上星期二放工, 去百街賣嘢, 懶環保唔要膠袋, 左右手各嚦住一樽嘢,
行到出馬路中心, 千鈞一髮, 唔知做乜春, 竟然會成個趴喺度!
跌嗰陣因兩隻手都攞住嘢, 根本冇手撐, 所以係五體投地式 仆塊面落地嗰隻!
好在當時冇車經過, 但就嚇倒旁邊兩個女人驚叫 : "哎呀~~! 佢跌親呀~~!!" 超...... 鬼唔知咩?
佢哋淨係識問我有冇事, 但又唔扶我, 結果我自己爬起身.
好似拍戲咁, 前面咁啱有架的士, 我就好自然咁上咗車. 返到屋企, 發覺人中 (咀同鼻之間) 爆晒光, 隻門牙好痛, 好彩冇甩, 而啲手腳都係擦損同扭親之類. 見唔係特別大鑊, 就食埋啲外賣魚生, 飲番杯先瞓.
第朝起身, 上唇腫到成個鴨咀咁, 即刻喺行李度摷番個諗住去北京用嘅口罩出嚟遮醜, 返到公司人人問我係咪病, 我話仆街仆爛咗個口, 極騎呢. 之後唞咗幾日, 而家冇事lu.
今朝返工, 霎眼見到某男同事右邊面紅咗一笪, 諗住佢比老婆打.
噢, 原來佢尋晚喺又一城冼低撞親, 係 "暴雨異象" 嘅災民!
唔夠十分鐘, 另一同事來電, 話秘書小姐喺公司樓下大堂濕滑嘅雲石地下笪倒, 要十字車送院!
哇, 唔係嘛...... 聽到呢啲, 連鬼佬老闆都打咗個突, 即刻叫咗同事A入房.
事緣同事A前個禮拜搵判頭睇 office 裝修, 啲人唔小心打爛咗會議室個掛牆風水鐘, 之後佢又懶懶閒, 唔去搵人換, 結果而家連環出事,
老闆發爛渣, 要佢即日內搵人換番個鐘!
住嗰度成個屋苑住戶近期都收到一封經郵政處遞派嘅信, 內附冥通銀行 5 千萬陰司紙一張, 及某人同佢老婆嘅相片, 詳細地址, 電話, 電郵, 自訂車牌號碼, 連架車泊喺苑住停車場邊處都寫埋! 叫佢哋欠債還錢.
最恐怖係我八掛, 攞兩個當事人嘅 email address 作網上起底. 哈! 又真係比我挖到啲關於佢哋嘅料喎.
個男嘅鍾意賭馬, 因為喺啲賽馬網上討論區, 有頗多佢嘅發言.
之後又喺 you tube 摷到佢 post上去嘅 videos, 內容都係圍繞一間涉及網上原始股騙局嘅傳銷公司, 執笠之前佢喺度做過.
女嘅就少啲料, 只係喺 you tube 搵到佢個仔同一啲教會嘅片段.
啱啱睇完無線新聞透視 <求職‧求人>, 話香港 <有工無人做>.
訪問兩個 90 後, 有全職唔做, 寧願攞 3000 蚊個月做 part-time 嘅𡃁妹.
其貌不揚, 冇學歷, 冇經驗, 竟然嫌三嫌四, 學人講 life!
一個話接受唔到份工成 10 點先收工, 放工出嚟啲舖頭已經閂晒門, 返到屋企又冇時間煲劇! 另一個, 話只會考慮啲 5 年內會有晉升機會嘅工.
真係 Oh~ my~ 吉!
唔知佢兩位有冇照鏡, 睇吓自己咩料? 完全唔想付出, 就要收穫?
睇到呢啲, 除咗搞到我覺得自己仲好有競爭力之外, 亦令我諗起一個舊相好......
話說當年剛剛畢業出嚟做嘢, 大家係同行, 我際遇好過佢, 佢就成日怨, 話佢際遇差係因為英文唔好. 有次佢又喺度嘈嘈閉, 咁我話 : "既然你覺得英文唔好, 不如讀夜校吖?"
佢反應好大, 殺聲震天 : "返夜校!? 咁我點打牌呀!!"
就喺嗰刻...... 我覺呢個男人, 靠唔住, 冇希望.
踏入十二月, 進入開舖最後倒數, Dec 13 黑色星期五, 開埋中環間舖, 就可以歲晚收爐.
日頭猛做, 夜晚 EYT, 唔係 eat yourself, 係歡樂今宵 entertain yourself tonight. 由上星期日到尋晚, 一連 7 晚夜夜笙歌, 連馬場都入咗兩次, 哈! 比我見到 Cool 魔, 拍照留念.
多晚激戰, 真係想死, 少啲體能都唔掂, 正所謂 ..... 唔蒲唔知身體好.
星期五晚去某 wine society 嘅 annual dinner.
Dress code 係 black tie, 臨渴掘井, 諗住著以前 2006 年買落件 little black dress, 點知條裙穿咗落身, 拉鍊拉到腰就已經再拉唔上! 我諗同 2006 比, 我起碼大咗兩個碼, 唉......
好彩最後比我摷到啲十世前買落, 見得人嘅衫. 終於明白 <養兵千日, 用在一朝> 嘅道理.
去到場地, 似珠寶展, 啲女人個個曬晒冷, 珠寶首飾大大件, 密集式閃爆, 好大壓力! 平時啲兩三卡, 真係要行埋一邊.
我就一卡都冇, 好在咁啱件 top 個領位有好多 details, 乜都唔駛戴. 啲男人就好啦, 打條 bow tie 就得.
當晚主打係 Domaine Leroy 嘅酒 , 每個酒杯都有 labelling, 非常清楚. 而 pairing 嘅食物, 做得十分好味, 賣相精緻.
坐我旁邊有兩個唔識嘅 uncle, 開場白都不約而同問我鍾意飲乜嘢 wine, 我真蠢! 竟然喺一個 Burgundy wine 嘅地頭講我鍾意 champagne 同 Bordeaux 紅酒, 講咗出口, 先猛然醒覺自己喺個乜場合, 完全 politically incorrect.
可幸兩位 uncle 都唔介意, 再傾落去, 得知佢哋係香港出名嘅 wine collectors, 仲話可以幫我入會添. 哇~~ 驚驚! No 喇, 唔好講會費, 得閒叫我攞箱酒出嚟 wine tasting, 佢哋就話 auction 買, 唔通我喺百佳訂咩?!
蔡瀾個樣笑淫淫, 鹹鹹濕濕咁, 撇除雜誌啲鱔稿, 其實佢又真係幾識搵食. 幾次依佢推介, 都食到好嘢.
今次去食成都出名老街 "寬窄巷子" 裡面一間叫 <喻家廚房> 嘅私房菜.
http://hk.apple.nextmedia.com/supplement/columnist/art/20100614/14131151
 |
| 喻家廚房門口 |
 |
| 寬窄巷子 |
間嘢勁低調, 門面連一盞燈都冇, 唔似巷裡頭其他餐廳燈光火着, 好彩同我一齊去嗰個人隻眼好細𥄫到, 如果唔係, 一定大睇過龍 miss 咗.
廚師主理川菜, 冇餐牌. 擇肥而食, 材料要當時得令, presentation 極級精緻, 超有懷石料理 feel, 上每道菜, 都有人講解.
前菜有 <素菜十六小碟> + 辣爆雞頸, 黑蒜, 雞湯.
跟住上嘅小食, 做到成支毛筆咁 (啲毛其實係酥皮包住肉鬆), 十分搞嘢.
最衰同事幾年前去咗 show 過啲相比我睇, 搞到冇晒 surprise.
再嚟就係 16 個熱葷 : 鱷魚肉, 黑松露, 和牛, 鹿茸, 鮑魚, 包翅, 遼參, 燕窩, etc .
雖然細細碟, 但一人一晚食成 32 碟以上 (前菜 + 熱葷) , 實在係好飽! 仲要成世人都未試過一次過食咁多補嘢, 真係有啲怯.
果然, 返酒店瞓成晚醒, 囉囉攣, 太補喇...... 谷爆偈!
好耐之前已經有睇我 Yahoo Blog 嘅人, 大概知道我曾經開名批評過我最唔鍾意嘅 5 個人 (不過而家 Yahoo Blog 執咗, 冇得track 番 lu... ). 其實咁多年來, 對呢類人, 我都可免則免, 避之則吉, 因為正不能勝邪.
打工個機構, 人事調動, 其中一條最憎嘅 J 先生 , 而家時不時又要喺我 office 出現番.
佢早幾年以為上咗位, 對我老闆 (提攜佢升職嗰個) 一啲面都唔比. 風水輪流轉, 家陣要 under 番佢, 我老闆咁記仇, 佢呢鑊真係死一億次都唔掂!
其實我覺得自己好寬宏大量, 直情係海量汪涵, 對呢條衰公之前做過嘅濫交, 陰質事, 賤野, 都隻字不提. 點知同事講, 條 PK 竟然同佢哋 chok 我啲料, 仲話 : "she's not my friend".
What the hell! 做男人做到咁小家, 真係唔 X 掂, 要 post 佢個賤樣出嚟比人睇吓先! 明明中國人, 滿口英文扮澳洲佬, 食屎啦!
望望吓, 條衰公同菲律賓個 Noynoy Aquino ( 阿基諾) 有啲似.
啲賤人, 都係嗰個樣.
由始至終, 食飯嗰陣, 我都係對港人嘅某啲行為梗梗於懷, 例如 :
1. 以前週末飲茶 : "同枱食飯, 各自修行"
兩夫妻或者一家大細, 每人一份報紙 / 雜誌, 各顧各, 成餐茶可以連一句說話都冇講過, 零交流.
2. 而家有手機 : smartphone addiction
明明開緊飯, 個個低頭族, 攞住部電話噤噤噤.
有時出街食飯, 見隔離枱啲人咁, 不禁搖頭嘆息, 喂, 係咪真係咁放唔低呀?! 尤其一男一女, 如果個男嘅顧住玩手機, 我會覺得佢好唔尊重個女仔.
點知, 今晚竟然發生喺我身上!
某 friend 今日同咗我去玩, 玩完, 臨食飯, 忽然驚覺成日完全未覆過大陸啲客, 好緊張! 一坐低, 就開始不斷噤噤噤, whatsapp 加 QQ, 揼低頭, 持續 15 分鐘, 一 whatsapp 完, 二話不說, " 𠽌𠽌" 聲三大啖飲晒啲餐湯.
望住佢當刻, 有好多暇想 ...... 唔係想 dap 咗佢..... 而係, 香港啲男人就係咁? 好! 夠竟我忍住唔出聲? 定係開口鬧 x 爆, 叫佢尊重吓大會?!
結果我冇出聲.
再等...... 等到上牛扒, 佢又 QQ 緊, 叫我唔好等食住先. 但當佢發現我原來已經冇等, 食緊亦都正在講電話, 佢突然乜都唔玩, 同我講嘢, 直至食完走人.
