變形壁畫.    點變形...... ? 企喺走廊頭同走廊尾望同一幅畫, 會見到不同景象, 其實全部都係視覺幻象.

3 百幾年前兩個法國數學家暨畫家嘅實驗畫作, 當年冇電腦程式幫佢哋拉闊啲 perspective 線條用 laser plot 上牆, 所以我覺得佢哋真係超堅 !

走廊中間

close up : 大樹下有個人

壁畫 1 :  走廊頭望係山水風景同一棵大樹;  喺走廊另一端望番轉頭, 山水風景竟然會壓縮變成一個人正在祈禱.

view from 走廊另一邊

壁畫 2 :
走廊頭望, 都係山水風景同一棵大樹;  但喺另一邊望番轉頭, 山水風景就縮成一個正在寫字嘅人.

第三個景點 "Astrolabe" ( 星盤 ), 一間牆壁畫滿天文星體嘅房間, 太陽投射到窗台鏡子再反射到牆上, 從光點坐落有數字嘅線條位置, 就可睇出時間日期.
紅線 = 分鐘 
藍線 = 時間 
黃線 = 日期 
睇唔睇到相中嘅光點顯示緊幾點鐘呢 ?   答案 : 拍照時間 11:55am, 堅準囉, 不過我唔識睇代表日期嗰條黃線.

最後呢度, 打開門𥄫, 冇乜特別啫.  細望之下, 原來呢間房平滑牆身只得右邊單邊三隻窗, 所有祭壇, 立體浮雕, 一樑一柱, 乜都係平面上畫出嚟嘅假狗, trompe l'oeil ( 錯視畫 ) 嚟㗎 😮 

真係大開眼界, 根本就係而家大 hit 啲 3D 館嘅始祖. 啲畫師翻生嚟香港, 劏房都可以比佢畫到變豪宅.

偽書卷

一年一度又要單拖出 trip, 為咗唔想覺得空虛, 寂寞, 凍 😂, 每次都會 set 個主題, 令自己有啲細藝.  2018 < 遊花園 >; 今年 2019 : < 圖書館 >. 

對圖書館冇好感, 除咗 ' 書書 ' 聲唔老黎之外, 我都唔鍾意睇書.  仲記起 Form 6 喺學校圖書館無啦啦比條八婆老師喪鬧, 為乜春唔記得喇, 應該都係我哋胡鬧嘈親人之類.  但 4 個人一齊有份嘈, 條八婆唔知點解凈係向住我一個發炮 ! 痴孖根, 變態.

網上資料搜集, 原來歐洲有好多靚圖書館, 鎖定目標, 巴黎參觀 4 間, 羅馬 3 間.  點知去到巴黎, 先發現原來係法國假期, 所有圖書館關門, 而第二天亦一早訂好票做另外嘅事, 所以臨時取消圖書館行程, 去咗個結果令我非常滿意嘅景點.

到羅馬有啲忐忑, 唔知圖書館比唔比外國人入呢 ?  個樣咁老, 又扮唔到留學生去做 research 寫 thesis 😆.  

BIBLIOTECA CASANATENSE . 一條友玩晒 👀

去到第一間 ( Biblioteca Casanatense ), 同門口職員打個招呼就掂行掂過, 點知被截住, 問我做乜, 我話 : 想入去睇吓......  跟住佢講咗一大抽意文, 內容大致係要等一個人返嚟.  哈, 咁得意 ?  喺門外張櫈坐咗陣, 果然有個學者 look 嘅人出現, 帶我穿過好多間房後入咗個靚到令人 0 咀嘅 hall.
 

館內所有物品都有 475 年以上歷史

原來呢個地方雖然係圖書館一部份, 但絕少對外開放, 我唔知行乜運, 竟然有幸一窺全豹, 仲有學者介紹歷史典故, 可惜講解好深, 淨係聽得明兩三成 😅  

BIBLIOTECA VALLICELLIANA . 樓梯

去到第二間 ( Biblioteca Vallicelliana ) 比人彈鐘, 話館裡面做緊 setup, 叫我下晝 5 點再去. 

哇, 係咪堅㗎 ? 唔好等我 5 點山長水遠返轉頭, 你先話都係唔開喎.

DETAILS OF BIBLIOTECA ANGELICA

BIBLIOTECA ANGELICA

咁唯有先去第三間 ( Biblioteca Angelica ), 嗰度管制比較寬鬆, 無掩雞籠, 自出自入.  

面積小樓底高, 書架有三層, 眼見個二百磅肥婆擒咗上三樓騎樓行嚟行去, 心中暗驚, 怕啲古董木承受唔到重量, 啪一聲爛咗飛埋佢落嚟, 壓親人就大鑊.


終於 5 點, 走返第二間睇吓乜料, 門口個人見我真係走番返嚟, 同我單咗吓眼 😜 就開門放我入去, 裡面烏燈黑火, 未見過咁暗嘅圖書館.

BIBLIOTECA ANGELICA . LOCAL ARTIST EXHIBITION 開幕酒會 😭😭😭

有記者, 又有著得好高雅嘅人士, 後尾發現, 原來我身在一個 local artist 展覽嘅開幕酒會囉, 門口個人真係大整蠱, 見啲人開始眼望望, 快閃影幾張沙龍, 心虛, 走人 !

虫之恐襲

又有嘢估......  圖中呢兩樣係乜呢 ?

1. 短小銀色 : 點蠟燭用長條型火機

2. 又長又幼 : 用嚟固定蘭花嘅鐵支

而家落喺我手上, 除咗原有用途, 佢哋已經被 add value, 成為殺戮工具.

廣翅蠟蟬

唔知搞乜, 今年騎樓植物比 < 廣翅蠟蟬 > 騎劫.  < 廣翅蠟蟬 > 外形奇特, 幼蟲同成蟲長相截然不同, 完全兩個 form.    

白色蜘蛛狀幼蟲幾廿隻密集式爬行, 食晒啲葉, 搞到棵桂花光禿禿.  上禮拜忍無可忍, 諗住攞水槍掃射, 點知佢哋竟然識閃, 光速彈開, 無耐又彈返番嚟.

啲成蟲 ( 娥 ) 夜晚飛入屋, 喺光源附近爬嚟爬去, 都算 !  最㷫就係躝喺電視機畫面上阻 Q 住晒.  其實可以閂窗, 不過呢排天氣涼浸浸, 夜晚微風陣陣勁舒服, 冇理由閂窗避班仆街.

桂花原本好茂盛嘅葉比啲 PK 食晒

尋日下晝賦閒在家, 望住啲白色蟲喺棵已經近乎全裸嘅桂花上爬嚟爬去, 好㷫之餘忽發奇想 : 用 🔥🔥🔥 燒 ! 

長型火機, 火喉適中唔會太大燒到啲葉, 修長身型隊到埋身先撻 🔥,  唔怕打草驚蛇, 呢招 100% work, 完全殺佢哋措手不及.  入夜嚴刑侍候, 所有飛入屋嘅成蟲比哂機會趕走, 堅持留低者就閂窗攞 🔥 逐隻燒. 

好變態 ? 幾㗎, 不過信不信由你, 如果唔係咁殺一警百, 今日就唔會連一隻都冇出現.

紫雪花快高長大 . 可惜有蟲

咁支長鐵支又點用呢 ? 

除咗 < 廣翅蠟蟬 >, 另一盆棵紫雪花亦被我呢世人最怕嘅 < 毛蟲 > 侵襲, 早幾日起身淋完花, 啲蟲就會爬上啲花嘅最尖端, 雖然每日只出現一兩條, 但諗起實際上蟲嘅潛在數量, 實在毛骨悚然 !

迫於無奈, 出盡小宇宙攞屋企長形雜物將眼見嘅蟲拍走, 又因為距離極近, 拍嗰陣, 真心好驚好驚好驚啲蟲會反彈埋嚟, 跟住成日仲 ' 形 ' 住有蟲爬咗上身.

後來諗起 office 有支 3 呎長鐵支, 嗱嗱聲攞返屋企. 支嘢咁長, 而家冇有怕, 伸長手唔駛企出騎樓, 遠距離都已經可以拍到所有枝葉. 

支嘢, 多謝你呀.

Bon Appetit

好耐冇 update 公司怪事, 同圖中 4 件物件其中一件有關......  係乜春呢 ?

開故 : 右下角灰色有 waste 字樣嘅 " 嘔袋 ".

***** 將會食飯 / 食緊飯者 . 慎入 *****

今朝返工坐低冇耐, 兩位 HR 同事九秒九衝入我房.  心諗, 咁趕係咪炒 ? 係就快手賠錢立即走人, 點知又唔係, 原來係派嘔袋, 每人一個.

攞住一大疊嘔袋晨早溜溜四圍派 😆😆😆😆, 問佢哋搞乜, 最初支吾以對, chok 多兩嘢, 終於爆料, 話呢排 office 有人成日嘔.   

吓, 成 ~ 日 ~ 😱😱 嘔 ????!  以前細路返學啲同學仔就會啫, 乜而家返工都會咁嘅咩 ?

追問下, 目標人物出現 ( 下稱 < 嘔人> ), 嘔唔係問題, 但 < 嘔人 > 嘔得特別衰格, 女廁馬桶唔嘔, 係都要嘔落旁邊個 M 巾桶度, 仲要唔係一次半次. 清潔阿姐投訴多時, 結果星期一爆鑊忍無可忍, 話如果再整多一次就劈炮唔撈 !

阿姐咁㷫, 皆因 < 嘔人 >上禮拜五 office hour 後又嘔落 M 巾桶, 但因清潔時間已過, 嗰啲 " 嘢 " 就喺 weekend 發酵, 乾涸......  結果, 星期一阿姐返工, 一開廁格門完全比眼前景象同臭味震懾, 超級嬲豬衝去同 HR 咆哮 ! 


我知 < 嘔人 > 係乜水, 外貌清秀, 平時施施文文, 聽聞當年會考 5 條 A, 仲喺 Simon Fraser double major 畢業添 !  知佢有咗, 不過唔係大晒, 如果做清潔嗰個係佢媽咪, 唔知佢會唔會照樣咁做, 或者會唔會介意人哋咁對待自己阿媽呢 !?  一句講晒 : < 嘔人 > 人面獸心自私讀幾多書都冇用.

話時話, 派嘔袋呢招, 騎呢又搞笑, 虧 HR 諗得出 😂