三星 '推'

中學至怕歷史科 (包括中西史), 唔止怕, 直頭係驚, 上堂一聽到嗰啲乜國物國乜朝物朝, 加埋古文 / 翻譯出嚟連音都拼唔到嘅人名地名, 就會立即啟動保護機制, 熄機雲遊太虛 😆.  可想而知, 放學返屋企, 係絕對完全唔會掂啲歷史課本, 好在歷史科通常冇乜功課, 就算有, 問人借嚟抄囉. 

講咁多, 除咗想表達我對歷史冷感, 其實仲有啲抗拒.   

識得耐都知我係條負磁場超敏 L, 雖然騎咗馬後已經唔再睇到 (阿飄), 但一個地方有定冇我仍然可以立即 detect 到.  所以如果有得揀, 旅行唔再去啲同古代文明太有關連嘅場所, 例如 : 羅浮宮, 大英博物館, 北京故宮, 西安兵馬俑, 開羅博物館, 羅馬鬥獸場, 負磁場太勁, 去親都周身唔自在, 勁起雞皮 / 頭赤 / 頭暈 / 耳鳴 (唔關收經事, 因為冇潮熱 😂).

出發成都前眾人興致勃勃, 誓要去 [三星堆] 不可 😓  

唔係啩, 開正我嗰瓣 : '歷史' + '古代文明', 大量幾千年出土文物諗起都覺得悶😴 + 陰 😲, 但又甩唔到身, 唯有跟大隊.

參觀 [三星堆] 博物館適逢週六, 同事怕人多已問過司機幾次駛唔駛早啲出發, 司機話唔駛, 點知去到集合點落車, 幾百人塞喺入場區互相擁擠 (注 : 大陸擁擠 = 人黐人 + 不斷打尖 😡😡😡) 迫入嗰條安保檢測通道, 明明人人已經一票在手, 都唔明仲要迫乜春, 目擊呢個亂象既憤怒又崩潰 !  

還好有少少安慰就係, 帶我哋團嘅係個鼻高高後生靚女, 我唔係麻甩佬, 但至少後生女唔打得都睇得, 好過要跟住件大媽 / 大叔吧.

博物館大堂

擁擠咗好耐, 終於入到博物館場內, 不禁 WOW 咗聲, 設計空間似 NYC Oculus + Vatican bramante staircase 混合, 頗有睇頭.

對 [三星堆] 原本冇期待, 諗住快快行完食個晏, 點知入館唔夠五分鐘, 望見幅 [沉睡數千年 . 一醒驚天下] 牆, 唔知做乜突然有種好感動嘅感覺, 非常奇特, 從未試過. 最奇怪, 係今次去呢個收藏咗 2500~4000 年前文明古物場地, 連少少頭赤 / 頭暈 / 耳鳴都冇. 

乜都冇, 剩係多人

靚女導遊細心講解, 我專注力缺乏聽啲唔聽啲. 俾人推撞足兩個鐘, 終於行晒成個館, 意料之外啲藏品超級好睇一啲都唔悶, 但我好驚呀, 唔係驚鬼, 係驚人 !   

男女老幼個個戰鬥格打 rugby 咁推推撞撞 (國術堂有教?!), 啲中佬為求搶位打咭, 一手攞住部手機喺你胸前攔截, diu 😡😡😡  

連身高 6' 1" 魁梧 PM 王, 啲人都夠薑撞, 見佢把幾火一嘢轟番埋去, 條友即刻彈飛 😂😂😂😂😂

太可惜...... 硬件靚又如何 ? 軟件仲係未得囉.

靚女導遊落力講解

原來幾千年前古代都有發財樹同財神