東京秋季旅行の大食

一年一度魚翅航空年尾 12 月都有套票優惠, 上年買咗今年出發 [香港 | 羅馬] + [香港 | 東京] 來回各一 set, 價錢基本上係短嗰程免費.  

日本人 graphic design, 可唔可以唔好咁靚呢 ?

羅馬五月去完十月中輪到東京, 諗住嚟個 4 日 3 夜快閃, 一條友四圍逛逛打吓咭買啲嘢自己煮食就搞掂, 點知同酒友噏噏吓佢哋又有興趣 join, 實在太好了, 多啲人就可以食多好多好嘢 ! 而餐與餐之間, 係各自各精彩, 自由活動時間, 咁嘅形式遊東京, 實在最理想不過.

Photo credit : 朋友影嘅 WIP 廚師靚相

Friend 竟然提議再去 2024 年尾食過嘅 [Hakunei 白寧 https://hakunei.com/en], 哇好呀 😍 !!  真係求之不得開心都嚟唔切, 因為真心覺得 [白寧] 出色地好食, 同埋佢嘅價錢定位唔高, 如果喺香港要有近似 level (但 sorry 我喺香港暫時未食到), 唔計酒水每位冇 $3,800 唔使旨意出門口.

MENU

果然, 今次再踩場, 呢位 "日本最後生獲得米芝蓮一星廚師 : Dai Hayashi 林大" 嘅出品完全冇令人失望, 每度菜材質配搭全部經過精心思考設計, 我哋幾條友成晚真係食到連環 O 咀, 驚嘆不已.

所有嘢都極度好味, 但講到個人最愛, 有呢 3 樣 : 

魚湯

1) 魚湯 Soupe de poisson - 新鮮海產精華魚味濃郁, 極度純厚嘅清澈高湯, 飲幾啖直頭就已經覺得自己好似食咗幾十斤魚咁補 💪💪💪

Red bell pepper | Stracciatella

2) 紅燈籠椒 | 意大利乳酪芝士 Red bell pepper | Stracciatella - 賣相靚到不得了, 乳酪芝士衾住嗰塊千層酥啲 texture 好食到嚇人, 個紅燈籠椒醬仲有少少余均益 feel, 成件事超級惹味 !

Pigeon

3) 乳鴿兩食之乳鴿濃湯 Pigeon - 餐廳事前電郵再三確認我哋食唔食鴿, 心諗鴿之嘛, 又唔係貓/蝙蝠/老鼠, 冇問題喎. 後尾得知原來日本人唔太接受食鴿, 所以餐廳要問清楚 😶  

頭一碟鴿肉已經係極品, 點知跟住嘅金時草鴿湯, 簡直係法國名物血鴨個 friend, 好少食嘢會食到咁激動, 好味到心裡面不停講粗口 !  咁玩法搞唔掂, 呢個湯飲完分分鐘返唔到轉頭. 

坐到咁上下, 係時候同侍酒師表白 😆, show 張兩年前影佢嘅相, 證明我哋係非常支持同欣賞 [白寧] 嘅回頭客, 侍酒師話其實佢都認得我哋, 仲行去同廚師咬耳仔 (應該係通水). 咁開心, 當然要影再番啲沙龍留念, 其實佢哋同之前個樣分別不大, 不過廚師就堅稱自己老咗, 有咩 ?

侍酒師

 

廚師