困獸鬥

六月去羅馬搵到個喺正市中心但又鮮為遊客所知嘅地點住, 距離 via dei Condotti 名店街只有幾分鐘路程.  風涼水冷, 環境優美, 景觀開揚有河景, 冇鬼, 50 米內仲有超市同 3 個巴士站, 如果中六合彩一定立即飛撲去買呢個筍盤.
十月再戰羅馬, 網上發現喺同一棟大廈原來有 3 間由唔同 agent 經營嘅 B&B 出租.  太好了 ! 一行 7 人分別住哂喺 ( 圖中 A B C ) 3 間 B&B, 我喺 C, 另外班 friend 住 A 同 B. 

Apartment C

3 間 agent 經營手法各有不同, 有人 whatsapp 十問九唔應, 有人光速回應 ;  約好 check-in 時間, 有人早到, 亦有人會遲成 20 分鐘.

不過我最介意, 就係 A 同 B agents 都冇要求客人將垃圾分類, 又冇教佢哋大廈垃圾房點去.

Apartment B

我唔係乜環保份子, 不過實在睇唔過眼, 毫無責任感 !  意大利雖然殘, 但同好多歐洲大城市一樣, 多年前已經實行垃圾分類.  

好多亞洲遊客唔知, 意大利冇我哋咁幸福, 屋企晚晚有人上門收垃圾, 佢哋乜都要分日期自己攞落樓下垃圾房分類掉㗎.

Apartment A

咁勞嘈, 無非因為知道啲 Big-6 朋友嘅生活模式.

佢哋唔係潔淨一族, 食唔慣西式早餐, 朝朝喺廚房整罐頭煎蛋淥杯麵, 食完啲嘢唔執擗到周圍係, 唔開窗再加上一室人味煙味 ( 註 : 佢哋係重症煙民, 瞓覺都要擔住口煙先瞓得着嗰隻, 如果有日煙喺呢個世界消失, 佢哋亦會隨之滅種 ), 有次入去坐咗半個鐘真係頭暈, 嗰種臭, 同要你不停嗍人哋對著過嘅波鞋差不多 = 嘔 x infinity !

可以想像到佢哋退房後, 入去清潔嘅, 發現垃圾筒裡面根本完全冇垃圾 ( 因為幾日以來嘅垃圾冇掉不特止, 仲擺晒喺垃圾筒以外嘅地方 😂😂 ), 會有幾咁震懾.

最後一天

險境

尋日係我上班 last day, 終於等到 🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉🎉  實在太 high, 4:05am 醒咗就亢奮到完全瞓唔番.

同埋, 終於可以逃出險境 😅 

點解咁講 ?  因為我坐正 2019 年 office 極高危嘅 < 二黑 > 區域, 風水師傅提醒我, 有得飛就飛, 唔好留咁多喺 office.  事實上, 由年頭到目前為止, 喺呢區 4 個坐房嘅走咗兩個 ( 包括我 ), 又有兩個同事有家人過身, 另一人阿媽最近突然發現 cancer 末期, 你話大鑊唔大鑊 ?

多得各人嘅厚愛, 尋日 last day 由朝食 + 劈到黑, 打破我單日飲香檳支數紀錄 !

Farewell lunch 同 dinner 好正常, farewell champagne breakfast  真係第一次, 朝早 10 點幾吃完返 office, 仲要撞正老闆突然衝入房同我 say goodbye, 成陣酒除, 自己都覺得有啲離譜 😜

雖然警告咗同事千祈一定唔可以搞 farewell party, 結果都係有, 仲要搵 HR 約我 4pm 扮交收, 諗住成班人喺 meeting room 比個 surprise 我, 點知 lunch 嗰陣已經有人唔覺意洩密囉, 冇鬼用 😂😂😂

farewell popcorn

呢個 farewell 一啲傷感都冇, 大家都好明顯感受到我能夠逃離嘅喜悅, 相比一個月前另一 director farewell party 當眾哭到死去活來嘅景象, 簡直天與地.  同埋我話不如乘機當埋個 P 喺戒酒會啦, 劈過今嘢, 相信以後都冇乜機會咁飲, 因為 office 裡面再冇人會咁 alcoholic 隨時隨地撩人隊囉.

晚黑都係出去繼續飲, 飲得更厲害, 斷片係必然, 今朝要睇番相先醒起食咗啲乜, 但當睇到以下呢幅 < 雞 >, oh my god ! 我記得喇 !!!  真係好 L 好 L 好 L 好食, 有興趣試吓, 可以去 PMQ 新開嗰間法國菜, 要預訂㗎.

farewell yellow chicken . YUM !!!

海陸交通大測試

受人所託, 幫忙帶佢 < Big 6 > 朋友圈加埋自己一行 7 人出遊意大利, 酬勞係免費商務機票連食宿.  正啦, 有人出錢比自己飽嚐私欲, 食想食嘅嘢, 去一直想去但又嫌貴嘅地方, 仲想點呀 ?

任務除咗安排行程節目, 買車票, 訂酒店, 預約餐廳, 仲要充當翻譯同埋幫全部人 order 嘢食 ( 因為佢哋少食西餐, 唔識睇餐牌 ), 聽落唔簡單, 但對我嚟講又唔係太難, 因為安排策劃同點人做嘢呢啲, 完全係我專業 😂

慶幸呢班人非常文明兼守規矩, 集合永冇遲到, 可能事前有人警告過佢哋, 我發脾氣唔係人咁品, 所以佢哋全程都比較 behave.

今次有人請客, 即管做吓啲奢侈行為, 例如 : 

1.  威尼斯機場搭 water taxi 去酒店 - Eur 120 程, 比平時搭船貴幾倍, 但成件事真係極度型, 又快, 慳成粒鐘.

2.  坐 gondola - 以前唔敢, 因為海鮮價分分鐘被斬一頸血.  好在近來實施 fixed rate, 日間收費 Eur 80, 幾歹都試吓啦 !  

唔怪得 gondola 咁多人坐, 喺威尼斯九曲十三灣嘅河道慢慢撐, 原來真係好平靜好好 feel.  仲有, 原來 gondolier ( 船夫 ) 牌好難考, 佢哋年薪過百萬港幣㗎 !

3.  翡冷翠 ( Florence ) 馬車 - 終於可以得償所願, 馬就騎得多, 坐馬拉嘅車係第一次, Eur 50 坐 25 分鐘, 慢慢欣賞雖然已經睇過 N 次嘅景點, 別有一番風味. 

我哋隻馬中途仲表演 high pressure 射尿, 引來大批途人圍觀拍照 😅

 4.  羅馬玩 segway - 好多大城市已經禁咗 segway, 趁意大利仲有, 快啲試 !  比想像中易操控, 而且馬力大, 上斜一啲問題都冇, 企上去周圍行簡直有騰雲駕霧嘅感覺.

Eur 56 可以玩 3.5 小時, 又有嚮導解說, 好抵吖.

賊巢

秋季大旅行, 第一天已經遇上滑鐵盧.  

臨上機, 千叮萬囑同行朋友睇緊身邊財物, 歐洲好多賊, 換嚟一句 : " 有冇咁犀利呀 ? "  Ok ok, 總知唔見嘢唔好煩到我, 要走去同你報警同去使館補領 passport 就得喇.

威尼斯機場搭 water taxi 到市中心, 落船再由碼頭推行李去酒店唔超過 50 米.  酒店 check-in 之際, challenge 我嗰個人猛然發現喺呢兩分鐘都唔夠嘅路程竟然比人打開背囊撻咗銀包 !

😱😱😱 唔係咁靈驗嘛 ?!  唔知仲以為我識特異功能, 同班賊夾埋去伏佢.  當刻, 亦感到可能會相當大鑊, 因為中國使館只得米蘭同羅馬先有, 如果條友真係比人撻埋本 passport, 全班 friend 都要陪葬同佢過去補領, 好彩最後冇唔見.

最令人驚奇, 係酒店職員嘅反應, 佢哋第一時間唔係叫我哋去報警, 而係問個銀包係乜樣, 跟住叫其他同事留意吓喺酒店附近街邊嘅垃圾桶, 話啲賊通常攞咗 cash 就會立即掉咗個銀包, 根本唔會用啲卡, 所以有機會搵得番.

哇 ~  聽完, 連對意大利最後嘅一滴安全感都冇埋, 不過亦要多得呢位朋友, 冇佢嘅犧牲, 就唔可以嚇到大家全程高度戒備, 看管好自己財物, 成就到跟住日日都咁 happy 嘅 trip.

酗酒是這樣煉成的

今日 1pm 開始和你 suck, 買佢怕, 明明下晝三點飛, 無奈要早幾粒鐘出發, 去機場坐定定. 

當然唔會齋坐咁冇意義啦, 魚翅航空今次擺明蝕喇, 因為我喺佢 lounge 狂飲狂食, 香檳打孖上.  狂飲一啲唔出奇, 狂食點都唔係我作風吧.

點解會變成一件吃貨 ? 尋晚食唔飽囉 !

話說有老闆級人馬請客, 沙田跑馬入場全包宴連 K11 Rosewood 晚飯．查實除咗自己屎輸錢, 全日 free flow DOM (香檳) 紅酒 龍蝦 鮑魚 龍躉直落, 一個仙都冇出過, 原本應該好開心啦, 點知席上有位過氣名人 (女人)百彈齋主上身, 搞串個 party 食乜彈乜, 奄尖聲悶, 又話廚師整得唔好又話條龍躉腥,  要人退走，但咁差又搶食晒個魚頭同魚尾喎.

晚黑個北京填鴨仲搞笑，話人皮唔脆, 肉唔甜，冇油香.  又投訴餐廳油煙大，少客 (你估人哋想嘅咩？)．其實我覺得味道雖未至於一流，查實還可以, 但若果再食啲人哋踩到咁盡嘅食物, 就會顯得自己好冇品味同要求好低, 所以成晚食咗兩塊鴨皮後就幾乎齋劈, 劈爆今朝起身，咪肚餓到想食人囉.

形影不離

ASIA TEAM 精英

公司成日話慳錢左 cut 右 cut, 但唔明點解可以有 budget 每年開兩次 kickoff meeting.   大佬, 成個亞洲一行廿幾個所謂高層, 機票酒店, team building 連吃喝玩樂, 每次開銷都唔小啦.  

Kickoff meeting 有乜 takeaway ( 得着 ) ? 咪係得條毛囉.   講真, 班人又唔係 sharp 醒, 咁多次 kickoff 講嚟講去三幅被, 啲所謂 brain storming 交流, 全部都係啲 ' 鬼唔知阿媽係女人 ' 嘅事實, 噏乜唔駛負責任, 吹完拍吓籮柚走, 冇人會 take action, 隔半年內容又重複一次.  成件事, 根本超級嘥 $ 同嘥時間.

2019 年頭一月北京 kickoff 撞正生日, 企硬唔去.  九月 Phuket 呢個係唔撈前最後一次, 冇所謂, 參與吓, 睇吓會唔會有驚喜 ?

PHUKET 半空

哈, 應該係驚多過喜, 布吉島當年南亞海嘯咁多傷亡, 諗起有啲寒, 曬冷帶齊屋企所有護身符出發.  好時高運, 全程冇怪事發生, 但臨走驚聞兩位同事, 事有湊巧 3 晚不約而同 < 玩接力 > 失眠 :

👻 女同事每晚半夜三四點醒, 之後瞓唔番 ;  👻 男同事明明攰到趴街, 但晚晚典嚟典去, 要成四點先瞓到.

酒店內水上飄餐廳 BLACK GINGER .  好搞嘢

全靠護身符, 呢個 trip 先食得瞓得屙得, 但全程為咗 < 一個人 > 極度困擾.

呢個 < 人 > 係香港 office 嘅 PNG 😂 ( 不受歡迎人物 ) - 女性, 面貌 外形 體味 人格 行為 思維 做事作風都極唔掂. 

點解咁都可以喺公司生存到 30 年 ?  因為佢面貌 外形 體味 人格 行為 思維 做事作風都啱晒老嘢家族嘅河車, 集齊迂腐 守舊 老土嘅特質, 物以類聚, 有共鳴囉 !

好怕呢個 < 人 > , 樣老扮萌唔係罪, 最惡頂就係佢同你講嘢嗰陣, 唔知做乜春要哄到好 Q 埋, 滿面老人斑兼滿口牙漬, 惡頂, 嘔心 !   做嘢卸膊, 講嘢又唔開門見山, 轉彎抺角前戲一大段都仲未入肉.  平時離遠見到佢必定掉頭走, 點知今次來回兩程同機不特止, 仲要 team building 抽籤抽中同佢一 pair 😤😤😤, lunch 竟然被編排坐正佢對面 😤😤😤😤😤😤  my god, 咁即係叫我唔駛食啫.

回程布吉機場成班同事排隊 check in, 唔知做乜 7 佢係都要黐住我後面, 話我係 business class 所以想一齊.  我非常極之唔客氣同佢講 :  " 我唔係 business class, 呢個亦都唔係 business class counter, 如果你要 check in, 你可以過隔離櫃枱, 嗰邊冇人排 ! "

跟住晒做乜撚 !

好少對人咁 blunt, 不過呢劑真係忍無可忍, 尤其諗起佢個勁廢 presentation 嗰啲聽到人耳都側埋嘅港式英文 -- ' len 羅 ' ( landlord ), 3 分鐘內講咗超過 20 次嘅 ' nowadays ' 同 ' actually ' -- 我要為 nowadays actually 被污辱嘅英文出氣 !

海關廿 9 幾條隊唔排, 痴 Q 線係都要跟住晒排同一條, 好 L 煩, 過關後我頭也不回 9 秒 9 極速狂奔, 儘快喺佢視線範圍消失, 飛甩條樣炳.