忍咗幾日, 終於忍到初三赤口, 可以開口鬧人 !
年廿九情人節 ( 14 Feb ) 同同事喺公司樓下打的, 由黃竹坑出銅鑼灣食 lunch , 無端端, 而且連環地, 比兩條的士佬寸爆兼拒載.
公司樓下有條不明文嘅的士隊, 但好多人成日搏老懵, 就算見到成條水蛇春隊喺度排, 都竟敢扮唔知死去前面截糊.
嗰日成條街一架的士都冇, 食風等咗好耐先有車嚟, 準備上車之際, 前面突然殺出個工人姐姐同兩個細路打尖, 的士佬明明見到條人龍, 都仲停比佢哋上. 見有小朋友讓佢上先, 但始終同事有啲火滾, 走前問司機條隊喺前面, 點解比打尖嘅人上車. 點知條的士佬好囂張, 攪低個玻璃窗大聲反駁 : ' 睇唔到喎 ! 你做乜鬧我呀 ! 我係唔鍾意載你呀 ! '
痴線㗎 ! 😡 好嬲但又 call 唔到 uber, 唯有再等. 幾分鐘後終於出現第二架, 喺落客之際, 竟然又有另一工人姐姐衝出截糊 ! 今次真係忍無可忍, 唔可以再同佢客氣, 周圍咁多 playgroup, 個個攬住條細路打尖都要讓, 幾時先上到車 ? 跑前叫佢哋唔該排隊, 根住就同同事跳上車.
當知道我哋去銅鑼灣, 條四眼扎辮仆街竟然話唔去, 咁我話即係拒載啦, 佢話 : ' 我都未起旗 ( 落完客未起新錶 ), 冇話做你哋生意喎 ! '
嘩, 咩料呀 ? 去銅鑼灣 ju 喎, 我哋有乜得罪你呀 ?
佢老味, 如果我係大隻佬一定當場揼實佢 ! 不過當時已經遲大到, 唔得閒爭拗. 同埋為啲咁低質嘅人嘮氣, 唔值得, 但我好記得佢個死人 fxxking 車牌 - 721 囉 😡
喺香港打的無數, 從未遇過咁惡劣嘅司機. 成個的士行業, 就比呢啲仆街害群之馬搞爆, 所以都唔好怪 uber 搶生意.
經過中午不快事件, 唔想再搭的士受氣, call uber 返歸. 唔知搞乜, uber black 竟然仲平過 uber-x, 咁當然 black 啦.
第一架顯示接客中, 要 12 分鐘先到, 點知等咗 10 分鐘司機打嚟, 以為確認位置, 原來問我係唔係過海, 我話過, 佢就話有事唔得閒, 麻煩我 cancel order.
😡 妖 ~ 同日 3 次碰壁, 連 uber 都拒載, 開始覺得係自己有問題.
實在要返屋企, 唯有再 call 過, 好彩好快有人應, 落到樓下, 眼前一亮 😍, 架車同車主外型都好有質素.
途中車主打開話題, 說話有分析力又有見地, 好有才俊 feel. 遇上塞車, 想趁機飲埋手中嘅香檳 ( 註 : 我攞咗杯香檳上車, 公司開 P 飲剩, 唔好嘥 😆), 可惜車主太有禮, 每同我講嘢就望倒後鏡嚟個眼神接觸. 唔可以比佢見到我一路坐車一路飲酒嘛, 因此杯檳就由黃竹坑揸到入火炭, 變成熱檳.
差不多成粒鐘嘅聊天中, 得知車主有幾間公司, 大茶飯根本唔憂米, 揸 uber 無非出於好奇, 想接觸多啲人. 呵, 原來係咁...... 都覺得奇㗎喇, 冇理由揸架咁食油嘅車去搵食嘛; 同埋, 仲係用自己車喎, 因車牌號碼同佢手機最後嗰組號碼, 係一樣嘅 😏
呢程車簡直係享受, 車廂清潔, 服務質素高幾皮, 司機有教養, 有水準.
我認為 uber black 同飛機 business class 概念相似, 令人有選擇, 可以用錢買好啲嘅 service. 坐的士就冇得揀, 9 成司機開工都悔悔氣氣, 路程唔啱心水就 chok 人黑面, 貼錢買難受.
年紀愈大愈迷信, 踏入 2018 戊戌狗年, 迷信程度更上一層樓. 尋日年初一, 七點幾起身唔敢即刻落床, 因為有兩個隱憂 :
隱憂 1.
過年習俗大年初一唔可以瞓晏覺, 會影響事業運 - 咁好唔好再瞓耐啲, 減少下晝眼瞓嘅機會呢 ?
隱憂 2.
李居明話瞓醒要揀個吉位落床, 咁先有運行 - 今年最吉嘅東 / 東南 / 南位都比窗台頂住, 唔通個天都唔幫我 ?
咁搞, 唯有用排除法, 嗱嗱臨上網, 搵出今年凶位. 最後, 好有技巧咁落床, 避開五黃 / 二黑 / 是非位.
為咗進一步有運行, 不咁怠慢, 快啲重溫農曆年初一禁忌先.
* 後果用紅色顯示 ( 呵 ~ 信者有, 不信者無 )
1. 忌打破東西 --> 破 $ 破運
[ 呢個我 buy, 真係會唔老黎㗎, 如果家人親戚朋友有破壞王, 祈求自己好時高運吧 ! ]
2. 忌洗頭 --> 會把 $ 洗掉
[ 以前屋企人嚇我, 如果初一洗頭, 祖先要飲晒我哋洗頭嘅水...... 好驚囉 😧 ]
3. 忌叫催人起床 --> 會讓對方整年都被別人催促做事
[ 有賴床習慣嘅人, 年初一終於可以得呈喇 😆 ]
4. 忌吃粥 --> 會導致一整年貧窮, 因以前啲人窮吃不起飯才吃粥
[ 記得前幾年年初一突然想食粥, 結果食咗, 嗰年好貧窮就冇, 但因轉工關係未攞到 bonus, 入息真係比平時少咗 😠 ]
5. 忌煮新飯, 要吃除夕剩下嘅飯 --> 寓意去年食物吃不完, 今年有剩餘
[ 家陣個個都話要減肥, 呢個唔係太大影響 ]
6. 忌睡午覺 --> 影響事業運
[ 自從得知呢個唔好瞓晏覺嘅禁忌後, 可能心理作用, 竟然真係會喺年初一下午 3, 4 點覺得特別累, 好想好想瞓, 簡直係意志嘅考驗 ]
7. 忌洗衣物 --> 水神生日, 忌洗衣
[ 水神生日應該停止一切關於水嘅活動, 唔好沖涼飲水. 唔明點解只係唔可以洗衫, 哈 ]
8. 忌掃地, 倒垃圾 --> 掃走 $ 與好運, 將財神爺送走
[ 我原本都唔係好鍾意掃地同倒垃圾, 呢個農曆年財神爺喺我屋企留 10 日 8 日, 完全 no problem 😎 ]
前兩晚, 舊同事火鍋聚舊, 其中包括一個已移民海外嘅前顧問, 我哋同佢洗塵暨送行 ( 返港後第一次見, 又係佢返歸前最後一次見 😆 ).
呢條顧問, 識佢超過 12 年, 正一溝女怪 ! 當年同佢去大陸出差, 無時無刻都正在搵食, 就算喺客 ( 我 ) 面前都完全不留情面咁聊女, 絕對唔收斂.
呢世人, 未遇過一個對女性咁 keen , 咁嗒糖, 咁有興趣嘅人. 如果香港冇王管, 可能佢真係會周街強姦人.
嗰陣以為佢風流成性, 個底會好花, 身邊大把女人. 但我錯喇, 原來佢有個拍咗廿年拖嘅固定女友 ( 現任老婆 ) , 仲係青梅竹馬一齊出國讀書嗰隻.
10 年前終於結婚, 生咗一仔一女, 成日 post 啲幸福家庭照出嚟, 羨煞旁人. 移民後冇乜動靜, 以為佢玩夠, 修心養性.
 |
| 豬扒 |
哈, 經過火鍋嗰晚 after dinner drinks, 我加倍感受到乜嘢係 ' 江山易改, 本性難移 '.
條友基本上由步入夜店當刻, 人狼程式已 auto-connect , 立即啟動, 跟住不由自主不斷覓食, 唔理好醜最緊要就手, 同我哋飲唔夠 3 分鐘, 已經過枱溝女.
睇見啲所謂被溝嘅女嘅質素, 肯定當事人一定醉咗, 但見佢其極為雀躍, 仲竟敢笠咗我哋枱支 magnum 香檳去請班豬扒飲. 呢啲, 咪係 ' 覆水難收 ' 喺夜店嘅演繹囉 !
第朝 send 張豬扒寫真比大家開心 share, 望真啲 ...... 😱 哎呀, 好彩人哋唔受溝, 而佢又冇同豬扒搞乜 ja ...... 如果唔係 🙈🙉🙊
2018 第 3 轉出差 ⇢⇢⇢ 曼谷.
已經幾年冇去了, 桃花依舊, 人面都竟然依舊 😆 只不過感覺有啲唔同.
有乜唔同 ? 就係各方面都覺得冇咁驚嚇囉.
第一次去泰國, 廿幾年前放暑假返香港, 個 friend 先斬後奏, 同我報咗團, 仲比晒錢, 騎虎難下, 唯有戇居居去一轉, 結果蒙上陰影, 睇 / 遇到畢生難忘嘅兩件騎呢事 :
1. 曼谷蛇園
平生同蛇最親密接觸只係食蛇羹, 唔明點解蛇園可以係觀光景點, 人蛇共舞表演, 好睇咩 ? 比條大蟒蛇纏上身合照, 好玩咩 ?
雖然過咗咁多年, 而家都仲好記得由進入蛇園, 到步出嗰刻, 嗰種驚慄同渾身不自在感. 萬一上到旅遊車先發現有條蛇走咗入自己褲襠, 真係好得人驚.
2. 芭堤雅性愛真人 show
匪夷所思, 個團男女老幼, 搞乜會帶我哋去睇呢啲 🙈. 泰妹表演特技, 下體放出一隻又一隻雀仔, 啲雀周場飛, 我哋四圍避. 哇 ~ 比佢兜頭撞埋嚟, 10 年都冇運行.
 |
| 小露寶 |
跟住戲肉真人 show, 條鬼搞極都唔起, 正當我戥佢兩個冇著衫凍之際, 後坐傳來一把女聲 : ' 小你露寶 ~ 搞乜呀, 含到牙都爛 L 埋都未 L 得 ! '
厲害 ! 擰轉頭望吓, 嘩 😍😍😍 有條同張柏芝出道嗰陣咁上下靚嘅靚女, 喺度咆哮 ! ( 後尾識咗, 原來佢係差婆 )
經此一役, 對泰國印象麻麻, 覺得啲嘢古靈精怪, 跟住每次去曼谷公幹, 都心緒不寧. 同埋唔知係咪聽得泰國鬼故多, 養鬼仔, 降頭, 又乜又物, 明明冇, 都自己嚇自己, 喺酒店未試過一覺瞓天光.
曼谷打的係另一噩夢, 溝通唔到係必然, 自己一個搭, 人生路不熟, 曼谷夜晚啲街又暗, 加上有時啲司機會喺倒後鏡望住你, 然後喃喃自語陰陰咀笑, 咪話唔驚.
好在幾年後嘅今日, 終於有救, 因為有 Uber, 明碼實價, 又平又正.
不過曼谷超塞車, 趕時間最好都係搭 skytrain BTS, 可惜現時覆蓋範圍未算多, 好似話呢一兩年會再開通多兩三條線, 希望會再好啲啦.
出完今次差, 發現
曼谷人其實好有禮貌, 好友善同好 nice ( 起碼比香港人 ), 只不過係自己之前一直戴有色眼鏡睇佢哋.
親身經歷 : 路不拾遺. 好多年前由酒店打的去夜蒲, 喺的士賴低咗部幾靚嘅相機懵然不知, 的士司機竟然車番部相機返酒店, 叫酒店交番比我 !
有次同朋友自駕, 半路中途爆呔, 路邊有陌生人走嚟幫忙換呔, 搞到身水身汗, 污糟邋遢, 事後竟然不收分文嘅奇事 ! 😱
我嘅驛馬年, 好明顯係 2018.
上禮拜啱啱跑完新加坡, 隔兩日就要飛墨爾本.
出發前上網摷旅遊資訊, 好似冇乜特別地標, 市內景點竟然 5 隻手指數得晒.
( 說明 : 個人對景點要求頗高 - 火車站, 動物園, 球場 - 唔算 ! ).
 |
| Hosier Lane 塗鴉 |
連去巷仔睇街頭塗鴉都可以係觀光必到之處, 潛台詞顯而易見, 真係要冇嘢搵嘢嚟做 : 悶蛋.
墨爾本被評為有良好生活條件, 貴為世界最佳宜居城市榜首.
T2 落機等埋行李已經半夜 12 點, 到去的士站, 人聲頂沸, 但的士只得小貓三四架, 好稀疏, 搞到啲人亂插隊, 全冇秩序可言, 羅湖都冇咁衰 !
排隊唔夠一分鐘, 已經目擊四班人因爭車上扯火嗌交. 其中一個推住 BB 車嘅四眼華裔女人, 好明顯爭輸咗, 向前面上緊車兩個鬼佬, 用廣東話粗口破口大罵 ( 係好粗好粗連男人都少講嗰隻 ), 佢老公就企喺旁邊觀戰.
初到貴境, 第一印象真係好緊要.
當刻腦海立即浮現 : ' 世界最佳宜居城市, 良好生活 ' 😂
 |
| 酒店天台泳池 |
跟住逗留期間, 好彩冇不快事件, 最最最僥倖, 就係避過咗高溫. 喺墨爾本嘅日半風和日麗, 十幾廿度好舒服. 同事話, 我哋到達之前啱啱嗰日, 都仲成 40 度㗎.
當地 UV 好勁, 陽光特別𥋇眼, 出街唔帶超, 一定好快白內障. 晨早 8 點太陽照落皮膚嘅灼熱感, 竟然同喺香港中午一樣 ! 唔怪得澳洲皮膚癌病發率世界第一啦.
酒店天台有個好搞嘢嘅泳池, 有小部份凸咗出街, 游游吓望落街, 應該幾過癮. 可惜我身材太差, 無謂獻醜.
經過中午不快事件, 唔想再搭的士受氣, call uber 返歸. 唔知搞乜, uber black 竟然仲平過 uber-x, 咁當然 black 啦. 
