東京私房一腳踢

以前隻馬夠眼光, 嫁到個識於微時, 但漸漸變為誇國公司 CEO 嘅老公, 而家身在東京享夫福, 講咗好多次去搵佢, 今年終於成事.

餐廳喺個騎樓底

舊馬提議食法國菜, 好呀, 因為聽聞日本嘅法國菜, 分分鐘追得上法國本土, 我都好想試吓.  

今次去咗佢屋企 ( Shoto 松濤 ) 附近, 一間外貌簡陋嘅法國私房菜, 目測成間嘢加埋不多於 5 百呎, 廚師自己一腳踢, 喺個唔夠 30 呎嘅 open kitchen 煮好西.

open kitchen 麻雀雖小五藏俱全

日本人廚師當年法國學藝, 除咗講得一口流利法語, 仲有狩獵牌, 野外捕獲不少珍禽異獸比知音分享, 好榮幸我有份.

餐廳一角  ( 唔好以為冇客, 係我哋磨爛蓆搞到成點鐘, 啲人食完走晒啫 😁)

極鮮甜大蜆 + 竹筍 ( 隻馬將啲汁當湯飲, 勁 ! 果然係 CEO 老婆 )

收到風有北海道熊肉, 當然唔放過, 原來係 < 熊 sausage > 加 < 熊熏蹄配椰菜 >, 濃烈又惹味, 對見慣大 ( 陸 ) 場面嘅我 😂, 完全冇難度.

熊人指甲

廚師似乎相當 impressed 有女人食呢度菜, 百忙中走嚟吹咗陣, 跟住仲送咗隻熊人指甲我留念.  唉吔, 攞落手感覺有啲恐怖, 直頭有股寒氣喺背脊滲出嚟, 不過返到酒店又冇事, 仲瞓得好好添.

食完 bear 輪到 deer. 

呢個紅酒鹿肉有肉筋嘅, 牛𦟌 feel, 好食到不得了, 不過份量實在巨得驚人, 如果我兩日冇食嘢應該可以食晒, 可惜今次剩咗好多.

鹿肉

食完呢餐, 我唔敢再話自己做嘢辛苦喇.  因為見廚師由接電話 / 落單 / 煮菜 / 斟酒 / 上菜 / 整甜品 / 煮咖啡 / 執枱 / 洗碗 / 清潔, 完全 one man band, 成晚自己一個騰嚟騰去, 根本未停過.

佢話開咗呢間餐廳廿幾年, 除咗好間中休息旅行, 其餘日子晚晚如是. 我問, 咁多年唔攰嘅咩 ? 佢話唔啦, 因為好鍾意煮好嘢人食, 呢個係佢 passion.