曼谷食力 II

曼谷的第二天.

之前一整晚暴食鮑到嘔, 上床瞓覺唔夠 5 粒鐘, 又要走出街食 mum mum, 目的地係今年年頭新開嘅朝聖之地  Gaggan x LV.

餐廳面積唔大一眼睇晒, 設計 laid back 得嚟又帶點 "法式優雅", ok 靚嘅, 不過就冇乜 wow factor.

午餐 9 道菜, 係之前嗰晚份量嘅 1/3, 今次應該可以食晒 lu 掛 😄

餐巾套俾你睇吓㗎咋, 冇得攞走 😒

👅 LICK IT UP 👅

以前食過 Gaggan http://shirliek.blogspot.com/2018/11/one-night-in-bangkok.html, 佢有個 iconic dish 叫 LICK IT UP ( 客人用脷𦧺碟上面嘅汁 ). 果然, 而家 LV 都可以𦧺 👅👅.  

CHARCOAL

介紹吓其中幾道菜先.

CHARCOAL - 舊黑炭上面係粒炭烤穴子 ( 日本海鰻 ), 十分脆口, 可惜面頭擺咗啲我唔鍾意食嘅黑松露, 扣分 !

WORLD MAP

WORLD MAP - 地球入面有 3 個菜系嘅美食 : 日本 otoro 壽司, 印度香料鵝肝 waffle, 泰國小河蝦透明米餅. 

壽司 . waffle . 米餅

啱啱先話 2024 年內唔會再食魚生, 點知一見舊 otoro 就已經忍唔住秒殺 daap 咗. 呢啲咪正宗姣婆守唔到寡攞 😝.

MOMO

MOMOS - 一黑一白蘑菇餡料印度餃子, 餃皮極度彈口, 混合香檳 bearnaise sauce 泡泡食, 兩個字 : 驚喜 !

PATURI - Gaggan 名物, 木烤香蕉葉鱸魚, 據聞係廚師媽媽住家菜味道.  上枱時塊印有 LV momgram 嘅檀香木仲著緊火 🔥, 儀式感十足, 蕉葉一打開, 鮮魚味洶湧澎湃. 咬落去, 魚肉嫩滑多汁, 至好食係呢個 👍

PATURI

RICE & WINTER MUSHROOM - 最後一個冬菇煲仔飯點解又係黑松露㗎 😨 ?!  試咗啖, 頂唔順, 唔食.

總括對整體用餐體驗相當滿意, 但又未去到驚為天人地步, 所以試過一次就夠了.

曼谷食力 I

2024 年十二月係考驗食力嘅時間, 剛剛去完東京, 曼谷之旅又嚟喇.  友人從三方各地 ( 香港 . 上海 . 東京 ) 飛往曼谷, 喺指定時間到達預約好嘅餐廳, 坐低開飯 😄.

集合地點係曼谷潮區 Thonglor 嘅 CANVAS https://www.canvasbangkok.com/  :  美國人廚師, 連續 6 年攞米芝蓮一星, 食物賣相勁靚, 一於試吓.

非常精美的 menu

廚師除咗煮嘢叻, 仲會畫畫, 將 tasting menu 28 道菜畫成 28 幅畫, 好靚 😍😍😍   多口問廚師, 原來佢冇學過畫畫, 只係 Covid 時期冇嘢撈, 無師自通自學而成.  

怒髮衝冠的廚師 😆

成28 道菜咁多, 點食得晒 ?  餐廳經理叫我唔駛擔心, 因為食物份量其實唔多, 每樣都只係 one bite. 不過佢忘記咗廚師係美國人, american size 嘅 one bite = 我嘅 10 bites 呢 😂😂. 

唔好講咁多, 去片, 睇我食咗啲乜.

 

係咪堅多呢 ? 😆😆😆

食材配搭相當豐富 / 有創意, 造型擺碟更加係天花板級別 ( 特別訂造嘅陶瓷碟絕對功不可沒 ) !  廚師好明顯可以食得好辣, 因為有啲組合真係連我都覺得非常非常之辣.

同埋佢應該有超多靈感, 想一次過曬冷. 不過成晚味蕾連續被不停轟炸 28 次, 真係宇宙大爆炸 ! 若然知道食物份量會係咁豐盛, 我真係要早一日就開始絕食, 饑荒咁款先 KO 到囉 😆

成晚印象最深刻, 係下圖呢個由 227 粒牛心, 牛脷, 蒜頭, wasabi, 蔥, 鹹蛋黃, etc. 砌成嘅 227 Forms of Wagyu. 食法係要將呢 227 粒嘢撈埋, 組合成一匙羹, 然後一啖過食, 好癲呀 😲 

東京大食の魚生等我呀

Merry Christmas 🎄🎅🎅🎄

一直好鍾意食魚生, 每次食日本料理都必定會叫 sashimi.  

但年紀大咗開始偏食, 衰格乞人憎 : 初期只係唔食三文魚 ( 比蔡瀾影響, 話三文魚勁多記生蟲日本人都唔會食 ! ) ;  之後怕腥 skip 晒有銀色皮嘅魚 ;  近期仲進化到連北寄貝, 赤貝, 魷魚, 八爪魚 ( 全部都冇牙咬 ) 同帶子 ( 唔鍾意 texture ) 都上埋榜.

平時食去一般日本餐廳還 ok , 因為可以唔點自己唔食嘅嘢, 但一到 omakase, 尤其係廚師會問有乜唔食嗰啲, 就出大事 😒   除咗上文提及嘅三文魚, 銀色皮魚, 北寄貝, 赤貝, 帶子, 魷魚, 八爪魚, 其實仲有其他嘢唔食 : 包括超級 no no 嘅白子, 鮑魚, 蠔 ( 熟 ), 螺及一切肝類. 

好難服侍, 通常廚師聽到我呢個 long list 都會立即皺眉頭.  Oh sorry...... 真係非常之唔好意思 🙏  但話明係廚師發板, 又駛 Q 理我呢類西客嘅感受吖, 總之想煮乜就煮乜, 對吧 ?!

以為今次十二月東京大食之旅, 凍冰冰, 唔會主打魚生啦, 但唔知點解, 食吓食吓又食咗好多喎, 仲多過七月夏天嗰次.  尤其第二晚, 熟食應該只佔整體食物份量不足 30% 😆, 不過要澄清, 餐廳真材實料, 魚生係新鮮靚嘢嚟架 👍 

食得咁開心, 緊係要強吻 💋 廚師, 一表謝意啦 !!  不過今次食咗勁多生魚, 物極必反 ( 原來食魚生都會滯 😂 ), 返香港呢排都係想食番啲熟嘢先, 應該要等到 2025 年先開齋再食 sashimi 了.

冬至郊遊遊

早排睇鬼王潘聰個靈異節目 https://youtu.be/M01NZ6nKxAI?si=pqKoCy5Qaq-tjn4d , 拍攝地點係鯉魚門 [ 海防博物館 ] ( 現己改名為 [ 香港抗戰及海防博物館 ] ), 都係嗰啲啦, 話嗰度猛, 當更食蕉晚黑見到日軍之類.

回憶突然番晒嚟, 記得廿幾年前博物館剛開館時曾到此一游, 因為建築設計係香港建築署 ( ASD ) 難得唔樣衰嘅傑作之一.

BEFORE & AFTER

2024 冬至大日子, 久別重逢再次到訪 ( 醉翁之意不在酒, 當然另有目的 ).

喺展館某處牆上 cap 咗張 BEFORE (上) and AFTER (下) 鳥瞰圖 : 舊鯉魚門炮台 vs 改建後嘅博物館.

舊鯉魚門炮台張圖成塊人面咁, 兩隻眼, 仲擘大口有牙添 !  望落真係得人驚. 

雖然博物館地點歷史背景有啲驚嚇, 但光天化日又 feel 唔到有特別異樣 ( 除咗 1 號地下彈藥庫, 落到去非常有壓迫感 + 例牌起雞皮 + 左耳耳鳴 ), 其他地下室同軍事遺蹟又正常喎.

但唔排除, 喺其他唔係咁陽光普照嘅日子到訪, 個場會變另一回事都唔出奇 👻.

從 [ 香港抗戰及海防博物館 ] 山頂遠眺將軍澳, 山環水抱景色宜人 🩷🩷

不過當年打仗, 原來九龍半島位處炮台射程範圍呢 😧.

行勻成個山頭終於要到戲肉, 出發去一個 [ 秘景 ] 踩場 ! 

由 64 米 ( 博物館 ) 山頂一步一步, 落落落...... 落落落落...... 走到一處同維港海平面只差 2 米嘅地方 : 魚雷發射基地.  

鯉魚門海峽靚景一覽無遺, 不過 [ 秘景 ] 就好似同海面有啲近, 當日只不過有小小風浪, 企近岸邊嘅我就已經淆底, 幻想打大風之時, 一個浪捲埋嚟, 嘩 ~~~~~ !

東京大食の鮮肉

炒魷突然唔駛做, 空虛 ~ 寂寞~~ 凍 ~~~ !   好彩之前咁啱 plan 咗個十二月東京之旅, 可以食瞓屙, 行開 "放縱" 吓 😆

臨近聖誕, 原來想喺東京食好西相當困難, 高質餐廳唔係話你想去就得, 大部份不可電話預約只能網上訂, 但又唔比太早訂, 要指定日期先得 ( 通常 sharp 兩星期前 ), 上到網, 永遠 fully booked !  今鑊剩係訂位, 都已經搞到我把幾 🔥🔥🔥, 未出發先焫著.

到達東京第一晚, 必須有個好開頭, 事前出盡九牛二虎之力 book 到間成 8:30pm 都仲肯接客, 叫 [ HAKUNEI 白寧 https://hakunei.com/en ] 嘅日法 fushion 米芝蓮.

餐廳位於西麻布広尾高級住宅區, 行到門口有個小鮮肉迎賓.  入到接待處, 鮮肉極力建議我哋先去 toilet 😂  可惜冇人有反應喎, 我呢啲咁識睇眉頭眼額嘅人, 為咗打破尷尬局面, 唯有去吓啦.  

哇 ~~ 好彩有去啫, 如果唔係, 點會見識到世界上原來有廁紙會好似絲咁滑㗎 😮😮😮  特級享受, 人生第一次 ! 我個 seafood, 就係咁, 喺東京被寵壞了 !

哈哈, 彩蛋陸續有來, 原來 27 歲小鮮肉竟然係餐廳主廚 ! 有眼不識泰山, 以為佢係接待員 / 泊車仔, 去完廁所無聊仲老點佢企出餐廳門口擺 pose 俾我影相添 😂😂😂. 

Tasting menu 海陸空全包圍, 心諗, 乜都有, 係咪真係得㗎 ?  

結果, 我哋一行三人一致通過, 成晚 . 全部 . 所有嘢 (包括酒) 都好好好好好好好好 L 正 💪  仲要唔貴 ( 唔計飲酒, 14 道菜每人大約 hkd 1500 ) ! 

唔怪得開業唔夠一年就已經攞星啦 🌟⭐🌟⭐

根據個人口味, 最愛係 : 

1. 蘿蔔清雞湯 ( Shamo chicken  Daiken radish ) - 超濃縮, 雞之精華 ! [ 上圖左上 ]

2. 牛蒡 ( Burdock ) - 甜甜又帶點煙韌口感, 超驚喜 ! [ 上圖右上 ]

3. 白子 ( Soft roe  Shimorita leek ) - 打破我最驚驚白子印象. 煎到金黃脆口嘅白子坐喺 vol-au-vent 奶油酥盒上面, 軟硬兼施, 絕 ! [ 下圖右上 ]

4. 鰻魚 ( Eel buckwheat ) - 燒鰻魚同西洋菜原來可以做 friend 㗎 ! [ 下圖右下 ]

好嘢食唔少, 今次體驗實在有驚喜, 真心覺得呢塊鮮肉有才華有天份, 最緊要有 heart 會去感覺同思考, 洞悉不同食材嘅 strength & weakness, 融會貫通, 避重就輕.

呢次無心插柳嘅巧合, 成就咗十二月東京大食之旅第一擊, 好嘢 !!!

乜啲人咁迷信㗎

挨年近晚, 呢排好多人同我諮詢 2025 運程.  呵呵, 如果我咁勁, 一早出嚟開檔搵食啦, 仲駛踎喺間垃圾公司日日等炒魷咩 ?! ( btw, 我十一月尾已成功被炒, 做到十二月中 😆 )

前日食 lunch, 又有人問同一問題, 叫佢俾個八字嚟睇吓, 同下年 [ 乙巳 ] 流年有冇 [ 合 ] or [ 刑沖破害] 啦, 點知懶神秘淨係話自己蛇年出世 😠  挑 ~~~  出生年-月-日-時, 4 天干 + 4 地支一共 8 個字嘅組合, 俾得年支嗰 1 個字, 點睇 ?!  

我同佢講唔識睇, 跟住佢竟然教番我轉頭, 話下年屬蛇犯太歲 😂😂   對住呢啲人, 無言.

喺度先唔講咁深奧, 坊間流年運程, 講嚟講去都只係講某人 [ 出生-年 ] vs. [ 流年 ] 嘅關係, 但其實每人嘅 [ 出生-月 ] [ 出生-日 ] 同 [ 出生-時 ] 都有自己所屬生肖, 而嗰啲生肖亦都會犯太歲, 影響力同出生年一樣, 有時會更甚.

就如下面八字 example : 兔 ( 卯 = 兔 ) 年生, 睇運程書, 下年唔犯太歲掛, 但麻煩睇清楚, 佢出生月-日-時都係巳-巳-巳 ( 巳 = 蛇 ), 即係 4 個地支中有 3 個犯太歲 !  加上佢個八字唔要火, 可惜嚟緊 3 年係大火年, 頭暈身㷫在所難免, 只希望唔會太大鑊吧.

Office 近日有一位自稱有修行嘅女同事忽然 befriend 我, 成日同我討論一啲玄學資訊.  雖然學咗幾年, 但自問都係半桶水, 所以每次都會虛心聆聽女同事嘅故事 / 心得.

大前日, 佢同我分享一個十幾歲親戚, 一個命好到天上有地下無嘅八字. 一望佢個 screen cap, 咦 ? 只得地支 4 隻字, 天干呢 ? 原來女同事連八字係 8 個字組合都唔知 😂   真係戥佢尷尬, 我話唔緊要, 攞好命人嘅出生年月日時, 都可以計到.

點知計出嚟係另一個盤, 根本同佢個 screen cap 兩回事 !  我淨係睇到好命人懶過條蛇, 一生都冇乜財氣 😨  不過就算咁都可以有機會好命嘅, 有老豆老母包底咪得囉, 有乜所謂啫 !  

咁我當然冇如實同女同事講啦.  話時話佢八字咁勁, 好奇問佢跟邊個師傅學 ? 原來係 TVB 通靈之王 2 冠軍 fb 網上嗰啲免費課程 😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂😂