緣份夠嗎 ?

識我嘅人, 都知我對一切有關占卜命理星相嘅事物十分有興趣, 有時會同相熟嘅師傅偷吓師, 又或者喺 youtube / 網上亂摷資料, 自學一番一知半解亂咁嚟.

醞釀多年, 卒之的起心肝正識上堂. 報工聯會, 12 堂, 每堂個半鐘除開都唔駛 80 蚊, 真係抵到爛.  點解唔比貴啲搵個出名師傅學 ?  因為搵唔到囉 !  覺得勁嗰啲, 唔係仙遊咗就係收山唔教, 其餘嗰啲唔係過晒氣就係好流吓.  而家平平地報工聯會, 就算讀讀吓冇興趣 drop out, 都唔駛咁蝕.

全包圍分別報咗風水同八字, 星期六學風水 + 星期日學八字, 好勤力吓.  

尋日星期六下晝人生第一堂風水課, 感覺還可以, 老師/師傅 吹水講古, 臨尾半粒鐘先教點睇 2021 九宮飛星. 不過都唔係冇得著, 因為佢透露咗香港 3 個風水差嘅地區, 有乜特徵呢 ?  就係鄰近嘅山岩岩巉巉好似金沙朱古力咁 😆  同學們紛紛發問, 想知自己住嗰區有冇份, 哎吔有呀 ~ 其中一個 : 屯 X, 中咗 !

今日學八字遲到 8 分鐘, 入到班房, 老師/師傅 已經教完 10 天干 ( 甲、乙、丙、丁、戊、己、庚、辛、壬、癸 ), 正在如火如荼地教緊 12 地支 ( 子、丑、寅、卯、辰、巳、午、未、申、酉、戌、亥 ) , 老實講我都未識讀晒呢堆字, 好彩不嬲對八字有些微認識, 先未至出師未捷身先死 😅.  跟住, 老師/師傅 好高速咁再教咗幾個開盤技巧, 反應轉數慢啲分分鐘甩轆, 跟唔上大隊. 

好不容易捱到落堂 !  唔好誤會, 其實課堂內容相當有趣, 只係我稍缺慧根覺得有啲吃力啫, 正當諗緊應該 ok 可以繼續學落去之際, 老師/師傅 話同學若然緣份未夠, 覺得太難嘅話, 上第二堂之前可以去寫字樓要求調班.  

吓 ~  係咪講緊我呢 ? 😂