前幾日, 意大利同事襲港, 除咗密集開會, 就係密集食. 其實有好野吃, 唔應該怨, 但日日中菜, 間間餐廳都話自己叉燒正, 加加埋埋 3 日食足 6 碟, 真係吃不 '燒', 有啲驚.
其中一日, 名牌判頭大老闆請食午飯, 佢同意大利人講起 2017 雞年, 話今年犯太歲嘅 (包括雞, 狗, 鼠, 尤其係兔) 開車要小心啲.
好嘅唔靈醜嘅靈, 話口未完, 尋晚坐的士, 冇嗱嗱比條 P 牌喺 '讓線' 唔識 '讓', 膨一聲炒埋嚟 !
好彩人冇事, 肇事 P 牌女司機, 可能爆驚, 坐喺位成個人定咗形, 目光呆滯咀張開...... <呆若木雞> 原來就係咁 ! 好彩的士佬好人, 冇同佢發飆.
回程唔打的喇, 雖然完全唔關的士事, 但個心有啲怯.
Uber 司機係個後生仔, 一上車, 知道我目的地後好開心, 話終於可以逃出香港. 沿途乜噏好多嗲, 問我點解唔打的搭 Uber, 想老實答佢 : ' 剛剛打的, 炒車, 所以改搭 Uber ! ' . 不過當然冇啦, 怕佢心理質數低, 聽到後嚇一嚇...... 又 '膨' !
話接我張單之前, 幾個客都咁啱住中環半山 mid-levels. 同其中一個住羅便臣道嘅吹水, 話人哋門口大閘成個監獄咁, 又問人識唔識啲鄰居, 個客話唔識, 佢覺得好有問題, 如下 :
( 真 = 我心裡回應 )
( 假 + 而且好狗 = 我當時回答)
1. (Uber 司機) 隔離鄰舍都唔識, 有事點算 ?
( 真 : 戇居 ~ 緊係打 999 啦 ! 隔離屋, 借豉油就得啫, 有大鑊野識條鐵, 鬼 Q 嚟救你! )
( 假 : 有事報警啦, 交咗差餉嘛, 同埋隔離屋未必成日有人 )
2. (Uber 司機) 連鄰居都唔識, 點會有朋友 ?
( 真 : 老實講, 可能我另類, 我啲朋友, 冇一個係鄰居 )
( 假 : 咁朋友都可以返工識嘅..... )
3. (Uber 司機) 返工識? 個客係 banker, 咁識嚟識去咪係中產, 冇機會識到我哋呢啲冇錢但又開心嘅人 (暗示自己嘅現狀) . 比我, 一定唔會揀半山, 寧願住番黃大仙.
( 真 : 你入世未深, 未感受過有錢嘅樂趣啫...... dee dee )
( 假 : 係啦, 羅便臣道都唔係咁好, 樓望樓, 又成日塞車, 黃大仙有人情味啊 ! )
4. (Uber 司機) 個客喺尖沙咀返工, 點解住中環啫, 近啲, 住尖咀佐敦唔得咩 ?
( 真 : 天呀 ~ 我都好想知點解我住火炭, 但又返黃竹坑囉 ? )
( 假 : 可能要就啲細路返學呢 ? )
5. 臨去到我屋企, Uber 司機忽然驚叫 : ' 哇 ~ 原來你都係住半山㗎 ! '
( 真 : 口不擇言, 我今日好脾氣, 比着其他客 '小' 咗你好耐 )
( 假 : 哈 ~ 呢個半山, 同羅便臣道差好遠 )
想問, 如果Uber 可以增設一個服務, 我要呢個 ......
上年11月底 "繡花拖鞋" 被炒, GM 喺攤牌嗰日同佢做咗場大龍鳳, 兩個女人 '瞇' 埋喺 conference room 成 3 粒鐘, 愈講愈傷心, 聽講話 end up 搞到大家相擁, 抱頭痛哭咁誇張.
當時心諗, "繡花拖鞋" 喊, 明嘅 ...... 一路以為自己好巴閉, 平日對人呼呼喝喝, 突然被炒當刻嘅震驚 + 徬徨 + 羞辱 + 憤怒, 真係好難接受架.
但炒人嗰個 GM, 你又喊 ?! 喊乜春 ?
跟住, 恍然大悟, 因為 GM 住港島區, 一定有經過跑馬地馬場後面個 St Michael 天主教墳場, 留意到門口 <今夕吾軀歸故土, 他朝君體也相同 > 對對聯.
GM 喊, 應該係怯, 心靈感應到懷中淚流滿面嘅 "繡花拖鞋" , 內心深處嘅一鼓怨氣 : < 今天我被炒了，並沒有什麼大不了，明天 GM 你被炒的時候, 也會和我一樣 >.
同埋唔好唔記得, "繡花拖鞋" 對拖鞋係紅色, 佢好猛㗎 GM ~~~
事隔數月, "繡花拖鞋" 果然堅猛, 顯靈, 返嚟攞債. 尋日突然收到可靠消息, 老闆決定炒埋 GM !
可笑係 GM 而家身處意大利出緊 business trip, whatsapp share D 同老闆同枱食飯嘅相, 得意忘形之際, 身旁老闆原來密謀緊隊冧自己 !
最最最可笑, 係佢自己一啲都聞唔到𤓓味, 而香港呢邊都已經有某啲人知, 包括我.
都話公司冇秘密㗎啦.
好想講吓一餐完全意想不到嘅晚飯.
今次工幹去 Florence, 有大鼻孔判頭 (蘇德華) 同行, 當然盡最大努力, 搵啲靚地方吃.
找到個叫 Enoteca Pinchiorri (簡寫 EP) 嘅餐廳, 網上 book 位, 好快有 return email confirm.
有聽聞過嗰度好高級, 但睇網頁, 老闆廚師個個笑容親切可恭, 應該唔會太認真吧.
當天下午同義大利同事提起晚飯地點 EP, 個個第一反應都係 look 大對眼, 擺出一個趨之若鶩嘅神情 ! 定驚後, 有人提醒 : ' 你哋記得要著 formal 啲 '. 當時心諗 ...... Florence 又唔係巴黎米蘭, 有幾 formal.
結果, 我係好錯, 好錯, 好錯, 錯到不得了.
臨去 EP, 力挽狂瀾, 問同行嘅人, 有冇啲比較見得人嘅衫. 結果有人話自己只係帶咗個 hand-carry 嚟歐洲, 最 ok 已經係身上件 The Northface 風褸, 我已經知道出事.
 |
| 餐廳老闆 |
入到去, 我哋四條友明顯格格不入, 因其他客都著得極為隆重 (black tie / lace / gown), 去 ball 咁. 其實我覺得, 坐低食餐飯攪成咁, 有點誇吧.
雖然樣衰, 好彩冇人歧視, 佢哋人海戰術, 以 3 : 4 嘅比例 (2 waiters + 1 sommelier vs. 4 guests) 招待我哋.
餐牌貴係意料中事, 最震撼係個 wine list, 全部酒價錢 3 位數起跳, 唔係港紙, 係 euro !
我認真研究過, 佢完全冇 non-vintage, 乜都係 vieilles vignes / special edition, 酒牌最平嗰支, 要 245 euro.
因大鼻孔判頭 (蘇德華) 話錢完全唔係問題, 所以我唔客氣叫咗幾支 300 - 725 euro 嘅酒, 埋單 4 個人, 兩皮幾港紙.
 |
| Our bill |
最勁係我隻馬, jet lag 嚟料, 食緊主菜半路中途瞌眼瞓釣魚, 個頭 chok chok 吓, chok 到侍應同隔離枱都喺度偷笑. 咁失禮, 叫醒佢, 佢竟然唔認, 死撐話冇 jet lag, 唔眼瞓喎.
哈, 做咗唔認, 真係要拍哂你啲醜態上網, 出 fb 先得.
第朝返工, 義大利同事好好奇我哋餐飯, 話其實佢哋非常嚮往去嗰度, 不過太高級唔敢去.
講真, 唔太享受. 好想講, 同行嘅太樣衰, 飲兩啖已經成個頭紅色, 食飯又釣魚, 失禮到爆, 令人無地自容.
同埋, 我決定咗以後同佢哋出埠食飯, book 枱一定唔會再用自己真名, 費事搞臭個朵.
後尾得知呢間 EP 原來係意大利 (唔係 Florence) no. 1 嘅餐廳, 唔怪知得咁啦......
當年第一次去 Florence 旅行, 見識到 marble paper, 覺得好靚, pattern 千變萬化勁迷幻, 好想知點整, 但呢門手藝好似好神秘.
終於, 找到學藝途徑, 趁公幹前跑咗轉上山, 去 Florence 附近一個小鎮上課, 除咗可以親手造紙, 仲包埋學 book binding 包書 (啋, 好彩冇馬跑啫).
上山有點難度, 搭公車去, 之後比意大利同事笑騎呢, 話本哋人都唔會搭公車去呢個地方.
唔係吖, 我覺得幾過癮喎.
 |
| 有咁多種紙選擇 |
去到, 有靚女 marketing manager Maria (右) 接待, 介紹公司歷史典故後, 開始包書旅程.
包書過程唔複雜, 但都會要求小小手工, 佢哋提供多種 marble paper 選擇, 我揀咗 ' 綠色流沙 '.
做出嚟好彩都唔失禮, 偷聽到佢哋竊竊私語, 話我一定係靠手藝搵食. 哈~
 |
| after - 釘裝好後嘅書 |
 |
| before - 綠色流沙書皮 |
 |
| Claudio 師傅 |
跟住戲肉嚟喇.
好震撼 ! 原來每張 marble paper 都係人手造, 成個廠一部機器都冇.
而家乜都係師傅 Claudio 整, 一日都係生產120 張左右.
佢示範咗次染 marble paper, 原來製造過程每個步驟比想像急速好多, 唔可以等. 到我做嗰陣, 勁遲鈍成隻蟹咁, 搞到 Claudio 都忍唔住出手幫拖, 先有下面頗見得人嘅成果.
我係超級大迷信, 好在乎意象, 知道冬至同新年 (新曆) 當日所發生嘅, 或多或少會反映自己來年嘅際遇, 至緊要 '老黎'.
最穩陣就係逃避現實, 當日唔出街, 出事機會率會低啲, 但唔 = 0, 因為家居意外無奇不有, 我都試過喺自己屋企趴街, 額頭爆光聯 5 針.
今朝起身, 掙扎咗陣, 去唔去騎馬好呢 ? 最後, 都係去, 同 Marky 講 Happy New Year 嘛.
可能早得滯, 啲人倒完數未起身, 交通出奇暢通, 同埋連過 6 - 7 個燈位都係綠燈, 真係未試過, 驚 !
出到 highway, 成條大直路吉嘅 ?!
雖然係 Formula-1, 但我一啲都冇超速. 慢慢揸, 自得其樂之際, 喺倒後鏡睇到不遠處有架麵包車高速咁 '片' 上嚟, 完全無視超車安全距離, 貼住我左邊車頭 cut 入嚟 !
 |
| 麵包車 |
妖, 係架 P 牌.
之後見佢好似趕住去死咁喺前面啲 5.5 噸同貨櫃車群中左穿右插, 險象環生. 條茂里咁嘅開車態度, 遲早出事.
騎完馬, 回程途中, 喺吐路港公路大埔南, 又有架毒品快車 look 嘅 P 牌 benz C-class 小路出大路, 燈又唔打, 話出就出 ! 條 pk 老馮咁掂行掂過, 仲屈隻手臂出車窗外, 懶型咁踩油, 好似快鏡咁飆走.
好
x 憎人唔打燈 !
最扯火係我行緊 90 km/h, dup 晒車讓佢, 油都蝕埋. 不過都算好彩, 反應得切, 如果比條 pk 隊咗埋嚟, 咁樣開年就真係唔 '老黎' 喇.
P 牌好恐怖, 尤其係後生仔揸嗰啲, 好危險, 生人勿近.
完全冇安全意識, 開車好似抽筋咁, 平時喺路面時快時慢, 話 dup 就 dup, 跟着佢後面真係比佢玩殘.
出到公路就車神上身, 前世未快過, 喪飆狂轉線, 又唔知自己睇位差手車屎, 害己害人.
