冬至郊遊遊

早排睇鬼王潘聰個靈異節目 https://youtu.be/M01NZ6nKxAI?si=pqKoCy5Qaq-tjn4d , 拍攝地點係鯉魚門 [ 海防博物館 ] ( 現己改名為 [ 香港抗戰及海防博物館 ] ), 都係嗰啲啦, 話嗰度猛, 當更食蕉晚黑見到日軍之類.

回憶突然番晒嚟, 記得廿幾年前博物館剛開館時曾到此一游, 因為建築設計係香港建築署 ( ASD ) 難得唔樣衰嘅傑作之一.

BEFORE & AFTER

2024 冬至大日子, 久別重逢再次到訪 ( 醉翁之意不在酒, 當然另有目的 ).

喺展館某處牆上 cap 咗張 BEFORE (上) and AFTER (下) 鳥瞰圖 : 舊鯉魚門炮台 vs 改建後嘅博物館.

舊鯉魚門炮台張圖成塊人面咁, 兩隻眼, 仲擘大口有牙添 !  望落真係得人驚. 

雖然博物館地點歷史背景有啲驚嚇, 但光天化日又 feel 唔到有特別異樣 ( 除咗 1 號地下彈藥庫, 落到去非常有壓迫感 + 例牌起雞皮 + 左耳耳鳴 ), 其他地下室同軍事遺蹟又正常喎.

但唔排除, 喺其他唔係咁陽光普照嘅日子到訪, 個場會變另一回事都唔出奇 👻.

從 [ 香港抗戰及海防博物館 ] 山頂遠眺將軍澳, 山環水抱景色宜人 🩷🩷

不過當年打仗, 原來九龍半島位處炮台射程範圍呢 😧.

行勻成個山頭終於要到戲肉, 出發去一個 [ 秘景 ] 踩場 ! 

由 64 米 ( 博物館 ) 山頂一步一步, 落落落...... 落落落落...... 走到一處同維港海平面只差 2 米嘅地方 : 魚雷發射基地.  

鯉魚門海峽靚景一覽無遺, 不過 [ 秘景 ] 就好似同海面有啲近, 當日只不過有小小風浪, 企近岸邊嘅我就已經淆底, 幻想打大風之時, 一個浪捲埋嚟, 嘩 ~~~~~ !