窮遊香港

接獲投訴話我成日唔 post blog, 係嘅 ...... sor 🙏 , 除咗近排冇乜特別嘢好寫, 仲要撞啱公司今年度第二次裁員, 正所謂生死未卜人心惶惶, 又點會有閑情寫呢.

終於, 上禮拜要炒嘅人被炒晒喇, 留得低嘅, 就再等傳聞年中嘅下一 round. 

所以今日放鬆番少少心情, 窮遊吓久違了的香港, 去咗個可能大家聽都未聽過, 但又激發到我的起心肝出 post 嘅地方.  

講緊嘅係 [ 元洲仔自然環境保護研究中心 ] https://fso.createhk.gov.hk/tc/location/detail.php?id=190, 即前新界政務司官邸, 想參觀的話要報導賞團, 諗住 walk-in 搏吓 ? No 啦.

一向對殖民地風格建築特別偏愛, 紅磚, 壁爐, 高樓底, 落地大窗, 一見就 💗💗 眼, 可惜有人眼冤, 大開殺界, 見一間拆一間, 而家喺香港已經買少見少. 

屋外山環水抱自成一隅, 鳥語花香, 唔怪得當年住喺度嘅前布政司鍾逸傑, 諗到咁多德政啦.

 

連通往傭人宿舍嘅走廊, 都靚到好似地中海咁, 打工嘅心情靚靚, 自然就交到好貨出嚟.

不過最驚艷係花園, 去過歐洲見識可能覺得一啲都唔奇, 但如果香港土生同時栽種到咁多品種, 仲要全部健壯茂盛嘅話, 真係超級 amazing !

內園最吸引我眼球就係棵 [ 紅皮糙果茶 ], 橙色樹幹, 摸落仲似足拜神啲香嘅質感, 好 surreal. 

正當我陷入妄想, 幻想自己係當年高官, 喺官邸優雅地生活嘅時候, 旁邊兩個小紅書不停自 J 瘋狂互拍, AI 膠樣大煞風景, 除咗頭髮, 全部都係假, 大家欣賞吓.

出外靠 ( 害 ) 朋友

唔知有幾多人會好 systematic 地整理同貯存旅行影過嘅相呢 ? 我有強迫症所以有, 估唔到呢次喺意大利可以大派用場 break the ice 😂

其實唔一定要影人, 原來連影過個地方而又能 point out 當年今日嘅不同之處, 都可以令到班意大利人好開心, 然後同你打成一片.

漲爆經理

例如呢張某 Chianti Classico 酒庄餐廳 https://www.antinori.it/en/experience/rinuccio-1180-en/ 經理嘅相 ( 左手邊現在嘅佢 vs. 右面 5 年前, 肥咗10kg - 佢自己話㗎 😆 ), 皺晒眉頭望住張相, 不自覺地用手揞住肚腩不特止, 仲大嗌同事過嚟見證當年非常瀟湘嘅自己, 搞到起晒哄.

冇諗過張相會畀佢咁大打擊 😂😂

不老的女侍應

而呢張係 Florence 某名氣牛扒餐廳 https://parione.net/ 同女侍應 2018 ( 下 ) & 2024 ( 上 ) 分別影嘅. 鬼婆嚟計, 咁多年都冇走樣算好襟老, 我 show 2018 佢睇嗰陣佢激動到咀咗我塊面一啖 💋 !  

跟住就瘋狂畀著數, 甜品甜酒蛋糕源源不絕送上直到餐廳打烊, 辛苦咗兩個 friend, 因為我唔食甜嘢嘛 😅

開心老闆 selfie

至於呢個又搞乜呢 ?

皆因我能夠指出間餐廳 http://www.osterialletestiere.it/ 裝修有乜唔同咗, 加上問多老闆兩句關於烈酒嘅問題, 佢突然 high 爆狂請飲酒, 一共 6 種 😱😱😱😱😱😱 !

又係搞着兩個 friend, 因為我少飲硬嘢嘛 😅😅

太子爺

不可不提威尼斯離島 Burano 黑貓餐廳 https://www.gattonero.com/, 呢個唔關影相事. 

其實我都算係好記性一族, 但太子爺記憶力仲驚人.  2015 第一次去, 2019 第二次佢竟然話記得我仲送咗隻酒杯畀我. 到今年 2024, 坐低冇耐太子爺走埋嚟望咗眼, 就半講笑同啲侍應講叫佢哋小心啲, 因為我識意大利文 😂  

唔係掛, 我人生去過 3 次 ju 喎, 咁都記得 ?!  

爸爸大廚

咁厲害要求合照記認, 咁啱大廚老爸蒲頭, 當然咬住唔放打埋咭啦 ! 

最後結果係甜品連 2 種 digestives 擺低送畀我哋成支隊, 又係委屈咗啲朋友, 因為我唔食甜味嘛 😅😅😅
 

平反拿波里

哈哈哈哈, 唔通 2024 年輪到我學 Peter So 蘇師傅話齋 : 行舒服懶人運 ?  其實唔想懶, 而係跟緊嘅 project 突然取消, 成個 1 月返工日日玩手指, 冇嘢做就唯有喺 office hours 開行 turbo 籌備 2 月意大利旅行, 跟住放工就出去慶祝生日.

機場見到盒朱古力同我行程一樣 😆

今次意大利之旅, 決定早啲到, 整個拿波里 ( Naples / Napoli ) 一日遊考驗自己實力, 之後先同另外兩個朋友喺羅馬會合.

拿波里 1999 年

去過一千零一次, 印象最深刻係港灣超深藍又清澈到喺陽光下好似藍鑽石咁靚嘅海水, 旁邊維蘇威火山, 熱鬧沸騰狹窄街道, 同埋吉祥物 cornicello [ 圖中紅色一條條, 好似 🌶 🌶 嘅物體, 今次我都買咗兩條喺屋企擺吓, 趁吓熱鬧 ].

不停行足六粒鐘, 連踩十幾個景點真係腳軟, 最後行返去搭火車個段 200 米路程, 明明望見個車站喺前面, 但就好似發噩夢咁行極都行唔到去 !!  最後要用雙手拖住兩條腿嚟行, 先勉強去到.

話拿波里危險我唔覺, 可能拿波里人講嘢語氣粗魯, 動作又比較大啫.

成日比人屈佢污糟, 目測拿波里地鐵不知比巴黎倫敦紐約乾淨幾多倍, 街道亦冇垃圾喎.  某 youtuber [ XX好食 ] 仲得意, 話拿波里污糟係因為圍周都係塗鴉 - 竟然將塗鴉同污糟掛鉤 😂😂😂, 笑死 !

其實我有 follow 佢 youtube channel, 除咗口味比較保守外, 大部份資訊都幾 ok. 不過佢強調不值一去, 話人影都冇隻 ( 而自己又冇入去喎 ) 嘅大皇宮 Palazzo Reale, 如果聽佢點就認真走寶 - 凈係呢條咁氣勢磅礡嘅樓梯, 已經值回票價吧 !  同埋, 嗰度邊係冇人啫 ? 我等咗好耐先等到啲人行開, 影到呢張相.

同埋最滿意, 係終於可以重回 Complesso Monumentale di Santa Chiara 修道院, 廿幾年前去記憶模糊, 嗰度好似有個花園, 裡面有好多手繪粉藍主調嘅瓷磚櫈同排排柱陣, 加上周圍橄欖樹薰衣草又紫又綠, 成件事好襯色, 好靚好夢幻.  我當年有影相㗎, 不過比個設計同事一借冇回頭, 後尾仲移埋民玩失聯添 😢 

一輪瘋狂獵影, 跟住下個目的地 via San Gregorio Armeno [ 聖誕街 ].  點解叫 [ 聖誕街 ] ? 因為佢成條街都係賣啲關於耶穌誕生馬槽嘅小雕像, 不過近年就多咗名人球星系列.  一路睇一路諗, 呢條街如果喺香港可以叫 [ 小人街 ], 風水學上, 擺咁多人型喺屋企, 真係身邊想唔出現小人都難 😅.

總結 : 拿波里人係熱情好客的, 喺火車站 order, 侍應斟到就嚟滿瀉嘅一杯白酒就已經完全感受到 😂

沉默是金

尋晚打的, 的士司機因為比架 benz 高速 cut 線而大動肝火, 嘈嘈吓, 唔知點解扯開話題爆城巴司機, 話城巴班人不嬲開車都好狼, 大 Q 晒咁.  

原本都有搭兩句咀, 點知條友愈講愈激烈, 仲無啦啦拉埋上星期灣仔城巴炒的士單嘢嚟講, 我話成件事擺明係個女的士司機衝燈, 責任最大.  

但原來喺條的士佬眼中, 成件事係咁 :

• 完全係城巴司機嘅錯 - 城巴司機覺得自己大 L 晒, 擺明見前面架的士衝燈都唔收油, 照炒埋去.
  
• 女的士司機好無辜, 要坐幾年監 - 香港人人衝燈啦, 個城巴司機明知故撞, 仲撞死埋人哋後坐乘客.

話自己如果唔係基層, 一定出錢俾個女的士司機打官司, 實打贏喎 !  天呀, 乜料呀 ~~~  我真係非常極之唔認同條友嘅睇法, 但人在車上, 無謂同佢爭坳, 最後我選擇唔出聲, 有得條友自言自語, 點知佢都仲可以不停地小城巴, 由大老山鬧到東隧先收聲 😆

 

今朝又搭的士, 由沙田新城市廣場返屋企, 行到路口要轉右, 四條行車線理應靠最右線啦, 唔知點解個司機一路都直行唔可以右轉嘅中線, 臨到最最最最 last minute, 先突然喺轉灣白色斜線位急抽入右線, 想 sharp cut 架五噸半, 差啲炒不特止仲比後面啲車狂咇 ! 

明明就係自己爭輸咗, 可能落唔到台，一路開車一路鬧, 話個五噸半司機駕駛態度有問題，當正架車係跑車, 揸得唔快唔慢 ( 😂??? ) ，咁揸法遲早死！ 佢係咁喺倒後鏡望我，好似好想我俾D共鳴, 黐線, 一於扮聾唔睬佢.

唔識聽就睇餐牌啦

 

上海臨時臨急約食飯, 除咗對食物有要求, 仲要靚裝 ( 修 ), 好難先搵到間又未去過, 又風評唔錯, 位於 UCCA Edge 尤倫斯當代藝術中心 3 樓嘅一星 New Wave by Da Vittorio. 

高樓底簡約玻璃屋設計, 我覺得日頭去會再靚啲.

主打住家風味意大利菜, 開胃菜 番茄蜆肉麵包屑濃湯, 好飲到爆, 加埋熱烘烘脆皮 意式香草麵包, 頭盤都未上就已經肯定今次冇揀錯地方.  

因為太耐冇去大陸, 普通話聆聽能力大不如前, 服務員介紹餐牌聽得一頭霧水. 我唔食菜, 不過諗住叫啲菜俾其他人食, 點知就嚟咗碟同菜差十萬九千里, 上到枱全人類 O 咀, 仲要成千六蚊碟嘅 " 碳烤海鲜 " 😂😂😂😂😂😂😂  

啲菜呢 ? 原來係我擺烏龍聽漏咗菜名嘅前半截 -- 碟嘢全名原來係 碳烤海鲜搭配時令蔬菜, 人哋主打碳烤海鲜, 唔係時令蔬菜囉大佬 😂😂😂😂😂😂😂😂😂😂😂😂😂😂😂😂😂😂😂😂😂  好彩啲海鮮非常新鮮, 眾人十分滿意.

笑餐飽, 跟住嚟嘅 魚子醬 . 焗薯蓉 . 酸忌廉 同當造 白松露 . 水蒸蛋配榛子, 一黑一白, 天上人間.

但最驚艷, 竟然係賣相平平無奇嘅 肉醬千層麵 ( Lasagne ), 啲麵皮好似雲吞皮又薄又滑, 實在太非一般, 美味到唔識形容, 暫時係喺意大利境外食過最好嘅.

食到尾聲, 餐廳喺對面佢哋間 cafe 擸咗七碟 gelato,  七種唔同味道請我哋試食, very nice.

千祈唔好攞最面嗰塊

上海除咗係我亞洲去得最多嘅地方, 仲係我第一個搭飛機飛降落嘅大陸城市.  但無論去過幾多次, 每次去完都失憶, 好似俾人 reset 過咁, 到今時今日街道東西南北完全搞唔通.

尋日快閃飛上海搵朋友食晚飯, 今日下午已經飛返番嚟香港, 好癲.

 

上海夜生活精彩到不得了 !  諗起班愛國愛港高官自我感覺良好, 搞埋啲晚黑 10 點已經全民返晒屋企嘅死城夜繽紛 😆, 笑死.

因為成三年冇去, 所以特別安排住番喺浦東陸家嘴一個幾有代表性嘅地方.  有乜咁代表性 ?  就係疫情前連續兩年聖誕時期入住, 食早餐嗰度狂 loop 洗腦聖誕音樂. 今次特登返去住, 目的係想聽吓嗰度仲係唔係播緊同一個 playlist. 成件事係咪非常 obsess 兼變態呢 😂😂😂

今次房租不 "含" 早餐 ( 大陸 "包括" 叫 "含" 😂 ), 非常有誠意地俾成 RMB178 坐低食, 結果聖誕音樂已經換咗, 但驚喜就係同一班服務員, 依然健在.

正當沈醉於別來無恙, 尋回失去日子之當刻, 俾我親眼目擊一個駭人場面 : 有個客夾 salami 嗰陣跌咗塊喺枱面, 經理行過, 以為神不知鬼不覺, 竟然 徒手 揦番塊喺枱面攤唞咗幾分鐘嘅肉入個盤度 😱😱😱😱😱😱😱😱😱 

事發後衝去案發現場影個大特寫, 左手邊第二行最前面嗰塊, 就係經理親手擺番上去嘅 salami.

 

食髓知味 II

曼谷暴食第二晚, 重遊熒火蟲餐廳  http://shirliek.blogspot.com/2020/02/blog-post.html, 上次去環境太暗揸機手震乜蟲都影唔到, 今次有備而戰, 帶埋腳架慢慢曝光, 終於得手 💪 

疫情洗禮竟然捱得住, 不過餐廳面積縮水不少, 入口泥牆吊吊揈藝術裝置今日已經冇咗.   

當年園林實景高樓底用餐區,現在變咗個十足 backstage 四周圍起黑布簾嘅黑房, 乜景都冇, 好齋. 心諗, 搞錯呀, 唔係咁慳皮嘛......

好彩嘢食仍然保持水準, 材料豐富海陸空齊全, 10 道菜 tasting menu 唔駛 8 百蚊港紙, 價錢實惠. 同埋見過鬼怕黑, 每道菜我會望清望楚, 確定冇恐怖蜜蜂幼蟲先吃 😆

食咗成個鐘頭盤, 差不多上主菜嘅時候, 忽然熄燈眼前一黑 👀  布簾打開, 簾背後係玻璃房, 裡面無數熒火蟲空中飄浮, 時暗時亮, 浪漫奇景, 好虛幻 ( 有片 ) !  

 

 

 

伸手不見五指大約再多 5 分鐘, 餐廳亮起綠色天花燈, 等客人可以邊食邊睇, presentation 同幾年前唔同, 因為上次係要食完先走去另一間黑房睇. 

 

井底蛙, 唔清楚世界上仲有冇其他熒火蟲主題餐廳, 但呢間非常值得一去, 尤其係冧女, 一定要去.