至最令我心服口服一次, 係 [ 舊同事 ] 同佢個 5 歲仔去另一同事屋企玩, 因為同場有其他小朋友, 仔仔玩到失控發晒癲, 高八度不停叫, 擒嚟擒去四圍跑 ! 如果我係老母, 實行一踭批到佢立即坐定定收聲, 正當幻想虐兒畫面之際, 身旁忽然傳嚟 [ 舊同事 ] 一把非常柔弱而帶有懇求語調嘅聲音 : " Jxxxx ( 仔仔英文名 ), 你可唔可以唔好咁大聲......"
吓...... 勸戒形式 ? 個仔當佢透明照跑照跳, 直至屋主都睇唔過眼大暍一聲, 條友先停到落嚟. 香港而家咁多公主病小學雞, 真係多得呢類老母, 縱容子女. 此事之後, 我 certify 咗 [ 舊同事 ] 係個冇情緒嘅活佛, 最近仲轉埋食全齋添, 真正活佛顯靈.
大半年後嘅尋日, 同 [ 舊同事 ] hotpot lunch 聚舊, 佢竟然發火投訴公司啲人點密集地 [ 恰 ] 同 [ 屈 ] 自己, 話成世人未試過咁嬲, 覺得自己開始焦慮, 講嗰陣見佢真係嬲到震震吓 ( 當刻, 一生人第一次體會同目擊乜嘢叫佛都有火 ). 問佢有冇同老公傾過, 原來老公都叫佢擗炮, 係囉, 咁落去唔係路, 傷身, 如果冇經濟壓力都係儘早閃吧, 因為呢啲 [ 恰 ] 同 [ 屈 ] 情況只會變本加厲.
估吓跟住落嚟我聽到乜 ? 就係 : 但係, 但係, 但係, 好多但係. 但係...... 如果我辭職, 老板咪好慘 ? 但係...... 如果我走咗, 啲嘢會冇人做, 佢哋好慘個喎......
真係慈悲心腸, 俾人蹧質, 辭職都仲同嗰啲 pk 擔心咁多.