養和人球

前個星期六腳面無端端腫咗一小塊 3x3 cm, 冇理幾日發脹一倍 6x6cm 摸落又痕又痛, 頂唔順去養和門診.

點解老遠都要跑去養和 ? 情意結囉.  細路嗰陣體弱多病, 屋企住得近, 半夜三更頭暈身㷫爸媽一定人肉速遞將我直送.   

習慣成自然, 好似剪頭髮, 好難先搵到個夾嘅, 若然有日髮型師突然唔做要搵第二個, 點剪都周身唔聚財乜都好似爭啲, 就係呢種感覺.

住院登記部 ( 網上圖片 )

抗生素啪成個禮拜豬蹄依然未散, 尋日仲有惡化跡象, 唔想太長命但又怕死, 所以 lunch 後再去養和 check 吓有冇其他 complications.  行過住院登記部, 20-30 人扐住拉篋等 check-in, 十足醫院 staycation, 養和真係好生意.

入正題, 尋日隻豬蹄竟然醫咗 3 粒幾鐘, 德國鹹豬手都唔駛煮咁耐.

第 1 粒鐘 : 門診塞滿啲等住驗身移民過英國嘅一家大細, 排咗差不多九個字, 終於輪到我.  醫生話食抗生素唔得就轉介去 [ 骨科 ] , 解釋骨科唔係剩係醫骨, 所有手腳部位都歸佢哋嘅, 吓...... 😂 ?

第 2 粒鐘 : 去到骨科冇乜人都係要等, 醫生詳細檢查後 ( 好有耐心嗰隻 ), 結論豬蹄應該係皮膚底層被細菌感染, 建議轉介我過塘去 [ 感染 / 傳染病科 ], 吓...... 😂 ?   好啦, 公司有保險, 去啦.  

正在呆等轉介信心諗今次唔知會收幾錢之際, 護士走嚟話醫生覺得冇幫到我所以唔收診金.  真的嗎 ? 冇聽錯吧 ! 免費 ? 養和喎.  上網翻查價目表, 骨科起標價 $1500.

第 3 粒鐘 : 骨科行落門診等 [ 感染 / 傳染病 ] 專科醫生, 等到謝晒皮, 唔係講笑真係由食完 lunch 覺得好飽等到變肚餓, 百無聊賴上網起吓個專科醫生底. 呵, 後生仔嚟嘅, 樣好似好 ok ( 結果冇照騙, 真人確實係非常可以的 ).   

醫生估計之前食抗生素唔理想係因為口服效果只有七成, 如果想快啲見效就最好打針, 問我驚唔驚, 驚 ? 開玩笑吧, 除非支針筒好似拍搞笑戲嗰啲咁成呎長啦 😆    

打針套餐一連七日, 每日一支, 仲要每針唔可以相隔多過 24 小時 😜   我估今次連還去完養和呢七日, 乜都夠晒皮了.