僭建

僭建 - 無處不在.

身邊唔少朋友同事, 無啦啦失蹤一個禮拜, 返嚟個樣有啲唔同咗, 明顯執過.

最驚嚇有次去韓國公幹, 大塞車, 又熱又曬, 同車翻譯小姐, 一望佢側面, 太陽打落嚟, 啲光竟然可以通過佢鼻樑!  哇~ 裝假狗.

講起僭建, 諗起10幾年前一單傑作.

當年年初三赤口同男友吵大鑊分手, 返屋條氣唔順, 諗起佢間餐廳有僭建, 初四即刻打去屋宇署舉報, 整佢一鑊!

屋宇署冇而家咁忙, 好有效率.  我哋初十好番, 男友話餐廳比人查, 收到清拆令, 要佢拆晒個僭建玻璃屋, 問我有冇裝修師傅介紹.

有! 緊係有啦!  結果個工程使咗佢五皮幾, 拆咗玻璃屋, 少咗地方做生意, 每日做少四枱客 x 3 rounds. 

哈, 抵死! 分手吖嗱?