追憶逝水年華

N 年前返娘家, 食食吓飯老豆同我講, 話香港啲人真係不知所謂, 返工竟然可以喺 office 打邊爐, 好離譜 ! 問佢點知, 佢話睇電視訪問 headhunter 講嘅.  

當年真實圖片 1 . 個爐係我私伙 😂

哈 ~~ 條 HH 消息又幾靈通喎, 同老豆講, 做 XX 嗰陣我都有喺 office 打邊爐喎 😆  就喺當刻, 我哋 dead air 咗......

當年真實圖片 2 

當年趁老闆每次出 trip, 我哋都會安排好多活動, 例如揸車去中環 | 赤柱 | 山頂 | 大浪灣 | 雙魚河食 lunch.  

講到最狼死, 一定係經典嘅 office 邊爐 ! 大家裡應外合, 有組織同預謀, 早上兵分幾路喺香港各地搜集新鮮食材 ( 我仲唔知點解走到去西營盤咁遠買烏雞 😄 ). 當日下午食飽飽, 攞住盆油淋淋血紅色嘅麻辣湯底去 toilet 傾倒之際, 喺走廊撞正隔離單位剛剛出門嘅鬼婆, 嚇到佢眼都凸 😂😂😂 

已經係十多年前嘅事, 雖然我哋呢班人現已各散東西, 難得感情依然非常要好, 時不時見面都會講番當年啲 on 9 騎呢嘢, 次次笑到喊.

一班老餅都可以型爆

有人提議不如整轉快閃上海 ( 因我哋曾經喺上海都做出不少駭人聽聞嘅嘢 ), 當然一呼百應啦 !  三日兩夜玩得好開心, 一班認識差不多 20 年嘅人, 由同事變朋友唔簡單.

原本收到 order 有個任務, 要我去隊冧其中某人, 出發前講到眉飛色舞, 但到最後關頭, 我都係決定唔好搞嗰個人喇. 唔好啦......

食出個冷感

查實 Le Petit Chef 呢壇嘢 https://lepetitchef.com/  玩咗好耐, 而家, 終於 ! 殺到香港 Grand Hyatt. 

全民北上消費, 香港餐廳拍烏蠅 / 喫晒蕉, 但小廚師 Le Petit Chef 就一枱難求, 晚晚翻枱兩輪都 fully book 生意好到不得了. 個人認為餐廳係上海 Ultraviolet https://uvbypp.cc/  嘅 A 貨, 呵呵 ~ 不過喺香港, 用 1/3 價錢就可以獲得差無幾嘅享受, 抵到爛 😜

一坐低, 服務員分派每人一頂 "廚師帽" + 枱面戴住廚師帽嘅熊人公仔 + 碟上不斷穿梭游走嘅小廚師動畫 3D 投影, 成個組合搞到全場女性生物 ( 包括同枱朋友 ) high 爆, 喂哇鬼叫好 Q 嘈 🙉🙉🙉 !  

我諗我係在場唯一一個冇嗌過嘅女性, 因為喺我視角只係見到成棚瘋婦, 個個戴住頂 "一見發財", 係又影唔係又影, 狂 selfie 😒  最驚悚, 佢哋不停又攬又錫啲已經俾人捽過 N 次, 捽到層毛都起晒蠟嘅熊仔 😲😲😲 !

眾人騷動之際, 驚覺原來自己係個唔能夠對可愛事物產生情感嘅怪胎. 

不過咁, 小廚師啲嘢食 (法國菜) 都幾 ok, 成晚最欣賞個Bouillabaisse 海鮮湯同 Canard en papillote 紙包鴨腿, yum yum ! 

蛇王 lunch

窗外景觀就係望住我住嗰度 😆

尋日好日, 偷得浮生, 去屋企附近工廈私房菜 https://www.facebook.com/winelok/ 食個靚 lunch. 

好 I,  唔 social 嘅自來貓女 

18/F 一出𨋢, 成條走廊已經充斥住超香嘅煮食味道, 餐廳地方非常骨子, open kitchen, 仲有個小酒窖添. 上年九月食晚飯覺得幾好, 今次第二次幫襯. 

喺呢度食特別有親切感, 點解 ?  除咗近屋企, 仲因為廚師以前係做三行 ( 裝修 ), 咁我同佢話晒都算做半個行家囉 😛

隻 I 貓成餐飯係咁偷望我, 以為我睇唔到 😂

唔好以為裝修佬一定粗粗魯魯, 爆粗擔住口煙, 剩係識食蒸魚飯 😆  

呢位廚師非一般, 外表不但斯文, 煮西餐仲有番兩度散手, 幾有 heart 㗎, 我覺得味道勝過香港某啲自稱法國藍帶嘅廚師好多.

私房菜, 午餐 $288 三度菜唔貴, 唔收加一不特止 BYO 仲要免開瓶.  我哋嗰日包場 ( 冇其他客 ), 點都要識做喺小酒窖 order 兩支酒, 慢慢劈支持吓.

我同 friend 一致認同個 [ 風乾火腿甜瓜沙律 ] surprisingly 地好食, 廚師自製 10 小辣香草 salad dressing 畫龍點睛, 提升成件事嘅層次.  哈蜜瓜刨到薄一薄, 單手就可以連埋塊風乾火腿一啖食, 爽 !  學到嘢, 下次屋企宴客, 一於照抄 💪

我主菜係

[ 焦糖🍎黑毛豬扒 ], 肉肉鮮嫩多汁, 其實豬扒冇太重調味, 全賴焦糖 🍎 加埋淡淡黑醋帶出豬肉嘅鹹香.  

識我嘅人, 都知我唔同生果黑醋做朋友 😄  但今次呢個組合, 又真係接受到, ok 喎.

 

其實你哋屋企係咪冇鏡㗎 ?

工地窗外的美景 . 山頂纜車

尋日落地盤
, 聽到兩個工程人員對話, 內容係佢哋發現有幾個 "鑊氣" 位 --> 現場尺寸同客戶顧問公司 order 嘅訂製傢俬有出入, 組件嚟到實裝唔落.  

其實仲夠時間, 比我一定會同顧問單聲, 叫佢聯絡廠商儘快修改尺寸.  點知, 工程佬竟然話唔會通知條顧問, 由得佢爆鑊, 等佢到時俾個客小爆.  唉 ~ 乜啲人咁㗎 ? 我知顧問同佢哋有牙齒印, 但都唔可以咁搞囉, 嘥料嘥錢嘥時間, 啲嘢要翻手做不特止, end up 咪又係要侷住同條顧問再對耐啲 ? 攬炒 😑 !

冇眼睇, 轉場走去荃灣見客先.

驚艷 ! 美女手持嘅水壺同套衫一啲違和感都冇 

早咗到, 喺酒店大堂呆等, 魂遊太虛其間發現原來荃灣而家咁多靚人, 仲犀利過中環.

目不暇給, 視覺衝擊浪接浪, 佢哋一身充滿自信嘅打扮完全展示最強 body, 無私分享, 讚 👍 !

 

呢個 . 可以做我男友 😂

刺激之下腎上腺素飆升, 忽然醒起自己其實一直都有拍攝 "街頭時尚" 習慣, 以作參考, 近貼潮流學習時下穿衣之道. 

因 data base 太大, 資料又各散東西, 暫時只找回小部份, 在此開心 share 住先 😜 

( 始終, 靚女比例都係高一些 ).

Dear John,

去到每間公司做冇耐, 老闆都會擺我上枱, 叫我出手炒人, 果然不出所料, 今次都係. 

因為公司近排香港生意唔係咁好, 連 probation 都未過, 大老闆已經下旨要我開刀香港 office 一個小薯仔. 小薯仔工作態度良好, 人又單純, 炒佢實在有啲可惜.  所以已經施展渾身解數拖延咗幾個禮拜, 希望用時間沖淡, 但最終上週二收到老闆最後通牒 : 一定要郁 😕 !

咁炒人需要嘅文書 / 賠償金結算, 當然要由 [ admin 女人 ] 安排同計數啦, 點知我叫佢 draft 封炒魷信嗰陣, 佢話以前炒人都係 line manager 自己出 email, 佢阿姐係完全唔駛做任何嘢嘅, 態度非常大支嘢.    

唔係嘛...... 用 email 炒魷咁唔尊重, 唔得囉 !  我堅持要阿姐佢出信, 條女人轉頭死死氣整咗個 draft, 敷衍我 :

 

真係慘不忍睹, grammar 錯 Q 晒不特止, 又冇說明解僱原因, 同埋出公司信點會用第一身 " I " 㗎 ? 就當佢唔識用 AI, 但喺 google search 吓都有十九幾萬個 redundancy template 可以去照抄啦, 竟然夠膽死交啲咁嘅行貨 😡  

第一時間忍住唔發火, 先 save 低個原稿, 好好保存, 留待第日炒 9 條 [ admin 女人 ] 嗰陣 email 佢  💪💪💪 !  

嗰晚, 返屋企途中愈諗愈㷫, 同朋友 whatsapp 分享當天遭遇, recap " 如下 "

" 當公司個女人知道要裁走小職員後，立即戴晒頭盔同我講，話佢「唔識」做以下小職員做開嘅嘢： 

1. 交電費
2. ⁠訂飲水機水
3. ⁠每年網絡續約
4. ⁠交電話費
5. ⁠出 PO
6. ⁠安排年度清洗地氈冷氣
7. ⁠安排阿姐清潔日程表
8. ⁠叫速遞
9. ⁠銀行過數入數
10. ⁠影印機冇紙入紙

真係厚顏, 連智商 80 識做嘅嘢都話自己唔識做, 我真係心服口服 😂😂😂 

我當刻答佢:「 你唔使咁擔心, 我係 GM, general manager 即係要 manage 所有嘢, 我會幫你做晒㗎啦 ! 」"

小薯仔其實係 [ admin 女人 ] 直系下屬, 當女人知道小薯仔即將被炒, 表現莫不關心之餘仲竟然閃電割蓆, 話唔知小薯仔平時做緊乜 ( 唔係掛 ? 人哋平時同你做哂啲下欄嘢個喎, 有乜可能唔知 ? ), 叫我最好就同其他同事協調, 了解佢哋有乜需要交收, 講到件事完全同自己無關咁, 正百佳 !! 

聽到 [ admin 女人 ] 嘅呢一番 BS, 唔知點解我忍唔住喺佢面前大笑咗出嚟 😂😂

巴黎今次你贏

今年做咗個特別舉動, 好串咁整咗個巴黎 3 日快閃, 目的只係想拍一張照片.  

話說, 我分別喺 25. 35 同 45 歲, 在巴黎同一地點 https://maps.app.goo.gl/b2yRog3pmCeNzSAz7 影咗張相, 前幾年睇番相簿先發現呢個完全冇組織同預謀嘅巧合 !  好特別, 想再延續呢件事, 所以決定策劃一個 55 歲重返巴黎之旅, 慶幸得到朋友支持, 同我一齊飛過去顛 😜

右至左 : 我的 25 | 35 | 45 | 55😂

影咗相梗係周圍 share 俾人睇笑吓啦, 點知尋晚竟然比個時裝人秒殺道出一個玄機 : 我穿衣風格每廿年嚟一個 cycle. 

超厲害, 連我自己都冇察覺到 😮  果然係 fashion !  據廿年循環推理, 即係我 65 歲返巴黎再影的話會係黑絲 look, 75 歲未瓜就係阿婆穿長袍闊褲, 諗起都覺得搞笑 😆.

賣飛佛 . duck confit 💗💗

去得巴黎, 食好嘢是必須的.  講真, 雖然我已經對法國冷感晒, 但當地美食又真係冇得輸, 求求其其搵間 bistro 仔, 啲味道已經可以 KO 晒香港啲所謂法國藍帶廚師 ! 

不過無論法國嘢食點勁都好, 始終敵不過世俗審美, 要無奈地, 矯揉造作地, 屈服於 globalization 洪流.  

就好似今次一試巴黎好火地標餐廳 https://www.letoutparis.com/ 

坦白講啲嘢好 L 好食, 可惜我就覺得非常做作, 唔明點解頭盤永遠都係有啫喱粒同整 pet 不明泡沫, 主角一隻生蠔, 原來只佔整個擺盆 1/6 面積, 妹仔大過主人婆, 真係笑爆咀 😂

個龍蝦仲假, 攞個燒炭盆出嚟扮喺客人面前烤, 成件事直情超級智障 ! 望住壇嘢, 好無奈.

不過要再三強調, 碟法國龍蝦係非常好味, 肉質爽脆但又入口即溶, 我照晒鏡.

或者係 weekend, 呢個咁作狀嘅地方客似雲來, 啲枱翻完一輪又一輪, 證明普世人就係要呢啲, 哈哈, 吹咩 ?!

可靠的兔仔

慎入 !  此 blog 內容可能令對小動物愛心爆棚者反感及不安

羅馬充滿原始獸性, 一場去到梗係要做啲獸性行為襯番.  N 年前羅馬讀書寄人籬下, 但一啲都唔可憐, 因為嗰家人對我好好, 仲踢咗自己個仔做廳長瞓梳化 😆😆 讓間 penthouse 房我住. 最最最正嘅係意大利媽媽做嘅住家菜一流, 餐餐食到舔舔 👅

[ 撒嬌女人最好命 ] 劇照

有次食食吓飯講起食兔仔 (我唔驚, 因為之前喺法國有食, 法國人都食), 意大利媽媽話最緊要買 coniglio sicuro (可靠嘅兔仔).

問意大利媽媽, 乜兔仔有分可唔可靠嘅咩 😂 ? 結果答案嚇我一跳 ! 佢話羅馬人原來會周街捉貓去當兔肉賣 😱😱😱  哇 ~~ 咁都得, 真係佢哋先有能力諗得到.

今次羅馬住嗰度附近有間百年老號肉檔, 一於去睇吓有冇兔兔賣先.  哈哈, 有 ! 不過冇 display 出嚟, 要問先有.

 

肉類切割員走入後欄, 行出嚟秤住隻已經預先剝好皮嘅兔兔 show 比我睇 ( 好彩唔似以前香港街市賣鵪鶉咁, 喺你面前監生剝皮 ) !  

都好大隻吓 ( 冇見過貓會咁大隻, 應該唔係貓掛...... 😜), 問佢要半隻得唔得 ? 唔得, 要成隻買. 

一路同我傾住偈一路手起刀落, 話咁快就斬好, 肉類切割員一心二用, 勁 !  

左邊嗰包係兔肉

話時話, 喺廚房望住枱面個紙包, 而紙入面就係一舊舊生嘅兔肉, 當場背脊一寒, 打咗個冷震.

人生第一次自己煮兔, 心情忐忑, 如果煮衰咗, 就枉費咗隻兔. 好在最後味道同賣相還可以, 不過試過呢次夠晒皮, 我心臟唔夠強大一路煮一路驚, 以後都唔會再整了.