早於第四波未爆發前, 直覺話我知政府班驕傲, 懶得戚, 完全唔知個 [ 醜 ] 字點寫嘅垃圾, 一定會陀衰家再出事 ! 果然不出所料, 十一月疫情一發不可收拾, 成個聖誕新年同而家嚟緊農曆年, 都比啲 extend extend 再 extend, 愈限愈爆嘅 " 限聚令 " KO 哂.
 |
| 發霉拉篋 |
因有 [ 先見之明 ], 上年十月尾已經走去預訂酒店, 打個底, 就算一月生日嗰陣有乜限聚禁足唔可以出街食飯慶祝, 至少可以叫外賣爆房閂埋門食. 結果真係限聚無了期, 造就咗呢個 staycation.
實在太耐冇執行李, 望住個封晒塵嘅篋打咗個冷震, 感覺熟悉又陌生. 停飛一年執篋功力退步不少, 揦手唔成勢比正常用多咗 10 分鐘, 去到酒店房打開竟然仲發現執漏嘢, 好彩住一晚啫.
雖然訂嘅唔係維港海景房, 但對住半山豪宅同周圍翠綠山巒, 唔錯啦, 吸吓啲貴氣都好, 加上酒店 upgrade 咗個 80m2 房比我, 一條友住夠晒 lu.
 |
| 窗外景致, 都唔係好差啫 😂 |
 | |||
| 露體狂至愛 |
最殺食係浴室, 90 度角落地大窗開揚景觀地方闊落, 幾條友坐喺窗台傾偈飲嘢都唔覺迫狹. 個浴缸好寸咁坐正房中間, 本身唔係浸浴 fans, 但咁嘅配套, 唔整番個泡泡浴嘆吓香檳都唔係人啦.
 |
| 好爽呢 |
酒店唯一嘅餐廳大裝修冇 room service 大條道理叫外賣, 問過職員, 只要外賣員送食物到大堂時講出房間號碼, 職員就會幫手送上房. 掂, 一於叫雞 !
叫 PMQ 某一星法國餐廳 [ 本地黃雞 ] 外賣套餐, 佢隻 [ 黃雞 ] 稱得上係極品, 之前去餐廳食過 N 次, 諗起都流口水. 而家外賣冇即場咁好食就梗㗎喇, 但會唔會好差呢 ?
 |
| 拍得好差 ! 真身比照片靚十萬九千倍 ! |
答案係 : 唔會 !
失真率少於 10%, 係非常可以接受嘅 level, 隻雞經過長途跋涉, 加上運送途中嘅顛簸, 都依然保持狀態, 鬼咁香同惹味, on side 嘅新瀉米飯簡直一流, 個個食到停唔到口.
餐廳仲送咗 6 隻生蠔, 可惜冇人領情只得我一個人食, 仲因為唔好浪費嘅關係食足 3 隻. 其實生蠔, 我都係麻麻㗎咋 😅
沒有留言:
發佈留言