迷幻東京

東京旅友比較特別, 非常抗拒排隊, 所以要排隊入場嘅景點, 一率 OUT !

但有個新地方 TeamLab Borderless 真係好想去, 聽聞而家好火, 起碼要排成粒鐘先入到, 唔理喇, 一於先斬後奏, 買飛先.

TeamLab 喺正 < 台場 摩天輪 > 下面, 但入口極為隱蔽, 並冇明顯指示, 兜嚟兜去, 走咗好多冤枉路, 最後夾硬穿過人哋停車場先找到.  好彩啱啱開門時間尚早, 前面只有大約 50 人, 排唔夠 10 分鐘就入到, 可以接受. 

好奇怪點解咁多人帶細路嚟, 佢哋咁細, 識睇咩 ?

Animals of Flowers, Symbolic Lives

因為午飯將會食壽司放題, 所以我哋諗住留肚冇吃早餐. 好彩咋, 如果唔係, 真係嘔硬.  

10 萬呎光影迷宮, HD 超級投影, 天地牆唔係啲天花亂墜不斷移動嘅圖案, 就係超反光鏡面無限反射, 行咗陣已經頭暈眼花, 不過講真, 好佩服成件事嘅構思同神奇互動投影科技, 超級厲害 !

Universe of water particles

參觀咗大約一個鐘, 正當我 O 咀狂影, 心情非常澎湃之際, 眼尾梢到隻大陸馬 poker face 呆立一旁.  

My god, 千祈唔好同我講頂唔順想嘔呀 !  後尾佢話冇想嘔, 只係覺得餓. 頂佢, 男人之家餓吓都唔得, 冇鬼用 !

The Haze

Forest of Resonating Lamps

去 TeamLab, 記得就算唔著防滑鞋, 至少都要揀對唔冼嘅, 因為好多地方都好冼, 有時地勢仲會起伏不定.

有以下情況咪去 :
夜盲 / 立體感弱 / 平衡力差 / 易暈浪 / 太餓 / 太飽 / 醉酒 / hangover / 討厭細路

Floating Resonating Spheres

日本小朋友唔好惹, 我就喺綠色氣球地方, 差啲比條細路頂頭鎚撞爆光.

The way of the sea in the Memory of Typography

行到一個如果前面冇人, 根本唔識自己行番出去嘅迷幻景點, 比我偷聽到朋友細聲自言自語 : " 今次癩嘢喇..... " 😂😂   太好笑.

The Infinite Crystal Universe

搵咗好耐都搵唔到最想睇嘅 Infinite Crystal Universe, 最後關頭, 正當想放棄之際, 哎吔比我哋鏢到尾會.

呢個 LED installation 實在靚到令人尖叫, 萬千星輝, 閃耀光華, 身在其中簡直有掉進銀河嘅感覺.

見隻馬餓到暈, 算喇走人. 出閘回頭一望, 幾百人排到出馬路, 睇個勢, 隊尾冇 1.5 個鐘都排唔到入去, 好彩我哋夠早嚟啫.