Horsey is fun

2025年3月31日星期一

茵 (Yan) can cook

我中文名最尾有個 '茵' 字, 細路時期因為肥, 親戚叫我 '肥茵'. 大咗對玄學有興趣, 啲人就笑我叫我 '郭悟茵' ( 出處 : TVB 香港八一, 李我飾演一個叫 [ 覺悟因 ] 嘅相士角色 😆 ). 2024 年同馬友旅行, 因我對意大利比較熟悉, 佢哋同我改咗個朵叫 '意大利茵' ( Italian 諧音 😆😆😆).

呢 3 個名改得好貼切, 反映唔同階段嘅我.

意大利電視台有個專教人煮嘢食嘅頻道, 其中一 part 係由修道院神父主持, 最初以為神父要好似和尚咁食齋, 點知唔係, 原來佢哋可以又魚又肉仲食得幾豐盛吓 😅. 有一個 couscous di tacchino ( 火雞肉小米 ), 材料易整又易買, 如果買唔到火雞肉可以用雞肉代替, 喺屋企煮過兩次都覺得好好食.

羅馬住嘅 apartment 有廚房, check-in 後擺低行李就立即跑落街, 衝去超市買餸煮飯 ( 最重要係要買我嘅生命之源 : 酒 😂 ), 因為個餸要煮成個半鐘, 如果唔早啲開始, 我驚我會餓親.

身在意大利用本地食材, 測試同份量同做法, 會同攞香港材料煮有乜分別. 結果差別非常大, 用意大利料煮嘅, 味道除咗濃啲仲會多層次啲 !

差不多食晒, 先發現唔記得影完成圖 ( 下圖係烹煮途中拍嘅, 同神父整嘅賣相差十萬九千里 😆😆😆 ).

彩蛋 🥚 : 原來意大利超市買菜唔駛成 pack 或者一整棵買㗎 😝

意大利西芹好重好大棵, 因為整完 couscous 就唔會再用嚟整第二啲嘢食, 所以就搏吓, 偷雞喺棵大西芹搣咗最面嗰 3 條出嚟磅, 點知又真係夠秤出到價錢 label 喎 😂😂😂😂😂😂 攞去收銀檯埋單, 收銀見我剩係散買 3 條西芹又冇趷我. 哈哈哈哈 ~

意大利呢個國家真係好正, 乜都可以監粗lia.

2025年3月17日星期一

觀塘 Office 女子 MMA

返新工個幾月, 如果喺 office 的話, 多數會小天地自己閂埋房門食 lunch, 因為個 [ admin 女人 ] 實在太煩, 少少事就嘈嘈嘈, 殺聲震天, 都係留喺房耳根清靜啲.

上禮拜 [ admin 女人 ] 同另一 [ 男仔頭女同事 ] 夾份 order 燒臘飯盒, 二人同行特惠收費, 兩個人可以慳到成卅蚊, 如魚得水好 happy.

點知今日食晏就翻臉 ! 佢哋原本諗住再一齊 order 燒臘飯盒, 但就因兩人飯盒差價 3 蚊大炒一場 😒 [ admin 女人 ] 好勞氣話 [ 男仔頭女同事 ] 佔佢便宜 😂

唔駛錢咁精彩, 緊係唔出聲睇佢兩個繼續大鬥法啦 ( 我仲錄埋音添 ), 所以要出 blog 現場直擊報導 😆😆😆

炒鑊主要原因係二人對 AA 制演繹不同 :

[ Admin 女人 ]'s AA = 係各付各自己單價 ;
[ 男仔頭女同事 ]'s AA = 唔理每人食幾錢, 張單平均分就得.

個人比較 buy [ 男仔頭女同事 ] 計人頭平均分說法, 如果各付各自己單價, 就唔算 AA 制 equal qualities of each 定義啦 !

男同事們終於忍無可忍出手調解, 兩條女雖然肯收聲, 但就不歡而散, 為咗咁小事嘈交, 屌 😤 ! 佢兩個夾錢唔用 AA 制呢個 term 咪得囉, 成壇嘢真係好 L 白痴 !!

2025年3月13日星期四

我的第二變

今日冇嘢做自己早放自己, 喺觀塘四圍行吓. 之前網上摷到個叫 [ 廿一由八 ] 嘅香港製造木傢俬工場 / showroom https://www.facebook.com/twentyonefromeight/?ref=tn_tnmn , 好似幾特別, 一於上去參觀吓.

去到, 欣喜, 而家嘅香港原來仲有有品味嘅人, 佢哋傢俬手工真係冇得輸, 貴㗎, 好想買, 可惜屋企已經冇位擺.

好難得會吸引到我逐件慢慢睇, 竟然仲逗留到超過半小時, 真係破晒紀錄 !

Showroom 有兩隻貓, 無聊同佢哋玩吓幾搞嘢嘅, 不過諗起以前騎馬嗰度啲花貓捉完老鼠, 會攞住啲死老鼠拋嚟拋去, 同埋一路咬一路搓嘅場面, 就堅陰影.

講起貓, 或者任何小動物, 由細到大從來都冇覺得佢哋得意, 因為我係一個冇愛心嘅人.

包括小朋友, 雖然未至於憎, 但一直都冇興趣冇感覺. 好多時朋友同啲細路玩得好開心好激烈之際, 只要回頭一望, 望到我個樣, 成個 mood 就會直插谷底 😂😂😂

不過自從今年二月尾, 我對啲小動物 / 小朋友 ( 6 歲以下, 其他都仲未得 😆 ) 嘅反應感覺開始唔同, 竟然會留意欣賞佢哋, 同埋覺得佢哋好可愛 😧😧😧😧😧😧😧😧

會唔會係因為近期食少咗牛嘅關係呢 ? 有待證實.

2025年3月8日星期六

🌞回來了

生完日成個幾月, 竟然都仲有人話要同我慶祝, 好呀, 有人請一於唔客氣, 去好耐冇去嘅跑馬地 Amigo 食 lunch.

同 Amigo 都算有淵源, 小學喺隔離讀返學日日見住個 🌞 招牌, 之後仲住正喺餐廳樓上 office 旁邊單位幾年, 同啲員工朝見口晚見面熟晒, 當年喺 Amigo 食飯, 佢哋仲會俾我走職員後門直接行樓梯返屋企 😆

2024 年 10 月, 跑馬地街坊 fb 群組不斷瘋傳 Amigo 拆招牌事件, 有人仲言之鑿鑿話餐廳要執笠.

吓 ?! 😨 唔係啩...... 聽到呢個消息覺得既可惜又傷感, 先唔好計 Amigo 係咪香港買少見少嘅特式餐廳先, 至少佢一定係跑馬地重要地標之一, 如果個地方之後比啲唔知乜騎呢租 / 買咗, 跟住好似跑馬地電車總站度咁整間 [ 佳寶 ] 嚟賣菜, 咁咪仆街 ?!!!

好彩, 好快已經 find out 呢單係流料, 拆 🌞 招牌唔係乜餐廳執笠 / 樓上嘅八婆搭唔到 uber, 而係個支架太舊要重做啫. 所以, 網上資訊真係唔可以盡信, 要 fact check.

咁高級格局同排場, 其實 Amigo 啲 set lunch 唔貴, 4 百幾蚊份量擔保食到飽, 仲包紅/白餐酒 & 咖啡 / 茶各一杯, 最正係餐廳部長 ( 當年門口代客泊車 ) 仲認得我, 私人醒多幾 round 酒我飲 😋.

去嗰日 lunch time 坐滿, 證明香港有好多閒人 😄, 同埋餐廳食物水準應該有番咁上下, 如果唔好味, 拍硬烏蠅啦 !

懷舊一餐我好滿意, 除咗唔駛俾錢 😂 , 最正係原來而家餐廳已經改送 🌞 標誌鎖匙扣, 好靚 😍😍😍 好過以前嗰啲永遠都唔會用嘅黑底熨金 post-it note pad多多聲.

因為太靚嘅關係, 大膽問鬼佬經理有冇得賣, 佢應該頂我唔順, 塞多咗幾個俾我 😂😂

2025年2月23日星期日

高手在民間

唔知有冇人聽過 [ 觀塘老母 ] ( 因為觀塘勁塞車, 啲人入親去就問候老母 😂 ) 呢個大名呢 ? 我有.

諗都冇諗過, 自己會喺觀塘返工, 好彩之前上過朋友開源道嘅 office 幾次, 對觀塘都有啲概念.

返咗新工半個月, 可能因為已作最壞打算, 暫時覺得還 ok, 觀塘人多車多啲街立立亂 ? 係㗎, 不過紐約都係咁啦, 幻想自己喺 NYC 返緊工咪得囉 😆😆😆😆😆😆 同埋觀塘嘢食比港島商業區差不多平成半, 搭 MTR 時間同車費仲慳好多, 計落都唔太差啫.

遲啲摸熟咗就試吓揸車行捷徑, 睇吓來回有冇得再快啲 💪

Office 幾條友還可以吧, 雖然 local 啲但都屬正常人類別, 除咗個 admin 女人, 我唔識相人但一望佢對眼就知係 [ 小家怕事, 但又要死雞撐飯蓋 ] 嗰隻. 果然不出所料好快見真章, 事緣大陸老闆想攞香港車牌, 問香港 office 同事借屋企地址作運輸處寄件之用, 其實問題不大, 但要借埋香港身份證副本就唔 ok, 點知啲經手人會唔會攞個身份證副本去亂用㗎 ?!

我哋點解會咁機智識得唔借身分證副本 ? 就係全靠admin 女人一輪咀 bili~bala 咁提醒囉 ! 😆 玩大咗, end up 搞到冇人肯借交唔到功課, admin 女人可能因此俾老闆個秘書 '拮' 咗幾句, 條氣好唔順, 大大聲喺自己位連續鬧足兩粒鐘 !!!!!! , 內容狂 loop 重複重複重複又重複兩粒鐘 !!!!!! : [ 呢到唔係大陸, 係香港囉 ! ], [ 自己咪俾錢去搵小紅書囉, 大把中介 ! ], [ 大陸人知唔知乜嘢係個人私隱呀 ? ].

好 Q 煩 😠😠😠 喺觀塘遇到呢啲 ' 高手' 不禁入鄉隨俗講咗句 [ xx 老母 ] ! 😂 最怕人得把聲, 唔滿意咪同人當面對質囉, 又鵪鶉唔敢 ! 不斷糾結, 騷擾到其他人, 旁人只會見到佢嘅教養同埋低水平.

2025年1月29日星期三

肥胖之都

今日剛剛拜完年食飽飽 + jet lag ( 尋朝喺意大利返 ) --> 好眼瞓 😴, 但大年初一又唔可以午睡喎, 唯有寫個 blog 分散吓注意先.

經過今次, 相信除非公幹, 我一定唔會再揀一月去意大利, 凍就預咗, 但冇諗過 8 日 trip 竟然會落足 7 日 🌧 ! 嬲 😡😡😡

好在今次 trip 特別安排咗個從未去過嘅新地方 : BOLOGNA, 仲要去嗰日係唯一嘅天晴 !! 由 Florence 搭高速火車只需半粒鐘, 仲快過我由火炭出香港 😆 雖然 Bologna 以美食聞名有 "肥胖之都" 之稱, 不過今次去嘅目的唔係食而係觀光一日遊, 下次啦, 下次一定約埋 friend 去食餐飽.

舊同事介紹 Bologna 山上有個叫 Santuario delle Madonna San Luca https://monasteriemiliaromagna.it/en/monastero/2767-chiesa-della-madonna-di-san-luca 嘅地方好靚, 從市中心行條 3.8km 嘅迴廊上山, 行個幾鐘就到.

唔係掛...... 個幾鐘 😱😱 ?! 唔囉.

打算喺火車站打的一嘢過車上去就算, 但又想一嘗本土風味, 所以決定搭巴士. 錯信 Google Map 搭 21 號巴士, 去到山腳落車再步行 15 分鐘就到. 點知到站落車後 Google Map 指示竟然完全特變, 話要行 45 分鐘, 哇 ~ 老點 😓 ?! 既徬徨亦憤怒, 當刻就算想打的都冇得周街截, 好彩有 uber 救我一命 ( 唔係廣告 ), 全程斜路, 司機揼行油都要 8 分鐘先上到.

因為有下一個行程, 匆匆參觀完畢就要急步走 4 百 70 幾樓級落山, 一路遇見上山客個個都氣來氣喘 hur hur 聲, 大部份仲要上咗年紀, 真係佩服佢哋嘅體能 💪, 比我就一定唔得啦.

落番地平線已經係 1 小時後, 好彩仲啱啱趕得切去限時預約咗嘅歐洲最古老大學 Archiginnasio https://www.archiginnasio.it/lang/en 舊址 ( 現為市立圖書館 ) 參觀.

戲肉係二樓嘅 [ 解剖劇院 ] - 世界第一個人體解剖實驗室.

[ 解剖劇院 ] 設計非常古典, 室內散發陣陣舊木香味, 欣賞途中, 凝望中央白色雲石解剖床之際, 雲遊太墟忽然跳制, 想像學生重重包圍教授, 睇佢一刀刀劏屍, 當年個場冇電冇去水冇冷氣, 充斥奇怪味道...... 好想立即撇, 但行落山行到腳軟好攰下半身郁唔到, 唯有再坐吓.

跟住景點係雙子 ( 斜 ) 塔 Asinelli & Garisenda Towers https://en.wikipedia.org/wiki/Two_Towers,_Bologna , 高 100m 之嘛而家冇乜特別啦, 但如果係中世紀幾百年前已經可以起得咁高, 就一啲都唔野少.

仲要, 呢兩條係以前 Bologna 百幾條高塔之中拆剩嘅 4 條其中之兩條, 意大利人, 真係可以好巔 !

2025年1月10日星期五

開齋

變咗喇.

講緊, 係我嘅口味.

最近除咗戒牛肉, 尋日仲主動提議食齋, 嚇了朋友一跳 ! 間餐廳 '圓 yuan' https://lubuds.com/yuan/ 其實開咗已經一年多, 評價超高但一直冇考慮去, 點解 ? 因為係食齋囉 😆

不過自從上年喺上海 / 北京食過啲好食嘅齋後, 介心已經放下不少, 冇理由去上海/北京食但又唔俾香港一個機會㗎 ? 再加上睇咗馬德鐘 youtube channel 介紹 https://www.youtube.com/watch?v=XBiHa4vm7lo&t=481s 好似幾得喎, check 咗仲有酒賣添 🍷, 所以決定試吓.

又係嗰句 : 唔鍾意咪最多以後都唔去囉 😂😂😂