劈爆中午

金鐘 poolside lunch 好 happy

聖誕 --> 農曆年差不多兩個月, 夾住自己生日, 正常係夜夜笙歌全盛期.  年年如是, 點知今年疫情 6pm 就冇得堂食, 劈酒飯局變晒劈 lunch, 日光日白 4 點未夠已經劈爆晒, 加上天氣嚴寒晚黑八九點就躝上床, 過住日短夜長嘅生活.

雖則係爆, 但 technically 其實未冧, 所以周圍啲人講嘢都可以聽得入耳.  分享吓兩段喺相隔一個星期, 同同一個人 ( 同事 ) 劈酒午飯嘅談話, 好彩飲咗酒反應慢, 如果唔係實小爆咗佢 :

Lunch #1  

條友一日到黑想轉工, 話 ( 同老鼠不歡而散 ) 舊阿姐 whatsapp 問佢有冇興趣過檔.  乜品牌先 ?  點知係間大陸人 own 嘅法國四五線 multi-brand 😵  我叫佢唔好去, 無謂搞到自己個 CV cheap 晒, 同埋間嘢強國人揸旗個 bor, 又話唔鍾意大陸要搞 BNO 移民 ?!

http://shirliek.blogspot.com/2020/12/blog-post_19.html

諸多辯駁, 繼續同佢拗簡直嘥氣, 30 秒後立即改口風叫佢不如去見吓, 睇吓點囉.  同事當堂笑晒. 

哦, 原來係我 get 錯咗, 人哋根本唔係攞意見, 只係想搵人去認同佢嘅己見啫.

Lunch #2

一個禮拜過後同事話傾唔成, 錢講唔掂數. 

覺得人哋大陸佬出得起, 吊高嚟賣, 現役 senior manager 去 " 降呢 " 一級見 manager 位, 無非想做少啲, 但錢又想要多啲喎, 獅子開大口嗌現有人工再高 20%, 請問係乜邏輯 ?

我話咁嘅時勢加 20% 好似高咗啲, 佢老馮咁話轉得工都預咗要加 20% 啦, 同埋唔知人哋係咪比 13 個月糧喎...... 唔係吖嘛, 見工嗰陣唔識問清楚 HR 咩 ? 佢答 : 冇呀 😮

比如間公司原本諗住出 $50,000 請個 manager, 如果要 match 呢位 candidate 而家攞緊嘅 $80,000 + 20%, 咁咪要成九皮幾, 等如 budget 咗嘅 double ? 比你係老闆你制唔制吔 ?  戇居 !